Isaías 55 - Biblia en Guaraní - ?anderuete ?e’? Por? 2015

Ñanderuete ome’ẽ imborayhu

1Mayma ijy’uhéiva, peju joa yrendápe, ha umi ipirapire’ỹva jepe peju pegueraha trígo pe’u hag̃ua. Pe’u, pejogua pirapire’ỹre, ha reiete oñeme’ẽ avei víno ha kamby.

2Mba’upéiko peiporuse pende pirapire pejogua hag̃ua umi mba’e ndaha’éiva pan ha ma’erãpa peme’ẽse pene rembiapo repy pejogua hag̃ua umi mba’e penemohyg̃uatã’ỹva. Pecherendu porãke, ha pe’u pe mba’e iporãva, pembovy’a katu pene ánga tembi’u he porãva reheve.

3Pemboyke joa pende apysa, ha peju che rendápe; peneñe’…rendu ha pene ánga oikove porãvéta ha ñañombopy’apeteĩ opaite árape g̃uarã, péicha Che amoañetéta che poriahuvereko rehegua ñe’ẽ ame’ẽva’ekue Davídpe.

4Peikuaa porãke, Che ahenoi ha amoĩkuri ichupe techahare ramo, mburuvicha guasu ha mbo’ehára ramo tetãnguérape g̃uarã.

5Ema’ẽ porãke, nde rehenóiva’erã umi tetã reikuaa’ỹvape, ha pya’e oñani joava’erã ne rendápe umi ndekuaa’ỹva, pende Ruetépe, pende Jára rehehápe, Ha’e nembotuicha haguére.

6Peheka pende Ruetépe, ikatu aja ojejohu ichupe, pehenói ichupe hi’ag̃ui rehe gueteri pendehegui.

7Pe tekove ñaña topoi hape vaígui, ha pe tembiapo vai apohára tomosẽ iñakãgui umi mba’evai ojaposéva ha tojevy jey pende Ruete rendápe, Ha’e oiporiahuverekóta ha operdonáta avei ichupe.

8Che pensamientokuéra ndaha’éi pene pensamiéntoicha ha pende rapekuéra ndaha’éi ku che rapéicha, he’i pende Ruete.

9Pe yvága ijyvateve háicha yvýgui, péicha hína che rapekuéra ijyvateve pende rapégui, ha che pensamiénto pene pensamiéntogui.

10Pe ama ha pe y ro’y rypy’a oguejy háicha áragui, ha ndojevyvéi yvate, ombohykue hag̃ua pende yvy, omoheñói ha omongakuaa pene mba’e ra’ỹi oñeñotỹva’ekue, pe kokue jára ohupity hag̃ua hembi’urã;

11peichaite avei che ñe’ẽ osẽva che jurúgui, ndouveimava’erã che rendápe ojejapo’ỹre che rembipota, ha oikopa peve Che aipotava’ekue guive.

12Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.

13Ñuatĩ rendaguépe okakuaáta yvyra cipres, ha pyno rendaguépe okakuaáta mírto (arraján); upévarupi oñemomba’eguasúta Ñanderuetépe, ha ko’ã mba’e opytáta techaukaha ramo tapia g̃uarã.