1Ko’ẽmbota vovete oñembyaty pa’i ruvichakuéra, umi karai anciáno, umi kuatia haihára ha mburuvichakuéra ha oñemoĩ peteĩ ñe’ẽme oguerahauka hag̃ua ñeñapytĩháme Hesúpe, Piláto rendápe.
2Piláto oporandu ichupe: Nde piko Júda retã ruvicha. Ha Hesu ombohovái: Heẽ, Che ha’e.
3Ha pa’i ruvichakuéra he’i heta mba’evai Hesu rehe, omoĩ vai hag̃uánte ichupe.
4Piláto oporandu jey ichupe ha he’i: Mba’eve piko nerembohováiri umi ñe’ẽvai he’ívare hikuái nderehe.
5Hesu katu mba’eve nde’íri ichupe, ha upévare Piláto ohecharamoite.
6Upe arete ára upévape ningo ojepokuaa ojepoi peteĩ présogui, oimeraẽva ha’ekuéra ojeruréva guive rehe.
7Oĩ peteĩ hérava Bárrabas, ojeapresamava’ekue iñirũnguéra ndive ñepu’ã sununuháme oporojuka haguére.
8Ha Israel retãygua aty ndetuicháva ou Piláto rendápe ha ojerure ichupe opoi hag̃ua peteĩvagui ojepokuaa háicha.
9Ha Piláto oñe’ẽ ichupekuéra ha he’i: Peipotápa apoi peẽme pene retã ruvichágui.
10Piláto ningo ohechakuaa porã voi pa’i ruvichakuéra oapresa hague Hesúpe ipy’a rasýgui hendive.
11Pa’i ruvichakuéra omoĩma hetãyguakuéra akãme ojerure hag̃ua, Pilátope, opoi hag̃ua Barrabásgui.
12Piláto katu oporandu ichupekuéra: Mba’épa aipórõ ajapóta ko pehenóiva Júda retã ruvichágui.
13Ha’ekuéra katu osapukái: Emosãingo ichupe kurusúre.
14Piláto he’i ichupekuéra: Mba’e piko ojapo ivaíva. Ha’ekuéra osapukái hatã hatãve: Emosãingo ichupe kurusúre.
15Piláto oñemoĩ porãségui Israelgua atyguasu ndive, opoi ichupekuéra Barrabásgui ha oinupãuka rire Hesúpe he’iuka oñemosãingo hag̃ua ichupe kurusúre.
16Umi soldádo ogueraha Hesúpe hogaguasu kotýpe, péva ningo mburuvichaguasu rekoha voi, ha ombyatypa upépe umi soldádo.
17Omonde hikuái hese ao pytãũ, ha omoĩ hikuái iñakãre peteĩ akãngora (coróna) ñuatĩguiguáva.
18Ha omomaitei Hesúpe ha he’i hikuái: Maiteípa, nde Júda retã ruvicha.
19Ha oinupã ichupe iñakã rehe peteĩ takuárape; ondyvu hikuái hese, oñeñesũ henondépe ha oñakãity joa gua’u ichupe ñembohoryhápe.
20Ha oñembohory heta rire hikuái hese, oipe’a ichugui pe ao pytãũ, ha omonde jey hese ijao ha oñeguenohẽ ichupe okápe, ojegueraha ichupe oñemosãingo hag̃ua kurusu rehe.
Hesu oñemosãingo kurusu rehe21Ha oguerahauka Hesu kurusu peteĩ ohasávape, hérava Simon Cireneygua, Alejándro ha Rúfo ru, ouvahína ikokuégui.
22Ha ogueraha hikuái Hesúpe peteĩ tenda héravape Gólgota, upéva ningo he’ise: Akãngue renda.
23Ha ho’ukase ichupe víno mírra reheve, Ha’e katu ndo’úi.
24Ha soldadokuéra omosãingo ichupe kurusúre, oñemboja’o hikuái ijaokuérare, ha oity hesekuéra po’a, ohecha hag̃ua mavapépa opytáta.
25Ha ka’aru mbohapy hóra jave ningo omosãingo hikuái ichupe kurusúre.
26Ha hembiapokue cáusa ojehai yvate: Júda retã ruvicha.
27Ha hendive oñemosãingo avei kurusúre mokõi mondaha; peteĩ ijakatúa gotýo ha ambue ijasu gotýo.
28Oiko hag̃ua pe ojehai háicha Ñanderuete ñe’ẽme: Mba’evai apoharekuéra ndive ojepapava’ekue ichupe, (Isaías 53,12).
29Ha umi upérupi ohasáva oñe’ẽ vai ichupe, ombovava iñakãnguéra ha he’i hikuái: Nde piko, pe reitypátava Ñanderuete rogaguasu ha mbohapy árape remopu’ãmba jevýtava.
30 Ejesalvána ndejupe, ha eguejy pe kurusúgui.
31Ha upéicha avei pa’i ruvichakuéra, kuatia haihára ndive oñembohory hese ha he’i hikuái: Osalva ambuekuérape, ha’e ojupe katu ndaikatúi ojesalva.
32Nde ramo pe Crísto, Israel retã ruvicha, eguejy ko’ág̃a nde kurusúgui ore rohecha ha rojerovia hag̃ua nderehe. Ha umi hendive osãingóva kurusúre oja’o avei ichupe.
Hesu omano33Ha og̃uahẽvo pe hóra 6-ha iñypytũmba yvy apére hóra 9-ha peve.
34Ha pe hóra 9-ha Hesu osapukái hatã ha he’i: Elói, elói, lama sabactani, he’iséva: Che Ruete, che Ruete, mba’érepa chereja cheaño.
35Ha umi upépe oĩva, ohendúvo pe ñe’ẽ he’i joa: Péina ohenói Elíaspe.
36Ha peteĩva ijapytépe oñani ha omyakỹ peteĩ espónja víno háipe, omoĩ takuára apýrare, ha ho’uka ichupe he’ívo: Tove, jahecha oúpa Elías omboguejy hag̃ua ichupe.
37Hesu katu osapukái hatãvo ojehekýi ha omano.
38Ha Ñanderuete rogaguasu pegua aopyguasu (cortína) osoro mbytépe, yvatégui yvy gotýo.
39Pe soldádo ruvicha oñembo’ýva Hesu renondépe, ohechávo mba’éichapa Hesu omano, he’i: Añete ningo, ko kuimba’e kóva Ñanderuete Ra’y ra’e.
40Oĩ avei kuñakuéra, oma’ẽvahína mombyry guive, ha ijapytepekuéra oĩ: María Magdalaygua, María, Jacóbo, pe michĩva, ha Jose sy, ha Salome.
41Ha’ekuéra, Hesu oiko ramoguare Galiléape, omoirũ ha oserviva’ekue ichupe. Ha heta ambue kuña ojupiva’ekue hendive Jerusalénpe.
Oñeñotĩ Hesu42Ha opaite ko’ã mba’e ojehu viérnes ka’aru pytũme, pe ára ñembosako’iha, péva ningo viérnes, peteĩ ára sábado arete mboyve,
43ou Jose, peteĩ Arimateaygua, kuimba’e heko potĩva ha peteĩ karai anciáno avei, oha’ãrõva Ñanderuete retã pu’aka ojehechauka hag̃ua, ha’e oho Piláto rendápe ha ojerure Hesu retekue rehe.
44Ha Piláto noha’ãrõi Hesu omano voieteha. Ha ohenoiuka pe soldádo ruvichápe ha oporandu ichupe arémapa omano hague Hesu.
45Ha oikuaapa rire pe mburuvicha jurúgui, ome’ẽuka Hesu retekue Josépe.
46Upérõ Jose omboguejy Hesu retekue pe kurusúgui, oñu’ãmba peteĩ savana ojoguaramóvape, ha omoĩ ichupe ityvýpe (isepultúrape) ojejo’ova’ekue itaguasúpe, ha ombyapajeréi peteĩ ita pohýi omboty hag̃ua pe tyvy (sepultúra) juru.
47Ha María, Magdalaygua, ha María, Jose sy, oma’ẽ moõitépa omoĩra’e Hesu retekue.
Who We AreWhat We EelieveWhat We Do
2025 by iamachristian.org,Inc All rights reserved.
