Jeremías 30 - Biblia en Guaraní - ?anderuete ?e’? Por? 2015

Jeremías oja’o rire hetãyguakuérape, omoangapyhy ichupekuéra

1Ñanderuete ñe’ẽ ou Jeremíaspe, ha he’i:

2Péicha oñe’ẽ pende Ruete, Israel Jára, ha he’i: Ehaíke peteĩ kuatiañe’ẽme opaite mba’e Che ha’eva’ekue guive ndéve.

3Eikuaa porãke outahína upe ára, he’i pende Ruete, aguerukapa jevýta che retã Israel ha Judayguakuérape Babilónia retãgui, ojegueraha haguégui jepokuapýpe, amoinge jevy hag̃ua ichupekuéra pe yvy ame’ẽva’ekue ituvakuérape, ha opyta jevýta imba’etee ramo ymaguaréicha.

4Ko’ã ñe’ẽ pende Ruete he’imava’ekue Israel ha Juda rehe.

5Péicha he’ive pende Ruete: Rohendúma okyhyjéva ha oñemondýiva sapukái, ndaha’éiva ipy’aguapýva sapukái.

6Peporandu randu ko’ág̃a ikatu piko peteĩ kuimba’e imemby; mba’érehe piko ahecha mayma kuimba’ekuéra ojeku’akua, peteĩ kuña imembypotávaicha, ha hova hesa’yjupa.

7Mba’eguasuete ningo upe ára upéva, ndaipóri ambue ára ombojojátava: Jacóbope g̃uarã jepy’apy vaiha ára; ha oñeguenohẽta katuete ichupe ijepy’apy vaígui.

8Upe ára upévape, he’i pende Ruete, Yvága Atykuéra Jára: Che amopẽta icangálla nde atúa árigui, ha amondohóta isãnguéra, ha umi tetã ambueygua ndoguerekoveimava’erã ichupekuéra hembiguaikuéra ramo,

9oikóta uvei hikuái pende Ruete, Ijára rembiguái ramo, ha oservíta hetã ruvicha Davídpe g̃uarã, Che amopu’ã jevýtava.

10Ha nde Jacóbo, che rembiguái, ani rekyhyjétei, he’i pende Ruete, ha nde Israel aníke rejepy’apyve, peikuaa porãke Che poguenohẽ jevytaha pe tetã mombyrýgui, peẽme ha pene ñemoñarenguérape, pe tetã peikohágui jepokuapýpe; ha Jacóbo ou jevyva’erã, opytu’u ha oikove hag̃ua py’aguapýpe ijyvyteépe ha ndokyhyjemo’ãvéima mba’evégui.

11Che aimégui penendive posalva hag̃ua, he’i pende Ruete; ha ahundipáta umi tetãme pomosarambi haguérupi; napohundimo’ãi, pohavirátante hekoitépe, ndapohejamo’ãi katu pohavira’ỹre peikuaa hag̃ua che ha’eha pende Ruete oikovéva.

12Péicha he’i pende Ruete: Naipohãi nde jepy’apy, ha hasyete ningo pende jekutukue.

13Ndaipóri avave oñangarekóva penderehe; ndaipóri peẽme g̃uarã pohã penemonguerátava.

14Pende rayhuharakuéra hesaraipa pendehegui, ndojeporekavéi penderehe, ku hapicha ija’e’ỹva rehe ojahéi háicha péicha Che ajaheiva’ekue penderehe, pohavirava’ekue, tuichaitereígui pene ñaña reko ha hetaitereígui pene rembiapo vai.

15Mba’upépa pesapukái pehasa asy haguére. Naipohãi pene rembiasa asy, pene ñaña reko ivaietereígui ha pene rembiapo vai hetaitereígui ajapo penderehe ko’ã mba’e ko’ãva.

16Ha opaite umi penemokõva oñemokõ jevýta; ha mayma umi oñemoĩva penderehe ohóta avei jepokuapýpe; umi opyrũva penderehe oñepyrũmba jevýta hesekuéra ha opaite omondava’ekue pene mba’ekuéra oñemondapa jevýta ichuguikuéra.

17Che katu amboukáta peẽme pene pohã ha amongueráta pende aikuéra, he’i pende Ruete, umi oñemoĩva penderehe he’i joáta: Kóva ningo Sion, ha avave noñangarekovéi hese.

18Péicha he’i pende Ruete: Péina ápe, Che amopu’ã jevýta Jacóbo róga, agueru jevývo ichupekuéra ijejopy vaígui, ha aiporiahuvereko jevýta hogakuéra ha itáva oñemopu’ãta oĩ haguépe, ha pe tetã ruvicha rogaguasu oñemopu’ã jevýta hendaguépe.

19Ha osẽva’erã ichuguikuéra ñemomba’eguasu purahéi, ha tetãyguakuéra vy’apópe ombopúta imbaraka; ha amboheta hetavéta ichupekuéra ha ha’ekuéra naimbovymo’ãi, ha ndojeapo’imo’ãi, Che namomirĩvéima ichupekuéra, Che katu amopu’ãta ichupekuéra ambue tetãnguéra apytépe.

20Ita’yrakuéra oiko jevýta ymaguaréicha, ha hetã ipoty jevýta che renondépe; ha ahaviráta opaite ijopyhakuérape.

21Ichuguikuéra osẽta herekua, ha ijapytégui osẽta hetã ruvicha; Che amog̃uahẽta ichupe che ypýpe, ha ha’e oñembojáta cherehe; máva piko ipy’aguasu ijehegui rei oñembohova’atã oñemboja hag̃ua cherehe, he’i pende Ruete.

22Ha peikóta che retã ramo, ha Che aikóta pende Jára ramo.

23Peikuaa porãke, pende Ruetégui osẽ yvytu pochyetéva; ha pe yvytu oñembosako’íva, oipejúta umi tekove ñaña akã rehe.

24Ndopamo’ãi Ñanderuete pochy ojapopa peve ipy’apýpe ojaposéva; ág̃a upe ára pahakuévo peikuaa porãta mba’épa he’ise ko’ã mba’e.