Ezequiel 24 - Biblia en Guaraní - ?anderuete ?e’? Por? 2015

Japepo ojeporúva ñembojoja ramo

1Ou chéve Ñanderuete ñe’ẽ pe áño 9-hápe, pe jasy 10-hápe ha pe ára 10-hápe, ha he’i:

2Kuimba’e ra’y, ehai kuatia rehe ko árape: Pe Babilónia retã ruvicha omongoráta Jerusalen ko ára kóvape.

3Ha eñe’ẽ ñe’ẽ mbojoja rupi upe óga oñemoĩva cherehe ha ere ichupekuéra: Péicha he’i pende Ruete: Embosako’i peteĩ japepo (ólla), ha emoĩ y ipype,

4emoĩ avei ipype so’o, so’o iporãitévante, hetyma poguasu ro’o ha ipaletakue, emyenyhẽ so’okangue poravopyrégui.

5Eru peteĩ ovecha iporãitéva, ha ejatapy iguýpe; eheja topupu porã; eheja tojy ikanguekue.

6Pende Ruete ningo he’i: Upéicha tojerereko pe táva oñohẽ reíva tuguy, ha pe japepo ndojepe’aiva’ekue ichugui imba’e ky’a (alúmbre); enohẽmba pe so’o pehẽngue reiporavo’ỹre.

7Pe tuguy oñeñohẽva’ekue oĩ gueteri ijapytépe, peteĩ ita isỹiva ári oñeñohẽva’ekue; noñohẽiri yvy apére ojaho’i hag̃ua yvyku’ípe.

8Okakuaa hag̃ua che pochy ha amyengovia hag̃ua ahejáma huguykue pe ita ári, ani hag̃ua ojejaho’ítei.

9Upévarehe pende Ruete he’i: Upéicha tojerereko upe táva oñohẽ reíva hapichakuéra ruguy, Che voi ajatapy tuicháta,

10amboheta hetavéta pe jepe’a, amyendy tuicháta pe tata hykupa hag̃ua pe so’o ha toiko so’o ku’i, ha umi so’okangue tokaipa.

11Uperire emboguapy pe japepo nandi pe tatapỹi ári, ha upépe ta’ipytã ha tokái, ha tahyku ichugui iky’akue, ha to’a ichugui iky’akue.

12Oñemba’apo rei, nosẽigui iky’akue. Tatápe jepe ndojeimo’ãvéima.

13Nde reko ky’a rupi reñehundíta, añeha’ãgui romopotĩ hag̃ua, ha nde nereñemopotĩséi nde reko ky’águi; upévare araka’evéma nereñemopotĩmo’ãvéi, ambogue peve che pochy nderehe.

14Che, pende Ruete, ha’emava’ekue guive ajapopáta avei. Ndaguevimo’ãvéi, ndaiporiahuverekomo’ãvéima ha nambyasymo’ãvéima; ambojovakéta hekoitépe nde rapekuéra ha ne rembiapokuéra, he’i pende Ruete.

Ezequiel rembireko omano

15Ou chéve Ñanderuete ñe’ẽ, ha he’i:

16Kuimba’e ra’y, eikuaa porãke, peteĩ sapy’aitépe aipe’áta ndehegui nde resa mbohoryhára; ani regueropurahéi ñe’ẽ asy, ani nerasẽ ha ani osyry nde resay.

17Ejoko ne mba’embyasy ha ekirirĩ, ani rembosako’i pe omanóva jahe’o, ejokua ne akã rehe ne akãhoja, ha emoĩ nde py rehe nde sapatukuéra, ha ani remokañy ne rendyva nde ahoja reheve, ha ani re’u imba’embyasýva pan ojeguerútava ndéve.

18Pe pyharevépe añe’ẽ che retãyguakuérape ha pe ka’aru omano che rembireko; ha ambue pyharevépe ajapopa oje’e haguéicha chéve.

19Upéramo he’i hikuái chéve: Nderehechaukamo’ãipa oréve mba’épa he’ise oréve g̃uarã ko’ã mba’e rejapóva.

20Ha che ha’e ichupekuéra: Ñanderuete ñe’ẽ ou chéve, ha he’i:

21Ere Israel rógape: Péicha he’i pende Ruete, peikuaa porãke, Che voi amongy’áta che rogaguasu, pévarupi peẽ peñembotuichaiterei, péva ningo pende resa mbohoryhára ha ombovy’áva pene ánga; ha pende ra’y ha pende rajy pehejava’ekue upépe, ho’apáta kyse puku rupi.

22Ha peẽ pejapóta che ajapo haguéicha; napemoĩmo’ãi pende ape rehe ahoja, ha ndape’umo’ãi pan mba’embyasy reheguáva.

23Ndapepytamo’ãi akã ha py nandi reheve, ha ndapepurahéi asymo’ãi ha ndapejahe’omo’ãi; ha pende reko vai penemokangypáta ha peẽ penepyahẽ asy joáta.

24Péicha Ezequiel opytáta peẽme g̃uarã techaukaha ramo; opaite mba’e ha’e ojapóva guive, peẽ pejapóta avei; ha ág̃a ojehúvo ko’ã mba’e, peikuaáta Che ha’eha pende Ruete, pe Jaraitéva.

25Ha nde, kuimba’e ra’y, eikuaa porãke, og̃uahẽtaha katuete pe ára Che voi aitýta che rogaguasu ombovy’áva ichupekuéra, iñembotuicha, hesakuéra mbohoryhára ha hi’ãnga ohayhuetéva, ha aipe’áta avei ichuguikuéra ita’ýra ha itajyrakuérape.

26Upe ára upévape oúta ne rendápe umi ikatúva okañy, ogueru hag̃ua ndéve ko marandu kóva.

27Upe ára upévape ojepe’a jevýta nde juru reñe’ẽkuaa hag̃ua umi okañyva’ekue ndive, ha naneñe’ẽngumo’ãvéita, ha nde reikóta ichupekuéra g̃uarã techaukaha ramo ha oikuaáta hikuái Che ha’eha pende Ruete.