Ésdras 5 - Biblia en Guaraní - ?anderuete ?e’? Por? 2015

Judayguakuéra oñepyrũ jevy omopu’ã hag̃ua Ñanderuete rogaguasu

1Hagéo ha Zacarías, Iddo ra’y, umi proféta, oñe’ẽ Judaygua ha Jerusalenguápe, Ñanderuete, Israel Jára rérape, omba’apo jevy hag̃ua Ñanderuete rogaguasúpe,

2upéramo Zorobabel, Sealtiel ra’y, ha Jesúa, Josadac ra’y, oñepyrũ omopu’ã jevy Ñanderuete rogaguasu Jerusalénpe; ha umi mokõi Ñanderuete proféta oipytyvõ ichupekuéra.

3Umi ára umívape ou hendapekuéra Tatnai, oisãmbyhýva pe ysyry Éufrates kuarahyreike gotýo ha Setar-boznai iñirũnguéra ndive, ha he’i Judayguakuérape: Máva piko he’i peẽme pemopu’ã hag̃ua ko óga kóva ha pemboyvate hag̃ua pe táva tápia.

4Ha oporandu avei hikuái: Mba’éicha piko umi kuimba’e réra omopu’ã jevýva pende Jára rogaguasu.

5Ñanderuete katu oñangareko umi Judayguakuéra rehe omopu’ãva Ñanderuete rogaguasu ha ndohejái Tatnai ojoko pe tembiapo, ou peve tetã ruvichaguasu Darío rembiapoukapy ojehaítava peteĩ kuatiañe’ẽme.

6Kóva ha’ehína pe kuatiañe’ẽ Tatnai, Setar-boznai ha iñirũnguéra, oisãmbyhýva ysyry Éufrates kuarahyreike gotýo, oguerahaukáva tetã ruvicha Daríope:

7Tetã ruvichaguasu Daríope taipy’aguapyete.

8Ore retã ruvichaguasu: Iporã ningo reikuaa roho hague Judéape, Israel Jára rogaguasúpe, oñemopu’ãvahína ita ndetuichávagui; ha avei umi yvyra oñemoĩma pe tápia rehe, ha pya’eiterei ojejapo pe tembiapo, ha oho porãmba ipoguypekuéra.

9Ha roporandúkuri umi tembiapo omyakãvape: Mávapa he’i peẽme pemopu’ã jevy hag̃ua ko óga ha avei ko táva tápia yvate.

10Ha roporandu avei herakuéra rehe, roikuaauka hag̃ua ndéve, ha roguerahauka hag̃ua ndéve pe kuatiañe’ẽ oĩháme umi omyakãva réra.

11Ha he’íkuri hikuái oréve péicha: Ore ningo Ñanderuete yvy ha yvagakuéra Jára rembiguái, ha romyatyrõroína ore Jára rogaguasu ymaitereíma peteĩ Israel retã ruvichaguasuete omopu’ãva’ekue.

12Ore rukuéra opoígui ore Ruete yvága peguágui, Ha’e ome’ẽ ichupekuéra Caldeaygua, Babilónia retã ruvichaguasu, Nabucodonosor poguýpe, ha ha’e ombyaipákuri ko óga ha ogueraha hetãyguakuérape jepokuapýpe Babilóniape.

13Ha Círo ojupiha áñope, Babilónia retã ruvichaguasu ramo, ha’e he’i oñemyatyrõ jevy hag̃ua ko Ñanderuete rogaguasu.

14Ha ome’ẽ jevy umi tembiporu óro ha plataguiguáva, Ñanderuete rogaguasu peguáva, Nabucodonosor oguerahapava’ekue ha omoinge itupãópe, Babilónia retãme, umi tembiporu umíva omoĩmbákuri Sesbasar pópe, ichupe oñemoĩgui Juda sãmbyhyhára ramo;

15ha he’i ichupe: Eraha ko’ã tembiporu Jerusalen pegua yvága Jára rogaguasúpe ha pemopu’ã jevy pende Ruete rogaguasu oĩ haguépe.

16Ha Sesbasar omoĩ Ñanderuete róga rapo Jerusalénpe, ha upe ára guive ko’ag̃aite peve oñemopu’ãhína ko ogaguasu, ha ne’ĩra gueteri ojejapopa.

17Ha oĩ porã ramo tetã ruvichaguasúpe, tojeheka pe kuatiañe’ẽ tetã ruvichaguasu rógape, Babilónia retãme, pe óga mba’erepyeta oñeñongatuhápe. Ohecha hag̃ua pe tetã ruvichaguasu Círopa he’íra’e oñemopu’ã jevy hag̃ua ko Ñanderuete rogaguasu Jerusalénpe térãpa nahániri, ha upéi tojekuaauka oréve mba’épa he’íra’e tetã ruvichaguasu ko’ã mba’e rehe.