1Nde, ore Ruete, anína reime kirirĩháme, ani rekirirĩ ha ani repytu’útei.
2Ema’ẽmína okororõ joa umi nderehe ija’e’ỹva, ha umi nderayhu’ỹva opu’ãmba nderehe.
3Ne retã rehe oñemongeta hikuái ñemiháme, ha oñemoĩse hikuái umi Nde reipytyvõva rehe.
4He’i voi hikuái: Peju ha ñahundi ichupekuéra ani hag̃ua oikove tetã ramo, ha anivéma hag̃ua oiko mandu’a Israel réra rehe.
5Oñemoĩmbáma peteĩ ñe’ẽme, opu’ã hag̃ua nderehe oikéma hikuái peteĩ ñemoirũme:
6Umi Edom ha Ismael rogakuéra, Moab ha umi Agar ñemoñare,
7umi Gebal, Amon, Amalec ñemoñarenguéra, Filisteaygua ha umi Tiroygua,
8ha avei umi Asiriaygua oñemoĩ hendivekuéra, oiko hag̃ua umi Lot ra’yrekuérape g̃uarã ijyva mbarete ramo. Selah
9Ejapo hesekuéra ku Madian rehe, Sísara ha Jabin rehe rejapo haguéicha Cison ysyrýpe.
10Omanombava’ekue Endor rendápe, ha umi hetekue oiko abóno ramo yvýpe g̃uarã.
11Ejapo imburuvichakuéra rehe rejapo haguéicha Oreb ha Zeeb rehe, ha avei Zeba ha Zalmuna ruvichakuéra rehe.
12He’i haguére hikuái: Topyta ñane mba’ete ramo Ñanderuete ñunguéra.
13Nde, che Ruete, toiko hikuái ku yvyra rogue pirukuéicha yvytu atãme ha ku kapi’i pirukuéicha yvytu jepokápe.
14Ku tatáicha ohapýva ka’aguy, ku tata rendýicha oñu’ãva cerrorusu,
15péicha emuña ichupekuéra nde yvytu atã rupi, ha emongyhyje ichupekuéra nde kusuviru’ũ rupi.
16Nde, che Ruete, toñemotĩete hikuái, toñepyrũ toheka avei nde réra.
17Toñemotĩ ha toñemondýi hikuái opaite árape, toñemombe’u vaipa hikuái ha tomano.
18Ha toikuaa hikuái Nde ha’eha Ñanderuete, Nde añoiteha pe Jára Ijyvatevéva oĩva ko yvy apéregui.
Who We AreWhat We EelieveWhat We Do
2025 by iamachristian.org,Inc All rights reserved.
