2 Corintoyguakuérape 11 - Biblia en Guaraní - ?anderuete ?e’? Por? 2015

Páblo, peteĩ apóstol

añeteguáva, oñemoĩ umi apóstol

gua’úre

1Mba’éicha tamora’e pehechakuaa che reko tarovamiha, ajépa peẽ peropu’akapáta che ha’étava guive ko’ág̃a.

2Cherakate’ỹ ningo penderehe Ñanderuete rakate’ỹ reheve, che pomomenda peteĩ kuñataĩ imarã’ỹvaicha peteĩ ména rehe año: Hesu Crísto rehe.

3Akyhyje ningo ku mbói ombotavy haguéicha Évape, péicha pe mbói ombotavymo’ãma avei pene pensamientokuérape, pejei hag̃ua Hesu Crísto reko potĩgui, pejapyhy hag̃ua Satana reko ky’a.

4Ou ramo pene rendápe peteĩ omombe’úva peẽme ambue Hesu, peẽ pehendu’ỹva ore jurúgui, peẽ pehendu porã avei ichupe, térãpa ou ramo pene rendápe peteĩ oguerúva ambue pytu ndaha’éiva pe Pytu Porãmbáva oñeme’ẽmava’ekue peẽme, peẽ peipe’a avei ichupe g̃uarã pende py’apýgui; térãpa og̃uahẽ ramo pene rendápe peteĩ omyasãiva ambue evangélio, ndaha’éiva ore romombe’u haguéicha peẽme, peẽ pehenduse avei.

5Chéverõ g̃uarã katu che nachemichĩvéi umi ambue apostolkuéra og̃uahẽva guive pene rendápe ha oñemomba’eguasuetereívagui.

6Che ndachekatupyrýi ramojepe che ñe’ẽme (ha’ekuéraicha), chekatupyry katu pe kuaapy arandu (entendimiénto) oñeme’ẽmava’ekue chéve, ha ahechaukamava’ekue peẽme opaite mba’épe.

7Térã piko añemohembiapo vai, añemomirĩ haguére peẽ peñembotuichave hag̃ua, ha amombe’u rei haguére peẽme Ñanderuete ñe’ẽ porãite.

8Ambue Hesu Crísto iglésia ome’ẽ chéve pirapire amba’apo hag̃ua pende apytépe.

9Ha aime ramoguare pende apytépe Macedónia pegua hermanokuéra chepytyvõ che remikotevẽme, ani hag̃ua chepohýikuri peẽme ha ndachepohyiséi mba’evépe che renonderãme peẽme.

10Hesu Crísto oiko háicha chepype, peichaite Greciayguakuéra ndoipe’amo’ãi chehegui pe terakuã porã che arekóva.

11Mba’érehepa péva, ndapohayhúigui piko. Nahániri, Ñanderuete oikuaa porã voi che pohayhuha.

12Pe che ajapova’ekue ko’ág̃a peve ajapovéta avei che renonderãme, amboty hag̃ua umi cherehe oñemoĩva juru, ha oñembotuicha reíva, openságui ha’ekuéra apóstol porãha oréicha.

13Ha’ekuéra ningo apóstol gua’u ha mba’apohára japu, ha’ekuérante ningo oñemoĩ ojupe Hesu Crísto apóstol ramo.

14Ha péva ningo ndaipóri mba’érehepa jahecharamo hag̃ua, Satana voi omoambuéma hete, ojehechauka hag̃ua peteĩ ángel omimbipáva ramo.

15Upévare ningo namba’eguasuvéi Satana rembiguaikuéra, omoambue ramo jepe heko ha ijepokuaa. Pe ára pahápe oñemyengoviapáta ichupekuéra hembiapokuéra ojerure háicha.

16Ha’e jevy ani hag̃ua avave oimo’ã chetarovaha; opáichavo chemog̃uahẽmínte itarovávaicha, ajejapo hag̃ua michĩvéva ramo.

17Umi mba’e añe’ẽtava ningo nañe’ẽi Hesu Crísto he’iukágui chéve, añe’ẽ uvei itarovávaicha, ajejapo hag̃ua.

18Heta oĩgui ojererovúva ikuimba’e rete rembipota vai rupi, che ajererovuse avei michĩmínte jepe.

19Peẽ pende py’aite guive pehenduse voi umi itarovávape, peẽ peimo’ãgui penearanduha.

20Peẽ ningo peikose voi hembiguaikuéra ramo, ha’ekuéra penemokõrõ jepe, ha’ekuéra oñemomba’érõ jepe penderehe, ha’ekuéra oñembotuichárõ jepe, ha’ekuéra pende rovapetérõ jepe.

21Atĩ ramo jepe ha’e hag̃ua orekangyetereiha rojapo hag̃ua umi mba’e penderehe, ha’ekuéra oñembopy’aguasúgui che añembopy’aguasuse avei, ko mba’e kóva katu che añe’ẽ itarovávaicha:

22Ha’ekuéra hebréo, che avei. Ha’ekuéra Israelgua, che avei. Ha’ekuéra Abraham ñemoñarenguéra, che avei.

23Ha’ekuéra piko Hesu Crísto rembiguái, chéma katu hetave, añe’ẽ ramojepe itarovávaicha ko’ã ñe’ẽ ko’ãvare, amba’apo pohyive ichuguikuéra, hetave ára ahasa cárcelpe, hetave añembuepoti, hetave jevy ahasa asy amano hag̃uáicha.

24Judayguakuéra chenupã vai 5 jevy, oitývo che retére meme jevy 39 teju ruguái.

25Mbohapy jevy chenupã vai yvyra po’ípe, peteĩ jevy oity itakuéra che retére chejuka hag̃uáicha, mbohapy jevy ho’yguy pe barcoguasu che ahahápe, peteĩ pyhare ha peteĩ ára pukukue ahasa yguasu mbytépe.

26 Aviaja aja ahasa heta pelígro: Ysyrykuéra rupi, mondahakuéra apytépe, che retãyguakuéra voi rupi, tetã ambueyguakuéra rupi, tavakuérape, desiértope, yguasu apére, ñane hermáno gua’ukuéra apytépe,

27heta tembiapo ha jehasa asýpe, heta kera’ỹme, ñembyahýi ha y’uhéipe, heta jevy che ndakarúi, chero’y ha cheopivova’ekue.

28Opaite ko’ã mba’e ári chejopy avei umi mba’e oúva ko’ẽ ko’ẽre che’ári ha avei ajepy’apy Hesu Crísto iglesiakuéra rehe.

29Máva piko hasy ha che ndacherasýi avei. Máva piko ho’a tembiapo vaípe ha che nañembyasyiete.

30Tekotevẽtarõ ajererovu, ajererovuse che kangykuépe.

31Ñandejára Hesu Crísto Ru, toñemomba’eguasu opaite ára atyguasukuérape, Ha’e ningo oikuaa porã che ndachejapuiha.

32Pe táva Damásco ruvicha, oĩva pe tetã ruvicha Arétas poguýpe, chejapyhyukaseva’ekue,

33chemboguejy katu hikuái peteĩ ajakaguasúpe pe táva tapiakua rupi, che akañy hag̃ua ipoguyguikuéra.