Éxodo 34 - Biblia en Guaraní - ?anderuete ?e’? Por? 2015

Oñombopy’apeteĩ jevy

1Ha Ñanderuete he’i Moiséspe: Embosako’i mokõi ita ipéva umi tenondeguaréicha, ha ahaíta umi ita rehe umi ñe’ẽ oĩva’ekue umi ita tenondeguáva rehe, nde rejokava’ekue.

2Eñembosako’i ko’ẽ ramo g̃uarã ha pyhareve ejupi Sinai cérrope ha eñemboja che rendápe pe cérro ru’ãme.

3Anítei avave ojupi nendive ha anítei ojehecha avavépe pe cérro rupi; ovecha ha vakakuéra aníke oiko okaru pe cérro renonde rupi.

4Ha Moises ombosako’i mokõi itape umi tenondeguaréicha; ha opu’ã pyharevete ojupi hag̃ua Sinai cérrope, Ñanderuete he’i haguéicha ichupe, ha ogueraha ipópe umi mokõi itape.

5Ha Ñanderuete oguejy peteĩ arai reheve ha Moises oĩ hendive upépe, ha omomba’eguasu Jahvépe.

6Ha Ñanderuete ohasávo henonderã rupi, Ha’e he’i: Jahve, Jahve, imbaretéva, oporoporiahuverekóva ha ipy’aporãva, hasy ipochy hag̃ua, tuicha iporiahuvereko ha nopyrũiva iñe’ẽ ome’ẽva’ekue rehe.

7Ha’e oiporiahuvereko 1000 kuimba’e ñemoñare rekove pukukue peve ha operdona tapichakuéra rembiapo vai ndohejái ohavira’ỹre katu umi oñemoĩvape hese, Ha’e ohavira uvei tuvakuéra rembiapo vai ita’ýra ra’y jevy peve, mbohapy térã irundy iñemoñare (generaciónes) rekove peve.

8Upéramo Moises pya’e oñakãity yvy rehe ha oñembo’e ichupe,

9he’ívo: Che Jára, ajohu ramo py’aporã nde resa renondépe, terehomína orendive Nde ha’égui ore Jára; umi tetãygua ningo iñakã porã’ỹva voi; eperdona ore reko vai ha ore angaipa, orerereko ne mba’eteéva ramo.

10Ha Ñanderuete he’i jevy ichupe: Eikuaa porãke, che ame’ẽma che ñe’ẽ opaite ne retãygua renondépe; ha ajapóta milagrokuéra ndojejapoíva gueteri yvy apére, mba’eveichagua tetãme ha opaite ne retãygua ohecháta pende Jára rembiapo; umíva pa’ũme, nde reikohápe, tuichaite milágro Che ajapóta nderupi.

Ñanderuete he’i ani hag̃ua omomba’eguasu hikuái Canaan jára ra’ãngakuérape

11Ejapóke Che ha’éva guive ndéve ko árape; ha ema’ẽ porã, Che amosẽta ne renonderãgui Amorgua, Canaangua, Hetgua, Ferezgua, Hevgua ha Jebusguakuérape.

12Eñangarekóke ndejehe ani hag̃ua peñembopy’apeteĩ umi tetãyguakuéra ndive nde reikotahápe, ani hag̃ua ha’ekuéra oiko pende apytépe ñepysãngarã ramo.

13Eitypa katu ikuave’ẽmby rendakuéra, ejokapa umi tete ra’ãngakuéra ha ehundi umi Asera (ijára) ra’ãngakuéra.

14Neremomba’eguasuiva’erã mba’eveichagua jára ambuépe. Jahve, pende Ruete, hakate’ỹ héra rehe, Ha’e ningo hakate’ỹhína héra rehe.

15Upévagui ani peñemopeteĩ umi Canaangua ndive; ha’ekuéra oñemongy’áma ijára kuave’ẽmby rupi ha peẽ peho ramo ha pekaru hendivekuéra peñemongy’áta avei.

16Ha pemomenda ramo pende ra’ykuéra itajyrakuéra rehe, itajýra ogueraháta pende ra’ykuérape ijára gua’u rendápe omomba’eguasu hag̃ua ichupekuéra.

17Nderejapoiva’erã nde jára ra’ãnga hykupyrévagui.

Aretekuéra

18Pe arete pan ñembovu’ỹva rehegua pemboareteva’erã 7 ára pukukue ha umi ára aja pe’uva’erã pan oñembovu’ỹva; Che ha’e haguéicha ndéve, pemboareteva’erã abril jasýpe; abril jave pesẽva’ekuégui avei Egípto retãgui.

19Opaite pende ra’y ijypýva guive che mba’e; ha ne rymbakuéra ijypýva avei che mba’e, taha’e tóro ra’y térã ovecha ra’y, máchova guive.

20Ha remyengoviáta búrro ra’y ijypýva ovecha ra’yrusu rehe; ha neremyengoviakuaái ramo, emopẽ ijajúra. Remyengoviava’erã opaite nde ra’ykuéra ijypýva; ha avave noñembojaiva’erã che renondépe po nandi rehevénte.

21 Seis ára remba’apova’erã, pe ára 7-hápe katu repytu’uva’erã; yvy jo’o rembiapógui ha ñemitỹ mono’õgui jepe repytu’uva’erã.

22Remboareteva’erã: Semanakuéra arete, pe trígo ñemono’õ ñepyrũ arete, ha pe ñemono’õ arete pembyatypa rire pende kóga’a peáño pahápe.

23Peteĩáñope mbohapy jevy oñembojava’erã mayma kuimba’ekuéra Jahve, Israel Jára renondépe.

24Che amosẽta umi tetãnguérape ne renonderãgui ha ambotuichavéta ne retã yvy ha avave ndoipotamo’ãi nde yvy nde rejupi jave reñemoĩ hag̃ua pende Ruete renondépe mbohapy jevy opaite áñope.

25Nereikuave’ẽiva’erã chéve mba’eve oñembovupyréva che kuave’ẽmby ruguykue reheve ha ndojehejaiva’erã ko’ẽrõ peve mba’eve pe arete páscua pegua oñekuave’ẽva’ekuégui.

26Umi nde kóga’a ijypy porãvévagui regueruva’erã pende Ruetépe, pende Jára rógape. Neremomimoiriva’erã pe kavara ra’y isy kambykuépe.

Ñanderuete ohai jevy umi 10 tembiapoukapy

27Ha Ñanderuete he’i Moiséspe: Ehai ko’ã ñe’ẽ; ko’ã ñe’ẽ rupi añembopy’apeteĩma nendive ha Israelguakuéra ndive.

28Ha Moises opyta jevy Ñanderuete ndive 40 ára ha 40 pyhare; Moises ndo’úi pan ni ndoy’úi mba’eve; ha ohai ita ipéva rehe pe ñe’ẽme’ẽ rehegua ñe’ẽ, umi 10 tembiapoukapy.

29Ha ojehu Moises oguejývo Sinai cérrogui umi mokõi itape tembiapoukapy reheguáva reheve ipópe, péina hova omimbi oñe’ẽgui Ñanderuete ndive, ha’e katu ndoikuaái péva.

30Aaron ha opaite Israel ñemoñarenguéra oma’ẽ joa Moises rehe, ha péina hova pire omimbi; ha okyhyje hikuái oñemboja hag̃ua hese.

31Upéramo Moises ohenói ichupekuéra; Aaron ha umi karai anciáno oupa hag̃ua hendápe ha Moises oñe’ẽ ichupekuéra.

32Upéi oñemboja opaite Israel ñemoñarenguéra ha ha’e he’i ichupekuéra ojapo hag̃ua opaite mba’e Ñanderuete he’iva’ekue guive ichupekuéra Sinai cérrope.

33Ha Moises oñe’ẽmba rire hendivekuéra oñu’ã hova ao pehẽnguépe.

34Ha oho jevýrõ Ñanderuete rendápe oñe’ẽ hag̃ua hendive, oipe’a ijao pehẽngue osẽ jevy peve; ha osẽ rire omombe’upa Israel ñemoñarenguérape umi mba’e Ha’e he’íva guive ichupe, ha ha’ekuéra ojapova’erãva.

35Ha Israel ñemoñarenguéra oma’ẽvo Moises rova rehe, ohecha hikuái hova pire omimbipa; ha Moises omoĩ jevy ijao pehẽngue hova rehe, oike jevy peve oñe’ẽ hag̃ua Ñanderuete ndive.