1 Réyes 7 - Biblia en Guaraní - ?anderuete ?e’? Por? 2015

Ambue óga Salomón mba’éva

1Upéi Salomon omopu’ã hogateerã, ha ojejapopaite 13 áñope.

2Upéicha avei omopu’ã óga Líbano ka’aguy peguáva, ipukúva 43,75 métro, ipýva 21,87 métro, ijyvate 13,12 métro, irundy horcon rysýi ári, ha ivigakuéra cédrogui.

3Ha umi víga oguapy 45 horcon ári, peteĩteĩ hysýipe ija 15 horcon, ha hi’ári omboguapy hikuái pe técho cedroguigua.

4Ha oĩ avei mbohapy hovetã rysýi; peteĩ hovetã ambue rovái, mbohapy tysýipe.

5Opaite okẽ ha umi horcon ojeporúva okẽnguérape g̃uarã ojejapo yvyra irundy yke (4 cánto) reheve, ha umi ovetã opyta ojovaipa mbohapy tysýipe.

6Ojapo avei peteĩ ogaguyguasu horcóngui, ipukúva 21,87 métro, ha ipy 13,12 métro, ha ko ogaguyguasu renondépe ojejapo ambue ogaguy michĩva ha peteĩ escaléra oike hag̃ua.

7Upéi Salomón omopu’ã peteĩ ogaguasu iguapyhaguasúpe g̃uarã, ombojovake hag̃ua. Itapiakuéra oñu’ã cédrope yvy guive técho peve.

8Ha pe korapýpe, hóga oĩha, ha’e oikohápe, ojejapo ambue ogaguasu peichagua. Salomón omopu’ã avei faraon rajýpe g̃uarã, ha’e oñemohembireko hague, peteĩ ogaguasu ojoguáva ko’ãvape.

9Mayma óga oñemopu’ã ita hepývagui, oñekytĩva’ekue siérrape hyepýguio ha okáguio, ha oñembojo’a ija hag̃uaichaite, iguy guive yvate peve, pe korapyguasu peve.

10Ipyendakuéra ojejapo ita tuicháva reheve, oha’ãva 4,37 métro ha 3,5 métro.

11Hi’ári oñemopu’ã ita hepýva, oñemba’apova’ekue hese oja hag̃uaichaite, ha hi’ári oñemoĩ yvyra cédro.

12Ha pe korapyguasu jerekuévo oĩ mbohapy ita ñemba’apopyréva rysýi, ha peteĩ víga cedroguiguáva rysýi, upéicha ojejapo avei Ñanderuete róga korapy, ha Salomón róga korapy.

Salomón omomba’apo hepy rehe Hiram, Tíro peguápe

13Uperire tetã ruvicha Salomón omondo hembiguaikuérape ogueru hag̃ua Hirámpe, Tírogui.

14Kóva peteĩ Neftali kuña imenave’ỹmava memby. Itúva peteĩ Tiroygua, ha’e omba’apo porãite brónce rehe. Hiram iñarandu, ikatupyry ha oikuaa opaite mba’e omba’apo hag̃ua brónce reheve. Kóa ou tetã ruvicha Salomón rendápe, ha ojapo opaichagua tembiapo ichupe g̃uarã.

15Ha’e ojapo mokõi horconguasu bróncegui, hyepy inandíva, mokõivéva ijyvate 7,87 métro, ha pe inimbo oha’ã hag̃ua ombojeréva hese ipuku 5,25 métro.

16Ojapo avei mokõi iñakã brónce ñemboykupyrégui, oñemoĩ hag̃ua umi horconguasu ári, mokõivéva ijyvate 2,18 métro.

17Ojapo avei siéte mba’e jegua peteĩteĩme g̃uarã ojoguáva mba’e ojepyahapyrévape ojejapova’ekue sãgui, ojoguáva cadénape.

18Ojapo avei mokõi tysýi yva granáda ra’ãnga pe kyha rehe, ombojere hag̃ua umi mokõi horconguasu akã jegua rehe.

19Umi iñakã rehe oĩva umi horconguasu ári ojejapo lírio (yvoty) ra’ãnga, ha ijyvatekue 1,75 métro ijerekuévo.

20Umi horconguasu akã jerekuévo pe yvatehápe, oñemoĩ 200 granáda yva ra’ãnga mokõi tysýipe.

21Koã horconoñemopu’ã Ñanderuete rogaguyguasu renondépe, ha peteĩ oñemohenda akatúa gotýo ha héra Jaquin, (he’ise: Ha’e omohenda mbarete), ha pe ambue oñemohenda asu gotýo ha héra Boaz (he’ise: Hendive oĩ pu’aka).

22Pe horconguasu akã ojogua lírio yvotýpe, upéicha ojejapopa ko’ã horconguasu rembiapo.

Ñanderuete rogaguasu rembiporukuéra

23Hiram ojapo avei peteĩ yryruguasu ijapuava bronce ñemboykupyrégui, 4,37 métro ituicha peteĩ hembe’ýgui ambue hembe’y peve, ijyvate 2,18 métro, ha hembe’y jerekuévo oha’ã 13,12 métro.

24Ha pe yryruguasu rembe’yguy rehe ombojere mba’e apu’a hy’aichaguáva, 10 hy’a oimeraẽva oha’ãva 0,43 métro ha ojáva pe yryruguasu tápia jerekue rehe, mokõi hy’a rysýi, ko’ãva oñembohykuva’ekue ojejapóvo pe yryruguasu.

25Ko yryruguasuete oguapy 12 tóro ra’ãnga ári, mbohapy oma’ẽ yvate gotýo, mbohapy oma’ẽ kuarahyreike gotýo, mbohapy oma’ẽ yvy gotýo ha mbohapy oma’ẽ kuarahyresẽ gotýo, humbykuéra opyta hyepy gotýo ha hi’ári oguapy pe yryruguasu.

26Pe yryruguasu tápia iñanambusu 7,6 centímetro, ha hembe’y ojogua peteĩ lírio poty rembe’ýpe, ha ija ipype 44.000 lítro y.

27Ojapo avei 10tachoguasuete bróncegui, ipukúva 1,75 métro, ipy 1,75 métro ha ijyvate 1,31 métro.

28Ko’ãtachoguasuete jerekuévo oĩ mba’e ojoguáva listónpe.

29Ha ko’ã mba’ére, ojoguáva listónpe, oñemoĩ leõ, tóro ha querubin ra’ãnga; ko’ã liston ári ha iguýpe oñembojegua yvoty apesã ra’ãngápe.

30Umitachoguasuete peteĩteĩ oguapy peteĩ cárro ári oguerekóva éje (ehe) ha ruéda bronceguiguáva, ha pe tachoguasuete oguapy irundy pyenda ári, oñembojeguapáva.

31Pecárro mbytégui osẽ peteĩ mba’e yvate ojoguáva peteĩ ajúrape, ha ko ajúra apýra yvatépe oĩ peteĩ kuára ijapu’áva ha ipekue oha’ã 65 centímetro ipype, oñemboguapy hag̃ua petachoguasuete ha oike hag̃ua 45 centímetro, ha pe ajúra tápia rehe oĩ avei jeguaita.

32Umi irundy ruéda oĩ petachoguasuete liston guýpe ha oja pe pyenda rehe, umi ruéda ijyvatekue 65 centímetro.

33 Iruéda ojogua cárro ruédape, hi’éje, illánta ha irájo (ráyo) ojejapopa bróncegui.

34Ipyenda rehe oĩ irundy jyva peteĩteĩ osẽva hakãmbýgui.

35Ha pe pyenda ijyvatevehápe oĩ peteĩ mba’e apu’a, ijyvate 21 centímetro ha ko mba’e apu’a ru’ãgui osẽ umi mba’e ojokóva pe tachoguasuete.

36Ha ko mba’e apu’a tápia jerekuévo oñembojegua, querubin, leõ, karanda’y ra’ãngakuéragui ija háicha.

37Péicha ojejapo 10 cárro umi 10 tachoguasuetépe g̃uarã, brónce ñemboykupyrégui, peteĩcha ojejapo ituichakue ha peteĩcha avei ijeguaka.

38Ojejapo ko’ã 10tachoguasuete bróncegui, ha peteĩteĩme ija 880 lítro ha peteĩteĩva ituicha 1,75 métro, ha oñemohenda umi 10 tachoguasuete umi 10 cárro ári.

39Ha omoĩ 5tachoguasuete Ñanderuete rogaguasu akatúa gotýo, ha ambue 5 tácho ijasu gotýo. Ha pe yryruguasu omoĩ hikuái Ñanderuete róga akatúape kuarahyresẽ, sur gotýomi.

40Hiram ojapo avei japepokuéra (ólla), palakuéra, vasoguasukuéra ohypýi hag̃ua. Péicha opa Hiram rembiapo Ñanderuete rogaguasúpe g̃uarã, tetã ruvicha Salomón ome’ẽva’ekue ichupe.

41Ko’ãva Hiram rembiapo: Mokõi horconguasu, mokõi iñakã reheve ha mokõi mba’ejegua ojoguáva kyhápe, oñemoĩva umi horconguasu akã jerekuévo;

42ha ko mba’ejegua oguereko 400granáda yva peteĩteĩ kyhápe g̃uarã, mokõi tysýipe ombojegua hag̃ua umi mokõi horconguasu akã jerekuévo;

43ha 10 cárro umi 10 tachoguasuetépe g̃uarã.

44Peteĩ yryruguasuete, 12 tóro ra’ãnga iguypegua reheve,

45japepokuéra, pala’ikuéra ha vasoguasukuéra. Opaite ko’ã tembiporu Hiram ojapo tetã ruvicha Salomónpe, Ñanderuete rógape g̃uarã, ha ojejapopa ko’ã mba’e brónce ñemboverapyrégui.

46Ko’ã mba’e tetã ruvicha ombohykuka Jordan ñúme ñay’ũ oĩháme, Sucot ha Saretan pa’ũme.

47Ha Salomón noha’ãi pe brónce oiporuva’ekue, hetaitereígui.

48Upéi Salomón ojapouka ambue tembiporukuéra Ñanderuete rogaguasúpe g̃uarã: Peteĩ kuave’ẽmby renda oroguiguáva, peteĩ mesa oroguiguáva, hi’ári oñemoĩ hag̃ua umi pan ojehechaukáva Ñanderuete renondépe g̃uarã,

49 diez tataindyenda oroguiguáva oñemoĩ pe Ñanderuete róga kotyguasúpe, oñemboykéva Ñanderuetépe ha pa’iguasúpe g̃uarã, 5 akatúa gotýo ha 5 asu gotýo, Ñanderuete kotyguasu rovái, umi yvoty, tataindyenda ha itenáza oroguiguáva reheve,

50ña’ẽnguéra, ijetapakuéra, vasokuéra, cucharakuéra, umi mba’yru myatatĩha oroguiguáva, haórogui ojejapo avei umi viságra ojeporúva umi mokõi Ñanderuete róga kotyguasu rokẽ rehe g̃uarã.

51Péicha opa tetã ruvicha Salomón rembiapo Ñanderuete rógape g̃uarã. Ha Salomón omoinge Ñanderuete rógape pe pláta, pe óro ha umi tembiporu itúva David ombyatymava’ekue.