1Ñanderuete ñe’ẽ ou chéve ha he’i:
2Tereho ha esapukái Jerusalengua apysápe, ha ere: Péicha he’i pende Ruete: Chemandu’a nderehe, ne kuñataĩ ramoguare reikómi hekoitépe che rapykuéri, ha che rembirekorã arakuépe cherayhu porã hague, ha reju chendive pe desiértope, pe yvy oñeñemitỹ’ỹháme mba’eve.
3Upérõ Israel oñemboheko potĩ Ijárape g̃uarã ku koga’a ypykuéicha; oimeraẽ oñemoĩmava’ekue Ijára rehe ohasa asy ha mba’evai oúmava’ekue hi’arikuéra, he’i pende Ruete.
4Jacóbo rogaygua ha mayma Israel retãygua pehendúke pende Ruete ñe’ẽ.
5Péicha he’i pende Ruete: Mba’eichagua mba’evai piko ojohúra’e pende rukuéra oñemomombyrýgui chehegui oho hag̃ua ambue jára gua’ukuéra rapykuéri, umía ndaha’éi mba’eve ha ha’ekuéra ndojohúi pe pytyvõ oha’arõva’ekue.
6Ha nde’íri hikuái: Mamo piko oime Ñanderuete ñaneguenohẽva’ekue Egípto retãgui, ñanesãmbyhyva’ekue desiérto rupi, peteĩ yvy nandípe, avave oiko’ỹha rupi, yvy ipiru ha iñypytũva, peteĩ yvy ojeiko’ỹha, ni avave ndoikoihápe.
7Ha Che pomoingeva’ekue yvy porãme, pe’u hag̃ua hi’akue ha opaite mba’eporã amongakuaava’ekue peẽme; peẽ katu peike ha pemongy’apa che yvy, ha che mba’eteégui pejapo mba’e ky’a oporombojoguarúva.
8Umi pa’i nde’íri: Mamo piko oime Ñanderuete. Umi che rembiapoukapy rerekua voi opu’ãmba cherehe, ha umi proféta katu omomarandu (oprofetiza) Baal rérape, ha oikova’ekue hikuái ambue jára gua’u rapykuéri, oipytyvõkuaa’ỹva avavépe.
9Upévare Che pombojovakéta, he’i pende Ruete, ha pende ra’ykuéra ra’yre jevy ndive añorãirõta.
10Tapehomína Chípre rembe’ýpe ha pema’ẽ porã opaite mba’ére; pemondo Cedárpe, pejesareko ha pema’ẽ porãke ojejapopa ko’ã mba’e ijapytépe, ojejapo haguéicha pende apytépe.
11Oĩ nga’u piko tetã omyengoviáva ijarakuéra, umía ndaha’éi ramojepe jára añeteguáva. Che retã katu omyengovia Ijaratee reko jajaipáva ambue jára gua’u rehehápe, ojapokuaa’ỹva mba’eve rehe.
12Yvagakuéra peñemondýike ko’ã mba’e rehe, ha pekyhyje, pejepy’apýke, he’i pende Ruete.
13Ko che retã ningo ojapo mokõi mba’e ivaietereíva: Opoi chehegui, pe yvu oikovévagui, ojo’o hag̃ua hi’yendag̃ua (cistérna) soropáva, ojoko’ỹva pe y.
14Israel piko peteĩ tembiguái térã tembiguái ra’yre. Mba’érehe piko upéicha ramo ojegueraha ichupe tembiguái ramo ambue tetãme.
15Umi leõ ra’yrusu okororõ ichupekuéra, osapukái ha ombotapere ijyvykuéra; ojehapypa itavakuéra, avave ndoikovéima ipype.
16Ha Ménfis ha Táfnes ra’ykuéra jepeve nemoakãperõta.
17Ko’ã mba’e ojehu ndéve nde repoi rei haguére nde Ruete, nde Járagui, nemboguataséva tape porã rehe.
18Ma’erãpa rehose Egíptope rey’u hag̃ua Nílo pegua y, térã ma’erãpa rehose Asíriape rey’u hag̃ua Éufrates pegua y.
19Ne rembiapo vaikue nenupãta ha reñemoĩ haguére nde Ruete rehe Che rohaviráta; ejepy’amongeta porãke ha rehecha porãta mba’eichaitépa ivai ha irova’erã nde rekove repoi haguére nde Ruete, nde Járagui, rekyhyje’ỹre, he’i nde Ruete, pe yvága atykuéra Jára.
20Hetaite árama ohasa, remopẽ hague nde cangálla ha remondoho ne sã, ha ereva’ekue: Ndaikomo’ãvéi Ñanderuete rembiguái ramo; mayma cérro ári ha yvyraguasu iporãva guýpe rejeity ku kuña reko vaícha (remomba’eguasu hag̃ua ambue járape).
21Che voi roñotỹva’ekue parral poravopyréicha, opaite parral iporãvéva apytégui; ha mba’éicha rupípa oiko ndehegui parral hoky ambuéva.
22Jepémo reñemopotĩ tanimburýpe, térã rejekyty havõme, ne rembiapo vai oĩ gueteri che renondépe, he’i nde Ruete, nde Jarateéva.
23Mba’éicha piko ikatu ere gueteri: Nañemongy’ái ha araka’eve namomba’eguasúi ambue járape. Ema’ẽ porãke, ne rembiapo vaikue rehe rejapova’ekue pe vállepe (Ben-Hinómpe), ehechakuaána ne rembiapokue, nde ningo ku caméllo kuña hakúvaicha, pya’e oñaníva ágotyo pégotyo.
24Nde rejogua búrro kuña saitépe ojepokuaáva oiko hag̃ua desiértore, ha haku jave oñetĩupi yvytu rehe. Ha haku jave, mávapa ojokokuaa ichupe. Ha pe mácho ohekáva ichupe naikane’õmo’ãi, imba’epota jave katuete ojohuva’erã ichupe.
25Eñangareko nde py rehe, ani reikótei pynandi reñembohasy hag̃ua, ha eñangareko nde ahy’o rehe, ani hag̃ua ndey’uhéi. Nde katu ere: Nahániri, nachepohãvéima, ahayhu voi tetã ambueyguápe ha ahamanteva’erã hapykuéri.
26Ku mondaha otĩ háicha ojejohu ramo ichupe hembiapo vaihápe, upeichaite otĩva’erã Israel, hetãyguakuéra, imburuvichakuéra, hetã ruvicha, ipa’ikuéra ha iprofetakuéra.
27Ha’ekuéra ningo he’i peteĩ yvyra pehẽnguépe: Nde voi ore ru; ha peteĩ itápe: Nde, ore sy. Chéve katu chemboyke, ha noma’ẽsevéi cherehe; ha og̃uahẽ vove jehasa asy hendapekuéra he’i hikuái chéve: Epu’ãna, orepytyvõ hag̃ua.
28Ha mamo piko oimemba nde jarakuéra rejapova’ekue. Topu’ã umía, tahecha ikatúpa nepytyvõ nde jepy’apyha árape; nde tavakuéra heta háicha, nde Juda, péicha oĩ avei nde jára gua’ukuéra.
29Mba’upéiko pembyasy. Peẽ voi pepoi chehegui, he’i pe Oikóva tapia g̃uarã.
30Ainupã rei piko ra’e nde ra’ykuérape, nomyatyrõi haguére hikuái hekove. Pende kyse pukúpe pejuka pende profetakuérape, ku leõ oporomondyryrypávaicha.
31Peẽ Israel ñemoñarenguéra, pejapysaka porãke pende Ruete ñe’ẽ rehe. Che piko aiko ku desiértoicha Israélpe g̃uarã, térã ku yvy iñypytũvaicha. Mba’érehepa che retã he’íra’e: Oresãsóma, araka’evéma ndorojuveimava’erã ne rendápe.
32Ikatu nga’u piko pe kuñataĩ hesarái ijeguakágui, térã pe tembirekorã ijao porãvévagui. Che retã katu hetaiterei árama hesarái chehegui.
33Mba’upe piko rembojeguakapa nde rape reheka hag̃ua mborayhu. Ha kuña reko vaípe jepeve rembo’e nde rapekuérare.
34Ha nde ao ruguái rehe jepe ojejohu umi mboriahu ha umi hi’ánga potĩva ruguykue. Nderejohuiva’ekue ichupekuéra oiko vai jave, oñeha’ã uvei hikuái oiko porã hag̃ua.
35Upeichavéramo jepe nde ere: Che reko ipotĩgui, ipochykue oñemboyke chehegui. Ema’ẽ porãke, Che rombojovakéta, ere haguére: Nacherembiapo vaíri.
36Mba’upéiko reguata ambue tape rehe. Umi Egiptoygua nembotavýta avei, ku Asiriaygua nembotavy haguéicha.
37Ha ñemotĩ reheve reju jevýta Egíptogui, pende Ruete voi omboykégui nde rejeroviahápe ha upévagui nosẽ porãmo’ãi mba’eve ndéve g̃uarã.
Who We AreWhat We EelieveWhat We Do
2025 by iamachristian.org,Inc All rights reserved.
