Provérbios 24 - Biblia en Guaraní - ?anderuete ?e’? Por? 2015

1Ani reikose umi tekove iñañávaicha, ha ani remoirũ ichupekuéra.

2Ojepy’amongetágui ipy’apýpe omonda hag̃ua, ha ijuru oñe’ẽ mba’evai rehe.

3Arandupópe oñemopu’ã pe óga, ha akãguapypópe oñemoĩ atãva’erã,

4ha akãguapy porã rupi oñemyenyhẽva’erã ikotykuéra opaichagua mba’erepýgui ha ojeguerohorývagui.

5Pe iñarandúva ipu’aka pe imbaretéva rehe, ha pe iñakãguapy porãva ombopoguy pe ipu’akávape.

6Arandupópe rejapova’erã ñorãirõguasu, ha heta oporohekombo’éva oĩháme oñembopoguýta hese ija’e’ỹvape.

7Pe itarova rekóva ndohupitymo’ãi arandu, upévagui pe táva rokẽme, mbojovakehára oĩháme, ha’e ndojejurupe’amo’ãi.

8Oñemboherava’erã tekove ñañáme pe mba’evaínte ojaposévape.

9Pe ivýrova ningo ojepy’amongeta hembiapo vairã rehe, ha upe oñembohorýva mba’evai hapichakuérape g̃uarã.

10Ndekaigue ramo nde ára porãme, nekangyva’erã avei nde ára vaípe.

11 Esalva umi ojejuka reívape ha eguenohẽ iñemanorãgui umi oñehundi reívape.

12Ha nde ere ramojepe: Añetehápe ndoroikuaáikuri. Ndoikuaamo’ãi piko avei pe oikuaapáva oĩva guive yvyarigua py’apýpe. Pe oñangarekóva ne ánga rehe, Ha’e oikuaamanteva’erã, ha Ha’e omyengoviava’erã yvyariguakuéra rembiapokue.

13He’úkena, che ra’y, pe eíra he’ẽ iporã asýgui, iporãgui ndéve g̃uarã, ha pe eiraite he’ẽgui ne apekũme.

14Upeichaite avei pe arandu iporã ne ángape g̃uarã, rejohu ramo arandu, rejohúma peteĩ mba’eporãite ha amo ipahápe rehupityva’erã pe nde reha’arõva.

15Nde neñaña rekóva, ani remaña ñemítei pe heko potĩva róga rehe, ani remondátei ikoty peguáva.

16Pe heko potĩva ho’a ramojepe 7 jevy, katuete opu’ã jevýta; ha umi iñaña rekóva katu ho’ava’erã mba’evaípe, (ikatu’ỹre opu’ã jevy).

17Ho’a ramo nderehe ija’e’ỹva, ani revy’átei; ha oñepysãnga ramo, anítei ndepy’a rory.

18Ñanderuete katuete nderechava’erã ha iñangekõivo ndehaviráta avei.

19Aníke reike oñoirũme umi iñaña rekóva ndive, ha ani reikose umi tekove ñaña oiko háicha.

20Umi iñañáva ndoiko pukumo’ãigui, ha umi iñaña rekóva mba’e rendy oñemboguéta.

21Ekyhyjékena, che ra’y, Ñandruetégui ha pe tetã ruvichágui; aníke reike ñemoirũme heko tarováva ndive.

22Iñehundi oúta ha iñemano og̃uahẽtagui ha’e oha’ãrõ’ỹrehe.

23Ko’ã mba’e avei umi kuimba’e iñarandúva he’iva’ekue: Naiporãi jajuavy mbojovakehára renondépe, mboriahu ha heta mba’e oguerekóva apytépe.

24Ha peteĩ mbojovakehára he’i ramo iñañávape: Nde ningo nde reko ipotĩ, opaite tetãygua ipochýta hendive ha tetãnguéra ndaija’eiva’erã hese.

25Ha umi mbojovakehára ombojovake porãva ovy’ava’erã, ha ouva’erã hi’arikuéra jehovasa ndetuicháva.

26Upe ombojovake porãvape ojehayhuetereiva’erã.

27Ne rembiapo oka pegua ejapo raẽ; upéi embosako’i nde kokue ha ipahápe emopu’ã nde róga.

28Aníke reñe’ẽtei techahare japu ramo, ha ani rembotavy nde rapichápe nde juru ñe’ẽ rupi.

29Aníke ere: Cherehe ojapo haguéicha, peichaite ajapo jevýta hese; amyengoviáta che rapicha rembiapokue rekoitépe.

30Ahasa pe tekove ate’ỹ kokue ypy rupi, ha pe tekove iñakã porã’ỹva parralty rupi,

31ha péina ápe oparupiete henyhẽmba ñuatĩndýgui, pyno oñu’ãmbaitéma, ha upe ikorapyjere itaguiguáva oñembyaipáma.

32Ama’ẽ ha amoĩ che py’apýpe, che ahechava’ekue che rekombo’e hag̃ua.

33Michĩmínte reñeme’ẽ pe topehýipe, reñeakã kutumimi, remoĩ nde pokuéra ojo’ári reke hag̃uáicha,

34péicha reiko ramo nde voi reñemomboriahu pya’eitereíta ha rehasa asýta ku mondaháicha ikyse puku rehevénte.