2 Crónicas 10 - Biblia en Guaraní - ?anderuete ?e’? Por? 2015

Israel opu’ã Roboam rehe

1Roboam oho Siquémpe, upépe Israelguakuéra oñembyatypa omoĩ hag̃ua ichupe Israel retã ruvicha ramo.

2Ha Jeroboam, Nebat ra’y, ohendúvo péva, oĩ gueteri Egíptope, okañy haguépe tetã ruvicha Salomóngui, ou jevy Israel retãme.

3Ha ohenoiuka ichupe hikuái, ha opaite Israelguakuérape, oñe’ẽ hag̃ua hikuái Roboámpe he’ívo:

4Nde ru orejopyeterei, ndéna embovevuimive oréve ko tembiguái reko pohýi ha pe cangálla pohyiete nde ru omoĩmava’ekue oreári, ha roikóta avei ne rembiguái ramo.

5Ha ha’e he’i ichupekuéra: Peju jevy che rendápe ko’águi mbohapy ára haguépe, ha hetãyguakuéra oho.

6Upéramo tetã ruvicha Roboam ojehekombo’euka umi karai ancianokuérape oikova’ekue itúva Salomon renondépe; ha ha’e he’i ichupekuéra: Mba’éichapa peẽ cherekombo’e, ambohovái hag̃ua ko’ã tetãyguakuérape.

7Ha ha’ekuéra he’i ichupe: Reiko ramo py’a porã reheve hendivekuéra, ha rejapo ramo hembipota, ha’ekuéra oikóta ne rembiguái ramo tapiaite.

8Ha’e katu omboyke ko’ã karai anciáno rekombo’epy, ha ojehekombo’euka mitãrusukuérape okakuaava’ekue hendive ha oikóva iñirũnguéra ramo.

9Ha ha’e oporandu ichupekuéra: Mba’éichapa peẽ cherekombo’e añe’ẽ jevy hag̃ua ko’ã tetãyguakuérape oñe’ẽva’ekue chéve, ha he’iva’ekue hikuái: Embovevuimi oréve michĩmi pe cangálla nde ru omoĩmava’ekue oreári.

10Upéramo umi mitãrusu okakuaava’ekue hendive he’i ichupe: Umi tetãyguakuéra he’iva’ekuépe ndéve: Nde ru ombopohýi ore cangálla, ha ndéna embovevuimive oréve ko mba’e pohýi. Péicha eréta ichupekuéra: Che kuã michĩvéva ipoguasuve che ru ku’águi.

11Péina che ru omoĩkuri pende ári peteĩ cangálla ipohýiva, che ambopohyivéta pene cangálla; che ru penenupã tukumbópe, che poinupãta alacránpe.

12Jeroboam ha opaite tetãyguakuéra ou Roboam rendápe mbohapy ára haguépe, pe tetã ruvicha he’i haguéicha ichupekuéra: Peju jevy che rendápe ko’águi mbohapy ára haguépe.

13Ha tetã ruvicha oñe’ẽ pohyiete ichupekuéra; tetã ruvicha Roboam omboykégui karai ancianokuéra rekombo’epy.

14Ha tetã ruvicha ombohovái ichupekuéra mitãrusu ohekombo’e haguéicha ichupe, ha he’i: Che ru ombopohýikuri pene cangálla, che katu ambopohyivéta pene cangálla; che ru penenupã tukumbópe, che katu poinupãta alacránpe.

15Ha tetã ruvicha ndojaposéi hetãyguakuéra rembipota; Ñanderuete péicha oipotágui, ikatu hag̃uáicha oiko Ñanderuete he’iva’ekue Ahías, Silogua rupi, Jeroboam, Nebat ra’ýpe.

16Ha Israelguakuéra ohechávo tetã ruvicha nohenduiha ichupekuéra, ombohovái hikuái tetã ruvichápe, he’ívo: Mba’épa ore roguereko David ndive. Mba’épa jareko Isai ra’y ndive. Israel ra’ykuéra guive tapeho pende rógape. David toma’ẽnte ko’ág̃a hóga rehe. Ha péicha Israelguakuéra ohopa hogakuérape.

17Upéicha Roboam oisãmbyhýnte umi Israel ñemoñarenguérape, oikóva Juda tavakuérape, (Juda tribuguápente).

18Upéi tetã ruvicha Roboam omondo Adorámpe, ha’e ombyaty hag̃ua impuestokuéra; ha Israel ñemoñarenguéra ojuka ichupe itápe. Upémaramo tetã ruvicha Roboam pya’e pya’e ojupi icárrope ha okañy Jerusalénpe.

19Péicha Israel ojei David rógagui ko ára kóva peve.