Salmokuéra 56 - Biblia en Guaraní - ?anderuete ?e’? Por? 2015

David ojerovia Ñanderuete rehe ojejopy vai ramojepe

1Cheporiahuverekomína, Nde, che Ruete, umi kuimba’e ningo opu’ãmba cherehe, chejopy asy oñemoĩvo ko’ẽ ko’ẽre cherehe.

2Opaite ára umi cherehe ija’e’ỹva opyrũmba cherehe, hetaiterei umi oñemoĩva ñembotuvichapópe cherehe.

3Og̃uahẽ ramo pe ára che akyhyjeha, nderehe katu ajerovia.

4Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.

5Opaite árape ha’ekuéra chembyaise, cherehe oñemoĩ hikuái.

6Oñembyaty hikuái ñemiháme, omaña porã hikuái che guataha rehe chehundi hag̃ua.

7Emyengovia hembiapo vaikue, Nde, che Ruete, ha eity nde pochy umi tetã ári.

8Che ára vai nde reipapáma, che resaykuéra rembyaty ne kambuchípe ha umía rehaipáma nde kuatiañe’ẽme.

9Upéi umi cherehe ija’e’ỹva oguevipava’erã hapykuere gotýo, che amba’ejerure asy jave ndéve, che ningo aikuaa porã voi Ñanderuete oĩha chendive.

10Upévare amomba’eguasúta Ñanderuete ñe’ẽ, iñe’ẽ ae amombe’úta.

11Ñanderuete rehe ajerovia, upévare ndakyhyjemo’ãi. Mba’épa umi yvyarigua ojapokuaa cherehe.

12Che Ruete, ajapopáta ha’emava’ekue ndéve. Aikuave’ẽta che kuave’ẽmby, romomba’eguasu hag̃ua.

13Nde reguenohẽ haguére che ánga ñemanógui ha che py ñepysãngágui, aguata porã hag̃ua che Ruete renondépe, pe oikovéva resapépe.