Ezequiel 21 - Biblia en Guaraní - ?anderuete ?e’? Por? 2015

Ñanderuete kyse puku oñehãimbe’e

1Ñanderuete ñe’ẽ ou chéve, ha he’i:

2Kuimba’e ra’y, emoĩ nde rova Jerusalen gotýo, ha emyasãi che ñe’ẽ umi ka’aguýpe oĩva sur gotýo.

3Ha ere Israel retãme: Péicha he’i pende Ruete, eikuaa porãke, Che ajatapýta ha pe tata péva ohapýta opaite yvyrakuéra, umi hokýva ha umi ipirúva, ha pe tata ndoguemo’ãi ohapypa peve opavavépe, oĩva guive ndepype, sur guive nórte peve.

4Ahundíta nde apytégui opaite tekovépe, aguenohẽta che kyse puku hyrúgui maymaite yvyarigua rehe, yvy guive yvate peve.

5Ha mayma yvyarigua oikovéva guive oikuaáta Che, pende Ruete, aguenohẽ hague che kyse puku hyrúgui; ha namoingemo’ãvéima hyrúpe.

6Ha nde, kuimba’e ra’y, ejahe’o soro ha eiko jepy’apy asypópe, nepyahẽ asy hesakuéra renondépe.

7Ha ha’ekuéra oporandu ramo ndéve: Mba’érehe piko nde rejahe’o asy, eréta: Peteĩ marandu vaiete rupi ha péva og̃uahẽ ramo omokangypáta maymaite py’apy ha oipy’apy asýta mayma ánga, ha ýicha ikangypáta opaite yvyarigua renypy’ã; ema’ẽ porãke, outamahína ha katuete ojehupáta, he’iuka pende Ruete.

8Ñanderuete ñe’ẽ ou chéve, ha he’i:

9Kuimba’e ra’y, emomarandu, ha ere: Péicha he’i pende Ruete, pe kyse puku, hãimbepáma ha overa asýma,

10oporojuka hag̃ua oñehãimbe’éma, oñemopotĩmbáma overa hag̃ua. Javy’ánepa upévarehe. Che ra’y (Juda) ndoikói che rapykuéri, upévagui ojerovia rei che pytyvõre.

11Pe kyse puku hãimbe oñeme’ẽ ipópe omopotĩ hag̃ua, ha overáma ipotĩgui upe oporojukátava pópe g̃uarã.

12Esapukái ha ejahe’o, kuimba’e ra’y, kóa oúta che retã ha mayma imburuvichakuéra ári; ha’ekuéra ho’áta avei kyse puku rupi che retãyguakuéra ndive, upévagui einupã nde ku’a rehe.

13Heta jevy pende Ruete ohaviráma ichupekuéra, mitã iñañáva noñembohekomo’ãi ni tukumbópe, he’i pende Ruete.

14Ha nde katu, kuimba’e ra’y, emomarandu ha ejepopete, ha ta’ipochy jevy jey pe kyse puku oporojuka jo’a jo’áva; kóa ningo pe kyse puku oporojuka ha oikutútava ichupekuéra.

15Pe kyse puku penembopy’amanóta oñembohetavévo pe manoguasu ha opaite hóga rokẽme amoĩma kyse puku oporomondýiva. Pe kyse puku oñembosako’íma oporojuka hag̃uáicha.

16Eikytĩ akatúa gotýo, eikutu asu gotýo, mamo rejereha gotýo.

17Ha Che avei ajepopetéta, ha amboguéta che pochy, Che, pende Ruete añe’ẽma.

18Ou ambue Ñanderuete ñe’ẽ chéve, ha he’i:

19Nde, kuimba’e ra’y, ehai mokõi tape, pe Babilónia retã ruvicha oikuaa hag̃ua moõite rupípa ikyse puku ohasáta; peteĩ tetãguínte mokõi tape osẽ, ha ehechauka mokõivéva oikuaa hag̃ua umi táva ohotaha rupi.

20Ehechauka hu’y rupi pe tape ohóva Rabápe, Amon ñemoñarenguéra tavaguasúpe; ha pe ambue hu’y Jerusalénpe, Judayguakuéra tavaguasúpe; ko’ã tape rupi ohasáta pe kyse puku.

21Pe Babilónia retã ruvicha og̃uahẽ vove pe tape ojuasahápe, imba’ekuaáva oityvyróta hu’ykuéra omba’eporandu hag̃ua ijárape ha oma’ẽta tymba py’akue rehe.

22Imba’ekuaáva ohechaukáta ichupe oho hag̃ua ipo akatúape, he’ise ojeity hag̃ua Jerusalen ári, ha upépe omoñepyrũ hag̃ua pe jejukaguasu, osapukái hag̃ua ñorãirõ sapukaiguasu, ha omopu’ã hag̃ua umi ñorãirõ rembiporu ombotáva umi táva rokẽre oity hag̃ua, ha omopu’ãta escaléra ojapyhara hag̃ua Jerusalen tápia ári.

23Umi Israelgua katu oimo’ã ko ta’yvõ kóva reietéta, Nabucodonosor imandu’a uvei Judayguakuéra ome’ẽ hague iñe’ẽ, ha omboykégui iñe’ẽ ipochyete ha ou ohavira hag̃ua ichupekuéra.

24Upévare, péicha he’i pende Ruete: Peñemomandu’a jevy pene rembiapo vaikue rehe, pehechauka peñemoĩ hague cherehe, ha opaichagua pene rembiapokue ivaietereiha, ha upévare Che pohaviráta.

25Ha nde, Israel retã ruvicha, nde reko ky’a ha ñaña; og̃uahẽtama katuete pe ára, ne aña reko opataha.

26Péicha he’i pende Ruete: Eity pe mburuvicha akã rehegua jeguaka, eipe’a icoróna; mba’eve ndopytamo’ãi oĩ haichaite, ko’ág̃a toñemomba’eguasu umi imichĩva, ha toñemomirĩ umi oñembotuicháva.

27Taperekue, taperekue, ambotaperepáta ko táva kóvape, ha ã mba’e oikóta og̃uahẽ meve Che aiporavova’ekuépe ha ame’ẽmba hag̃ua opaite mba’e ipópe.

Amonguakuéra ojehaviráta

28Ha nde, kuimba’e ra’y, eprofetiza ha ere péicha he’i pende Ruete Amon ñemoñarenguéra rehe, oñembohory haguére hikuái: Kyse puku, kyse puku ojepe’áma hyrúgui oporojuka hag̃ua; oporohundi hag̃ua, overa ha hendýma aratirícha.

29Umi mba’e pehecha ha pehendúva mba’e gua’u ha umi mba’e pemomarandúva katu japu rei ichupekuéra, pe kyse puku oñemoĩtama umi tekove ñaña ajúra rehe, og̃uahẽtama iñañanguéra ára paha.

30Amoinge jevýta pe kyse puku hyrúpe. Ha pe tetã nde rekakuaa ha reiko haguépe, upépe Che rombojovakéta.

31Che añohẽta ndeári che pochy; che pochy amyendýta ndeári, ha Che romoĩta ndéve kuimba’ekuéra okyhyje’ỹva ha oporohundíva poguýpe.

32Reikóta tata rembi’u ramo, pe yvy hykuéta nde ruguykuégui; ndaiporimo’ãvéima mandu’a nderehe, Che, Yvága Atykuéra Jára ha’éma.