Matéo 14 - Biblia en Guaraní - ?anderuete ?e’? Por? 2015

Juan Bautísta ojejukauka ramoguare

1Umi ára umívape Heródes, pe Galiléa retã ruvicha, ohendu Hesu rerakuã porã.

2Ha he’i hembiguaikuérape: Kóva hína Juan Bautísta; ha’e oikove jevy omanova’ekue apytégui, upévare oguereko pu’aka ojapo hag̃ua ko’ã tembiapo techapyrãva.

3Heródes ningo oapresava’ekue Juánpe, ha omoinge cárcelpe, ityvýra Felípe rembireko Herodíasre.

4Juan he’ígui ichupe: Naikatúi reiko nde ryvy rembireko ndive.

5Ha ojukaukasékuri Juánpe, okyhyjete katu hetãyguakuéragui; ha’ekuéra oguerekógui ichupe proféta ramo (hetãpýpe).

6Ha og̃uahẽvo Heródes aramboty, Herodías membykuña ojeroky henondépe, ha Heródes oguerohoryeterei.

7Ha ome’ẽ iñe’ẽ ome’ẽtaha ichupe oimeraẽva mba’e ha’e ojeruréva guive.

8Ha isy ohekombo’e haguéicha ichupe ojerure: Eme’ẽ chéve ko’ápe, peteĩ mba’yrúpe Juan Bautísta akãngue.

9Ha pe tetã ruvicha oñembyasyeterei, opáichavo, ome’ẽ haguére iñe’ẽ umi tapicha oĩva rovake mesápe he’i oñeme’ẽ hag̃ua ichupe mba’e ojeruréva rehe,

10ha oñakã’ouka Juánpe, oĩva cárcelpe.

11Ha ogueru ichupe hikuái iñakãngue peteĩ ña’ẽmbépe, ha ome’ẽ pe mitãkuñáme, ha ha’e ogueraha isýpe.

12Ha ou Juan remimbo’ekuéra ogueraha hag̃ua hetekue ha oñotỹ ichupe. Upéi oho hikuái omombe’úvo Hesúpe.

Hesu omongaru 5000-pe

13Ha Hesu oikuaávo upéva, oho upégui peteĩ bárcope, peteĩ tenda añoháme; ha hetãyguakuéra oikuaávo péva ohopa hapykuéri umi távagui, yvy rupi oñembojerévo pe yguasu rehe.

14Ha Hesu oguejývo pe bárcogui ohecha hetãyguakuéra oñembyatyvahína, ha oiporiahuverekoite ichupekuéra ha omonguera umi hasývape.

15Ha ka’aru pytũvo katu ou hemimbo’ekuéra Hesu rendápe, ha he’i ichupe: Ko’árupi ningo ndaipóri mba’eve (okaru hag̃ua hikuái), ha ka’aruetéma, emondóna ko’ãvape ojogua hag̃ua hembi’urã umi tava’iha rupi.

16Hesu katu he’i ichupekuéra: Natekotevẽi ningo oho hikuái, peẽ voi pemongarukuaa ichupekuéra.

17Ha’ekuéra katu he’i: Roguereko ningo ko’ápe 5 pan ha mokõi pirámante.

18Ha Hesu he’i: Pegueru chéve.

19Ha omboguapyukapa hetãyguakuérape kapi’ipépe, ha oñeme’ẽ rire ichupe umi 5 pan ha umi mokõi pira, Hesu ojesaupi yvága gotýo, ha ojerure Ñanderuetépe ohovasa hag̃ua. Upéi oipehe’ã umi pan, ha ome’ẽ hemimbo’ekuérape, ha ha’ekuéra ome’ẽ hetãyguakuérape.

20Ha ho’u joaite hikuái ha hyg̃uatãmba, ha omono’õvo umi pehẽngue hembýva, omyenyhẽ meve 12 ajaka renyhẽkue.

21Ha umi okaruva’ekue oĩnera’e 5.000 kuimba’e rupi, ojepapa’ỹre kuña ha mitãkuéra.

Hesu oguata y ape ári

22Uperire Hesu ombojupi hemimbo’ekuérape peteĩ bárcope ohasa hag̃ua hikuái yguasu mboypýri, ha’e omondopa aja hetãyguakuérape.

23Ha ohopa rire hetãyguakuéra Hesu ojupi peteĩ cérrope oñembo’e hag̃ua ha’eñoháme.

24Upeaja pe bárco mombyrýma oho, heta estádio (estádio = 185 métro) pukukuéma pe y rembe’ýgui, ha pe y pochyete oityvyro pe bárcope, hatãitereígui oipeju pe yvytu.

25Ko’ẽju rupi katu Hesu ou hendapekuéra, oguatávo pe y ape ári.

26Ha hemimbo’ekuéra ohechávo peteĩ oguatáva y ape ári tuicha oñemondýi, he’ígui: Peteĩ póra. Ha okyhyjégui osapukaipa hikuái.

27Ha Hesu pya’e oñe’ẽ ichupekuéra, ha he’i: Peñembopy’aguapy, Chénteko, ani pekyhyje.

28Ha Pédro oñe’ẽ ichupe, he’ívo: Oime ramo Nde che Jára, ere chéve taha ne rendápe pe y ape ári.

29Ha Hesu he’i ichupe: Eju. Ha Pédro, oguejývo pe bárcogui oguata pe y ape ári ha oho Hesu renda gotýo.

30Ha ohechávo pe yvytu ratã, okyhyje; oñepyrũ ho’yguy ha sapukaihápe he’i: Che Jára, chesalvamína.

31Upévo Hesu ipojái hese ha ojokóvo ichupe he’i: Kuimba’e jerovia’íva, mba’érehe piko nderejeroviapái.

32Ha ojupívo hikuái bárcope, opi pe yvytu.

33Opaite umi oĩva guive bárcope oñesũ Hesu renondépe ha he’i ichupe hikuái: Añetehápe, Nde ningo Ñanderuete ra’y.

34Ha ohasáma ramo hikuái yguasu mboypýri, og̃uahẽ hikuái Genesaret yvýpe.

35Ha umi tavaygua oikuaávo ichupe omomarandukapa umi ijerekue rupiguápe, ha ogueru joaite Hesu rendápe umi hasývape.

36Ha ojerure asy hikuái ichupe oheja hag̃ua ojepokomi ijao rembe’y rehénte, ha umi opokóva guive hese, okuerapa opytávo (imba’asýgui).