Efesoyguakuérape 6 - Biblia en Guaraní - ?anderuete ?e’? Por? 2015

Túva ha hogayguakuéra

1Peẽ ta’yrakuéra ha tajyrakuéra peneñe’ẽrenduva’erã pende rúpe ha pende sýpe Ñanderuete oipota háicha. Péva ningo mba’e heko peguáva peteĩ mitãme g̃uarã.

2Emomba’e nde ru ha nde sýpe, péva ningo pe tembiapoukapy peteĩha oñeme’ẽmava promésa reheve;

3oho porã hag̃ua ndéve, ha reikove puku hag̃ua ko yvy ape ári, (Éxodo 20,12).

4Ha peẽ tuvakuéra, anítei pembopochy pende ra’y ha pende rajykuérape. Pemongakuaa ha pehekombo’e porã uvei ichupekuéra Ñanderuete oipota háicha (Ñanderuete kyhyje reheve).

5Peẽ tembiguái (esclávo), peneñe’ẽrendúke pende jára (patron) ko yvy ariguápe, kyhyje ha ryryipópe, tova mokõi’ỹre, peẽ peneñe’ẽrendu ramoguáicha Hesu Crístope.

6Ani pemba’apo porã ha’e oma’ẽ ajánte pene rembiapóre, pembovy’a katu pende rapichakuérape, pemba’apo porã ha kyre’ỹme ha’e noma’ẽi ramojepe pene rembiapóre, pemba’apo hekópe tapia pemba’aporõguáicha Ñanderuetépe g̃uarã hembiguái ramo ha pende py’aite guive pejapo Ñanderuete rembipota.

7Kyre’ỹpópe pemba’apo, pemba’apo porã hag̃uáicha Ñanderuetépe, ha ani pende rapichakuérape g̃uarã.

8Peikuaa porãke, opaite pene rembiapo porã Ñanderuete omyengoviataha peẽme g̃uarã, taha’e tembiguái térã patron.

9Ha peẽ tembiguái jára, pejapo péicha avei hendivekuéra, ani peñe’ẽ pohýi rei, peikuaa voi Ijára ha’e avei pende Jára oĩva yvágape ha Ha’e oporombojuavy’ỹva araka’eve.

10Peñemokyre’ỹke Ñanderuete pu’akaguasu rupi, peẽ penembarete hag̃ua.

11Peiporu hekópe Ñanderuete ñorãirõ rembiporukuéra peñemoĩ hag̃ua Satana rehe, ha’e pende reitységui iñuhãme.

12Ñande ningo nañañorãirõi tuguy ha to’o ndive (ñande rapicha ndive), ñande ñañorãirõ uvei umi mburuvichaguasu yvategua ndive (Satana ndive), umi mburuvichaguasu hesaitéva ndive, umi oisãmbyhýva ko múndo pytũ meguápe, umi pytu ñaña mba’epochy yvága pegua ndive.

13Upévare peiporu porãke opaite Ñanderuete ñorãirõ rembiporukuéra peẽ ikatu hag̃ua peropu’akapa, og̃uahẽ ramo pe ára vai ha Satana pende reityse ramo iñuhãme.

14Upévare peñembosako’i porãke, peñembo’y hatãkena ha pejeku’a jopy porãke, kóva he’ise peñemboykeva’erã pe japúgui ha pejeva’erã pe añetegua; ha peñemonde pe camisa hierroguiguávape, kóva he’ise peñemboheko potĩve pehóvo.

15Pemonde pende py rehegua, kóva he’ise pemombe’uva’erãha Ñanderuete ñe’ẽ porãite (evangélio),

16ha pejapyhy pe tete mo’ãha, kóva he’ise pejerovia hatãke Hesu Crísto rehe pemboguepa hag̃ua Satana hu’y rendyeta.

17Pejapyhy avei pene akã mo’ãha, kóva he’ise pejejokóke pende salvacionrã rehe, ha pejapyhy pe kyse puku, kóva he’ise peñemo’ã ha pendyry Ñanderuete ñe’ẽ (Bíblia) reheve umi oñemoĩvare penderehe.

18Peñembo’e tapiákena pe Pytu Porãmbáva oipota háicha, aníke pendepy’a kangy, pejerurepeína pene ñembo’épe opaite Hesu Crísto reheguáva rehe.

19Ha peñembo’e avei cherehe, oñeme’ẽ hag̃ua chéve pe ñe’ẽ heko peguáva, ha aipe’a ramo che juru tamyasãi hag̃ua akyhyje’ỹre pe evangélio umi oikuaa’ỹvape.

20Upevarã che aĩ cárcelpe amombe’u hag̃ua Ñanderuete ñe’ẽ akyhyje’ỹre.

21Peẽ peikuaa hag̃ua mba’éichapa che aiko’aína, Tíquico, che hermáno ahayhúva ha Hesu Crísto remimondo heko peguáva, omombe’upáta peẽme peikuaaséva.

22Ichupe amondo pene rendápe, peikuaa hag̃ua mba’éichapa ore rohasaroína, ha’e penemoangapyhy hag̃ua.

23Ñandejára Ñanderuete ha Ñandejára Hesu Crísto tome’ẽ peẽme py’aguapy, mborayhu ha jerovia.

24Ha Ñanderuete py’aporã (grácia) toĩ tapia penendive, pehayhu guive Ñandejára Hesu Crístope.