Oséas 5 - Biblia en Guaraní - ?anderuete ?e’? Por? 2015

1Pa’ikuéra, pehendúke ko ñe’ẽ kóva, Israelguakuéra pejapysaka porã ha tetã ruvicha rogaygua pehendu porã: Peẽme g̃uarã og̃uahẽta pe jehaviraguasu, peiko haguére ñuhã ramo Mizpápe, peteĩ pira red ojepysóva ramo cérro Tabórpe,

2ha peteĩ yvykua ñuhã ramo Sitímpe, Che katu aikóta ichupekuéra g̃uarã tukumbo ramo.

3Che aikuaa Efraínpe ha Israel nokañymo’ãiha che renondégui; nde, Efrain, nde reko vai rupi remongy’a avei opaite Israelguakuérape.

4Hembiapo vaieta rupi ndojevykuaái Ijára rendápe, aña pytu vai oikógui ipy’apýpe ndoikuaasevéima Ijarateépe.

5Israel retã oñembotuicha haguére ndoiko pukumo’ãvéi, Israel retã ha Efrain oñepysãngáta ha hendivekuéra Juda retã avei.

6Ijovechakuéra ha ivakakuéra reheve og̃uahẽta hikuái (Ñanderuete rogaguasúpe) oheka hag̃ua Ñanderuetépe, ndojohumo’ãi katu ichupe, Ha’e oñemomombyrýgui ichuguikuéra.

7Ha’ekuéra ojei haguére che rapégui ha omoñemoñágui hikuái mitã hesegua’ỹva, upévagui pe jasy pyahu arete ohundíta ichupekuéra ijyvy reheve.

8Pembopu ovecha ratĩ Gibéape, turu Rámape, pesapukái Betavénpe, peavisa Benjamínpe.

9Efrain itaperéta Che ahaviraha árape, aikuaaukáma Israel tribukuérape umi mba’e katuete oikótava.

10Juda ruvichakuéra oiko ku kuimba’éicha ombotuicha reígui ikokue (oipe’avévo hapicha kokuégui imba’eteérõguáicha) che jahéi añohẽta hi’arikuéra ýicha.

11Efrain ojejopy vaíma ha ojehaviráma oiko haguére ijára gua’u rapykuéri.

12Che aikóta kupi’ícha Efraínpe g̃uarã, ha Judápe g̃uarã políllaicha.

13Ha Efrain oñandu hasyha ha Juda ohecha ipeupaha, upéramo Efrain oho Asúrpe (pohã rekávo) ha omondo hemimondokuéra imburuvichaguasúpe (oñorãirõ porãkuaáva piári), ha’e katu ndaikatumo’ãvéima penepohãno, ndaikatumo’ãvéima omonguera pende ai.

14Che ajeitýta leõicha Efrain ári, ha leõ ra’ýicha Juda ra’ykuéra ári. Che amopehe’ãmbáta ichupekuéra, Che ajapyhy ha araháta ichupekuéra mombyry ha ndaiporimo’ãi avave ikatúva oipe’a che pógui.

15Che apoi rire che retãgui, Israel ou jevýta che rendápe, ohechakuaa porãta hembiapo ivaiha, upérõ chereka jevýta hikuái, ojepy’apyetégui ou jevýta che rendápe.