Deuteronómio 10 - Biblia en Guaraní - ?anderuete ?e’? Por? 2015

Pe ñe’ẽme’ẽ oñembopyahu

1Umi ára umívape Ñanderuete he’i chéve: Embosako’i mokõi ita ipéva umi tenondeguareichaitéva, ha ejupi jevy che rendápe, pe cérrope, ha umívape g̃uarã ejapo avei peteĩ karameg̃ua yvyraguiguáva;

2ha umi ita ipéva nde rejokava’ekue rehe ahai jevýta ñe’ẽ oĩ haguéicha; ha upéi remoĩta peteĩ karameg̃uáme.

3Ha ajapo peteĩ karameg̃ua yvyra acáciagui, ha ambosako’i mokõi ita ipéva umi tenondeguaréicha ha ajupi pe cérrope mokõive ita ipéva reheve che pópe.

4Ha Ñanderuete ohai jevy umi ita ipéva rehe umi ñe’ẽ ohai ypy haguéicha, umi 10 tembiapoukapy Ñanderuete he’iva’ekue peẽme tata mbyte guive, pe atyguasuha árape; ha ome’ẽ jevy chéve.

5Ajere ha aguejy pe cérrogui, ha amoĩ umi itape pe karameg̃uáme; ha upépe opyta, Ñanderuete he’i haguéicha chéve.

6Upéi osẽ Israel ñemoñarenguéra Beerot-bene-jaacángui Mosera gotýo; upépe Aaron omano, ha upépe oñeñotỹ avei ichupe, ha ita’ýra Eleazar opyta hendaguépe pa’iguasu ramo.

7Upégui oipykúi hikuái Gudgodápe, ha Gudgodágui Jotbatápe, yvy hi’yakã ha hi’y hetávape.

8Umi árape Ñanderuete omboyke Levi tríbupe ogueraha hag̃ua Ñanderuete karameg̃ua hembiapoukapykuéra reheve, ha oiko hag̃ua hikuái Ñanderuete renondépe hembiguái ramo ha oporohovasa hag̃ua hérape ko ára kóva peve.

9Upévagui noñeme’ẽi avei Levípe ijyvyrã ipehẽnguekuéra apytépe; Ñanderuete ha’égui imba’erã, Jahve, pende Jára, he’i haguéicha ichupe.

10Ha aimékuri pe cérrope aime ypy haguéicha, 40 ára ha 40 pyhare; ha Ñanderuete cherendu jevýgui Ha’e napenehundiriva’ekue.

11Ha Ñanderuete he’i chéve: Epu’ã, tereho, reipykúi hag̃ua ko’ã tetãygua renonderãme oike peve pe yvy Che ha’emava’ekuépe ituvakuérape ame’ẽtaha ichupekuéra.

Umi mba’e Ñanderuete oipotáva

12Israel, mba’épa Ñanderuete ojerure ndehegui. Ha’e oipota nde rekyhyje nde Járagui ha reguata hapykuéri ha rehayhu ichupe nde py’aite guive ha ne ánga mbytete guive;

13ha rejapo hag̃ua hembiapoukapy ha hembipota, che ha’éva guive peẽme ko árape, oho porãmba hag̃ua peẽme.

14Peikuaa porãke, yvagakuéra Ñanderuete, Ñandejára mba’e, ha pe yvága ijyvatevéva jepe imba’e avei, upéicha avei ko yvy ha opaite mba’e oĩva guive ipype imba’etee.

15Ñanderuete ohayhu pende rukuérape, ha upévare pendeporavo avei peẽme, iñemoñarenguéra, mayma tetãnguéra apytégui, ojekuaa háicha ko árape.

16Pemoambue pende py’apy ha anive pende reko vai.

17Ñanderuete, Ñandejaraite, Ha’e ningo opaite Jára Ru ha Karaiguasu oĩva opaite karaikuéra ári, Ñanderuete ituicha, ipu’akapa ha ojekyhyjeha. Ha’e nombojuavýi tetãnguéra ojuehegui ha avave ndikatúi ojopy ichupe ojapo hag̃ua ijyvyarigua rembipota, opaga heta ramojepe.

18Ha’e ombojovake porã ityre’ỹva ha imenave’ỹvape; ha ohayhu avei tetã ambueyguápe ome’ẽvo ichupe pan ha ijaorã.

19Upévagui pehayhuva’erã tetã ambueyguápe; peẽ peikógui avei tetã ambueygua ramo Egípto retãme.

20Pekyhyje Ñanderuete, Ñandejáragui, ichupe añónte pemomba’eguasuva’erã, hapykuéri peikova’erã, ha hérape peñe’ẽme’ẽva’erã.

21Ha’e ningo pene rerakuã porã, Ha’e voi ojapova’ekue penderehe ko’ã mba’e techapyrãva ha oporomondýiva pende resa renondépe.

22 Seténta kuimba’e ha kuña reheve nde rukuéra oikékuri Egípto retãme, ha ág̃a Ñanderuete nde’apo mbyjaita ára peguáicha.