1Pejapysaka porãke Ñanderuete, Ñandejára ñe’ẽ rehe, pejapo hag̃ua hekoitépe mayma hembiapoukapy che ame’ẽmava peẽme ko árape, upéicharõ Ñanderuete penemboyvatevéta mayma tetã yvy ape ariguágui.
2Ha pende ári ho’ava’erã mayma ko’ã ñepytyvõ, jehovasa ha salvacion, peneñe’ẽrendu ramo, Jahve, pende Ruetépe:
3Ñanderuete nepytyvõ porãta reiko ramo táva ryepýpe térã ñúme;
4Ñanderuete ombohetavéta nde ra’ykuéra, nde koga’a, ne rymba ra’ykuéra, nde vaka ra’ykuéra ha nde ovechakuéra aty.
5Ha’e ombohetavéta ne ñemitỹnguéra ha ne pan.
6Ha’e nemoirũta nde guata ñepyrũ guive opa peve.
7Ñanderuete ojapova’erã sarambi penderehe ija’e’ỹvare ha umi oñemoĩva penderehe oúta peteĩ tape rupi ojeity hag̃ua pendeári, okañýta katu pene renondégui 7 ambue tape rupi.
8Ñanderuete oñangarekóta pene mba’e ra’ỹi oñeñongatúvare nde rógape, ha Ha’e ombohetavéta nde kóga’a.
9Ñanderuete pendererekóta hetãtee ramo, oñe’ẽme’ẽ haguéicha peẽme, pejapo ramo Jahve, Ñandejára rembiapoukapykuéra, ha peiko guive hape rehe.
10Ha mayma tetã yvy arigua ohechava’erã Ñanderuete, pende Jára réra oñehenoiha pene retãme ha okyhyjeva’erã hikuái pendehegui.
11Ha Ñanderuete omohembypava’erã pende kóga’a peẽme g̃uarã ha ombohetava’erã peẽme g̃uarã, pende ra’ykuéra ha pene rymba imembyetáta. Ko’ã mba’eporã Ha’e ome’ẽta peẽme pe yvy Ha’e oprometemava’ekuépe pende rukuérape.
12Ñanderuete oipe’ava’erã peẽme imba’erepy porã rokẽ, pe yvága ombou hag̃ua ama pende yvy apére hi’árape, ha ohovasa hag̃ua opaite mba’e pende po ojapóva guive. Peẽ peiporukava’erã heta tetãme, peẽ katu ndapejeruremo’ãi mba’eve avavépe.
13Ñanderuete penemoĩva’erã tetãnguéra akã ramo, ha nanemoĩmo’ãi tuguái ramo ha peimeva’erã hi’ariete, ha napeimeiva’erã iguýpe, pejapo guive Ñanderuete, Ñandejára rembiapoukapykuéra, che ha’emava’ekue peẽme peñangareko ha pejapo hag̃ua hekoitépe.
14Ani peñemboykéi opaite mba’e ha’eva’ekue guive peẽme ko ára kóvape, taha’e akatúa térã asu gotýo, anítei peho ambue jára rapykuéri peiko hag̃ua hembiguái ramo.
Iñe’ẽ rendu’ỹva renonderã15Peẽ napeneñe’ẽrendúi ramo Ñanderuete ñe’ẽme, ha ndapejapói ramo mayma imbo’epy ha hembiapoukapykuéra che ha’eva’ekue peẽme ko árape, upéramo katuete ouva’erã pende ári ko’ã maldicion ko’ãva ha penderupitýta.
16Upémaramo ouva’erã maldición (jeharu) pendeári peiko ramo pende tavapýpe térã ñúme.
17 Maldicion ho’ava’erã pende koga’a ha pan ári.
18 Maldicion ho’ava’erã pende ra’ykuéra ári, pene ñemitỹngue ári, pende vaka ra’ykuéra ha pende ovechakuéra aty ári.
19 Maldicion ho’ava’erã pene rembiapo ñepyrũme ha ipaha peguáva ári.
20Ñanderuete ombouva’erã pendeári maldicion, jepy’apy ha ñemondýi mamo peimeháme ha pende po rembiapo oñehundi reiva’erã pemano meve.
21Ñanderuete ombouva’erã pendeári mba’asy (péste) pendejukátava, pendembokusugue peve pe yvy peiketahápe peñemomba’e hag̃ua hese.
22Ñanderuete omboúta pendeári mba’asy po’i, akãnundu, tete ruru, mbyry’ái, ama’ỹ, jehasa asy ha yso karu ombyaíva pende koga’a, peñehundi meve.
23Pe ára oĩva pene akã ári oñembotýta (ndokyvéi hag̃ua) ha pe yvy oĩva pende py guýpe oñemohatãta itáicha.
24Ñanderuete ome’ẽ rãngue ama, omboúta yvy timbo ha tanimbu pende yvýpe pemano meve.
25Ñanderuete napenepytyvõveiva’erã penderehe ija’e’ỹva renondépe, ha’ekuéra ipu’akáta penderehe, peteĩ tape rehe peho pejohu hag̃ua ichupekuéra ha 7 tape rehe pekañyva’erã henonderãnguéragui; ha opaite tetãnguéra yvy arigua oñemondýita ohechávo umi mba’e ojehúva guive peẽme.
26Ha pene re’õnguekuéra opytáta guyra ára pegua ha mymba yvy arigua rembi’urã, ha ndaiporimo’ãi avave omondýiva ichupekuéra.
27Ñanderuete penembohasýta Egípto pegua lépra rupi, susu’a, kura’ỹi ha jati’i rupi.
28Ñanderuete penembohasýta tarova rekógui, penemohesatũta ha pene ánga oñemyangekõietereíta.
29Ha pejepovyvýta asajekuépe ku ohecha’ỹva ojepovyvy háicha iñypytũháme, ha nosẽ porãmo’ãi peẽme pejapóva guive; pejejopymanteva’erã ha oñemondapava’erã pendehegui, ha ndaiporimo’ãi avave penepytyvõtava.
30Pemendava’erã peteĩ kuña rehe, ambue kuimba’e katu oikóta hendive; pemopu’ãva’erã pende róga ha ndapeikomo’ãi ipype, peñotỹva’erã pende parralty ha ndapeiporumo’ãi.
31Pene rymba guéi ojejukava’erã pende resa renondépe, ha ndape’umo’ãi ichugui; pene rymba búrro ojeguerahava’erã pende resa renondégui ha ndojegueruveiva’erã peẽme; pende ovechakuéra oñeme’ẽva’erã penderehe ija’e’ỹvape, ha ndaiporimo’ãi penepytyvõtava.
32Pende ra’y ha pende rajykuéra oñeme’ẽva’erã ambue tetãyguakuérape ha pende resa ohechapava’erã, ko’ã mba’evai ha upévagui pendepy’akangýta opaite árape g̃uarã; ha pende pu’aka ojeíta.
33Pende kóga’a ha mayma pene rembiapo repy ho’uva’erã tetã ambueygua, peẽ ndapeikuaáiva; ha peikova’erã jepy’apypópe tetã ambueygua poguýpe.
34Ha pendetarováta pende resa ohechátava rehe.
35Ñanderuete penembohasyva’erã pende retépe ai vaígui, pende py mbyte guive pene akã mbyte peve, ha ndokueraveiva’erãva.
36Ñanderuete ome’ẽta peẽme ha pene retã ruvichápe, peẽ voi pemoĩva’ekue pendeári, tetã ambuépe, peẽ ni pende rukuéra oikuaa’ỹvape; ha upépe pemomba’eguasuva’erã ambue járape, yvyra ha itágui ojejapopyrévape.
37Ha peikóta poromongyhyjeha ha ñe’ẽ tekombo’e ramo, ha umi tetã mamo Ñanderuete pendererahahápe oñembohoryva’erã penderehe.
38Peñotỹva’erã heta mba’e ra’ỹi pende kokuépe, sa’i katu pemono’õva’erã, tuku aty heta ho’útagui pene ñemitỹnguéra.
39Peñotỹva’erã parral ha pemba’apova’erã hese, ndape’umo’ãi katu ivíno, ha napembyatymo’ãi pende parral’a, yso ho’upátagui pendehegui.
40Pene retãpy rupi peguerekóta olívo yvyra ha napemonamo’ãi pendejehe ijacéite, pende olivo’a okuipátagui.
41Pende ra’y ha pende rajy hetava’erã, ndoikomo’ãi pene mba’éva ramo, ohopátagui jepokuapýpe ambue tetãme.
42Pende yvyra rakãnguéra ha pende koga’a tuku ho’upava’erã.
43Umi tetã ambueygua oikóva pende apytépe opu’ãva’erã yvate pendeári ha peẽ pe’ava’erã yvyete peve.
44Ha’ekuéra oiporukáta peẽme ha peẽ katu ndapeiporukamo’ãi ichupekuéra; ha’ekuéra oĩta pene renondépe, peẽ katu peikóta hapykuépe.
45Ko’ã maldicion ouva’erã pendeári ha penemuñava’erã, peñehundi peve ndapejapysakáigui Ñanderuete, Ñandejára ñe’ẽ rehe, pejapo hag̃ua hekoitépe iñe’ẽ ha hembiapoukapykuéra, Ha’e he’iva’ekue peẽme pejapo hag̃ua.
46Ha ã mba’e oikóta techaukapy ramo (señal ramo) peẽme ha opaite pene ñemoñarenguérape g̃uarã,
47ndapemomba’eguasúi haguére pende Ruete, pende Járape, vy’a ha torypópe, imba’e porãita rehehápe.
48Upévagui peikóta tembiguái ramo penderehe ija’e’ỹva poguýpe ha peneñembyahýi ha pendey’uhéi, ha pendeopívo, ha ndapeguerekomo’ãi mba’eve peikotevẽva guive; Ha’e omoĩva’erã pende atúa ári cangálla hierroguiguáva peñehundi peve.
49Ñanderuete oguerúta pendeári peteĩ tetã mombyrygua yvy apýragui, ovevéva ñapykanícha, ha upe tetã ñe’ẽ ndapeikuaamo’ãi;
50ikuimba’ekuéra hova pochy, ha’ekuéra nomomba’emo’ãi itujávape ni ndoiporiahuverekomo’ãi mitãme;
51ha’ekuéra ho’upava’erã pene rymbakuéra ha pende koga’a peñehundi peve; ha ndohejamo’ãi peẽme pene mba’e ra’ỹingue, mba’e rykuere, acéite, pende vaka ra’ykuéra ni pende ovecha atykuéra.
52Omongorava’erã hikuái ojeity hag̃uáicha mayma pene retã tavakuéra ári, ho’a peve pe táva tápia yvate hi’ã porãva’ekue, opa hag̃ua pende jeroviaha, péva ojehúta pe yvy Ñanderuete ome’ẽtava peẽme.
53Ha pe’uva’erã pende ra’y ha pende rajy ro’okue, Jahve, pende Jára, ohejágui penderehe ija’e’ỹva penemongora ha pendejopy vaiete hag̃ua.
54Umi kuimba’e ikyra ha ikaruguasúva pende apytépe, omaña vaiva’erã ipehẽngue rehe ha hembireko ohayhúva rehe, ha ita’yrakuéra hembýva rehe gueteri;
55ani hag̃ua ome’ẽ avavépe ita’ýra ro’okue ha’e voi ho’uséva, nahembyvéigui ichupekuéra mba’eve ambue tembi’u, penderehe ija’e’ỹva omongora ha ojopy vaietereígui opaite pende tavakuéra.
56Ha umi kuña pende apytépe ipirapiréva ha oikóva ogaguasu porãvape, araka’eve oha’ã’ỹva omboja hag̃ua ipypyte yvýre (hembiguaikuéra ningo oguerahava’ekuégui ichupe), omaña vaiva’erã iména ohayhuetéva rehe, imembykuimba’e ha imembykuña rehe,
57ha hakate’ỹva’erã imembyryrukue ha imembykuéra rehe osẽva hetégui; ho’uségui ñemiháme, ipokãitereígui opaite mba’e, penderehe ija’e’ỹva omongora ha ojopy vaietereígui opaite pende tavakuéra.
58Peẽ napeñangarekói ramo pejapo hag̃ua hekoitépe mayma ko’ã tembiapoukapy ojehai háicha ko kuatiañe’ẽ kóvape, ha ndapekyhyjéi ramo ko téra jajái ha kyhyjepývagui: Jahve, pende Ruetégui.
59Upéicharõ Ñanderuete omboheta hetavéta pe jehasa asy peẽme ha pene ñemoñarenguérape g̃uarã: Jehavira tuichaitéva ha tapiaiteguáva ha mba’asy vai ha hi’aréva;
60Ha’e ogueruva’erã pende ári opaite mba’evai ojehuva’ekue Egípto retãme ha pekyhyjeiteva’erã oja jave penderehe.
61Ñanderuete ombojo’avéta pendeári mba’asy ha jehavira ojehai’ỹva ko tembiapoukapy kuatiañe’ẽme, peñehundi peve.
62Mbovymínte pende apytépe hembýta, pendereta rire ára pegua mbyjaitáicha, napeneñe’ẽrendúi haguére Ñanderuete, pende Jára, he’ívape.
63Ñanderuete horyva’ekue ojapóvo penderehe mba’eporã ha penemboheta vove, upéicha ko’ág̃a Ha’e horyva’erã penemombovy ha penehundi hag̃ua; Ha’e penemosẽta pe yvýgui Ha’e voi ome’ẽtava peẽme.
64Ñanderuete penemosarambiva’erã mayma tetãnguéra rupi, ko yvy tuichakue rupi peteĩ apýra guive ambue apýra peve; ha upépe pemomba’eguasúta ambue járape ojejapóva yvyra ha itágui, ndapeikuaáiva peẽ ni pende rukuéra.
65Ha tetã apytépe jepe ndapepytu’uiva’erã ha pende pykuéra ndojohumo’ãi ipy pytu’u rendag̃ua, upépe Ñanderuete penemongyhyjéta, penembojepy’apýta ha penembotarováta,
66ha peguerekóta pende rekove ku mba’e oñesãingo reimínte ramoguáicha pene renondépe, ha peiméta kyhyjepópe ára ha pyhare, ha kyhyjepópe peikovéta pendepytupa peve.
67Ha pyharevekuépe pejéta: Mba’éicha tamora’e og̃uahẽ ka’aru, ha ka’aru vove pejéta: Mba’éicha tamora’e pyharéra’e ko’ág̃a; opaite ko’ã mba’e rupi penembopy’atutúta, pekyhyjeitereígui.
68 Bárcope Ñanderuete penemondo jevyva’erã Egíptope, pe tape Ha’e he’iva’ekue rehe peẽme: Araka’evéma ndapejuveimava’erã ha upépe ha’ekuéra penevendeséta tembiguái ramo penderehe ija’e’ỹvape, ndaiporimo’ãi katu pendejoguaséva.
Who We AreWhat We EelieveWhat We Do
2025 by iamachristian.org,Inc All rights reserved.
