Eclesiástes 9 - Biblia en Guaraní - ?anderuete ?e’? Por? 2015

1Añetehápe amoĩ che py’apýpe ko’ã mba’e ko’ãva amyesakã hag̃ua, umi heko potĩva ha iñarandúva rembiapokue, oĩmba Ñanderuete pópe; yvyariguakuéra ndoikuaaiete henonderãme, ndoikuaái ojohútapa mborayhu térã jejahéi.

2Opaite mba’e peteĩchaiténte ojehu opavavépe; peteĩ mba’énte ojehu upe heko porãvape ha upe hembiapo vaívape; upe ipotĩvape ha upe ipotĩ’ỹvape; upe oikuave’ẽvape ha upe oikuave’ẽ’ỹvape; upe oñe’ẽme’ẽvape ha upe okyhyjévape ome’ẽ hag̃ua iñe’ẽ.

3Ko mba’evai oĩ kuarahy guýpe ha ojehúva opavave renonderãme, ha ñande py’apy henyhẽ mba’evai ha ñañágui jaikove aja pukukue; ha ko’ã mba’e rire oho hikuái omanómava apytépe.

4Yvyariguakuéra oikove aja oĩ esperánza, peteĩ jagua oikovéva iporãve peteĩ leõ omanova’ekuégui.

5Umi oikovéva oikuaa porã omanotaha; umi omanova’ekue katu ndoikuaái mba’eve, ha noha’ãr­õvéima hembiapo repyrã; hesekuéra mandu’a opytapáma tesaráipe.

6Imborayhu, ipy’aro ha imba’epota oguepáma; ha araka’eve g̃uarã ndoguerekomo’avẽi mba’eve ojejapóva guive ko yvy apére.

7Tereho ha he’u ne rembi’u vy’apópe, ha embo’u ne víno py’a rorypópe; umi ne rembiapo ombohoryete Ñanderuetépe.

8Opaite árape teremonde ao morotĩ, ha tapia eiporu mba’e ryakuã porã ne akã rehe.

9Evy’áke nde rekovépe ne rembireko rehayhúva ndive, opaite nde arakuérape Ñanderuete ome’ẽva ndéve ko yvy apére ningo ne mba’etee ha ne rembiapo repy.

10Opaite mba’e nde rejapóva guive ejapo ikatumi háicha; pe omanova’ekue retãme nde rehotahápe ndaipóri tembiaporã, ndaipóri jepy’amongeta, ndaipóri akãguapy, ha ndaipóri arandu.

11Añembojere ha ahecha ko yvy apére, ndaha’éi umi iñakuãva og̃uahẽ voive, ha umi imbaretéva nombopoguy meméi, ha umi iñarandúva sapy’a nahembi’úi avei, ha umi iñakãguapývagui sapy’a opa avei ipirapire, ha umi iñe’ẽkuaáva sapy’a ndojohúi ñepytyvõ; opaite mba’énte ningo ojepoka (odepende) Ñanderuete rembipota ha itiémpo rehe.

12Yvyariguakuéra ndoikuaái avei hi’arakuéra; umi pira ojekutu háicha hu’ýpe, ha umi guyra ho’a háicha ñuhãme, peichaite yvyariguakuéra oha’ãrõ’ỹhágui ho’a avei jejopy vaípe.

13Ha ahecha avei ko arandu kóva yvy apére, ha mba’eguasuetévaicha chéve g̃uarã:

14Peteĩ táva michĩetéva ha mbovymi kuimba’e oiko ipype; ha ou sapy’a hi’ári peteĩ tetã ruvicha ndetuicháva, omongora ha omopu’ã ijerekue rehe tuichaicháva ñemo’ãha;

15ha pe tavapýpe oĩ peteĩ kuimba’e imboriahu ha iñarandúva ha ha’e osalva pe táva, iñarandu rupi; uperire katu avave naimandu’avéi pe kuimba’e mboriahumi rehe.

16Upéramo che ha’ékuri: Iporãiteve arandu pe mbaretégui, jepevémo pe imboriahúva arandu noñehendúi ha oñemboyke.

17Pe iñarandúva ñe’ẽ oñehenduseve py’aguapypópe, ovaleve pe tetã ruvicha sapukáigui ivýrova apytépe.

18Pe arandu iporãiteve umi tembiporu ñorãirõ meguágui; pe hembiapo vaíva katu ombyaikuaa heta mba’eporã.