Salmokuéra 57 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ umi oporomuñávagui - David purahéi okañy ramoguare itakuápe hetã ruvicha Saúlgui

1Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai.

2Amba’ejerure asy Ñanderuete Ipu’akaitévape, Ha’e chepytyvõ hag̃ua.

3Ha’e omboúta yvága guive chepytyvõva’erãva cheguenohẽ hag̃ua chejukaséva pógui, Ñanderuete omboúta iporiahuvereko ha oĩta chendive opaite árape. Selah

4Che rekove oĩ leõnguéra apytépe, cherayhu’yỹva apytépe, hãinguéra ojogua hu’y ha yvyra puku akuápe, ha ijuru ojogua kyse pukúpe.

5Reñemboyvate umi yvága ári, Nde, che Ruete, opaite yvy ape ári toĩ nde reko jajaipa pu’aka guýpe.

6Ñuhã ombosako’i hikuái chereity hag̃ua, yvykua ojo’o hikuái che renonderãme, ha’ekuéra voi katu ho’a ipype. Selah

7Chembopy’aguapymína, che Ruete, chembopy’aguapymína, apurahéi ha ambopu hag̃ua ndéve g̃uarã.

8Epáy che ánga, epáy che mbaraka ha che árpa pu rupi amombayséma pe ko’ẽtĩ.

9Che Jaraguasu, che romomba’eguasu tetãnguéra apytépe, che rogueropurahéi avei tetãnguéra apytépe.

10Nde poriahuvereko tuicha og̃uahẽ yvága guive, ha ne mborayhu ojepyso araíre.

11Reñemboyvate yvagakuéra ári, Nde, che Ruete, opa rupiete yvy ape ári toñemyasãi nde reko jajaipa.