2 Crónicas 36 - Biblia en Guaraní - ?anderuete ?e’? Por? 2015

Joacaz oiko tetã ruvicha ramo

1Upéramo tetãyguakuéra oiporavo Joacaz, Josías ra’ýpe, ha omoĩ tetã ruvicha ramo itúva rendaguépe, Jerusalénpe.

2Joacaz oguereko 23 áño oñepyrũvo oisãmbyhy ha mbohapy jasy oisãmbyhy Jerusalénpe.

3Ha pe Egípto retã ruvicha ombopoguy ichupe; ha Israelguakuéra ome’ẽ joava’erã ichupe 3.350 kílo pláta ha 33 kílo óro.

4Ha Egípto retã ruvicha omoĩ Eliaquim, Joacaz ryvýpe, Jerusalen ha Juda retã ruvicha ramo, ha ombohéra ichupe Joiaquim; ha Néco ojapyhy ityvýra Joacázpe, ha ogueraha ichupe Egíptope.

Joiaquim oiko tetã ruvicha ramo

5Joiaquim oñepyrũvo oisãmbyhy oguereko 25 áño, ha 11 áño oisãmbyhy Jerusalénpe; ha ojapo ivaíva Ñanderuete resa renondépe.

6Ha Nabucodonosor, Babilónia retã ruvicha ou ojeity hag̃ua hi’ári ha ombopoguy rire ichupe ogueraha ichupe Babilóniape jepokuahápe cadénape.

7Nabucodonosor ogueraha avei Babilónia retãme Ñanderuete róga rembiporukuéra, ha omoĩ itupão Babilónia peguápe.

8Ambue Joiaquim rembiapokue ahẽva ojapova’ekue, ha umi mba’e ojehuva’ekue ojehaipa Israel ha Juda retã ruvichakuéra rembiapo kuatiañe’ẽme; ha ita’ýra Joaquin oisãmbyhy hendaguépe.

Joaquin ojegueraha pokuapýpe Babilóniape

9Joaquin oguereko 8 áño oñepyrũvo oisãmbyhy, ha oisãmbyhy mbohapy jasy ha 10 ára Jerusalénpe; ha ojapo ivaíva Ñanderuete resa renondépe.

10Opa mboyve pe áño péva tetã ruvicha Nabucodonosor ombou hembiguaikuérape oguerahauka hag̃ua ichupe Babilóniape, umi mba’erepy Ñanderuete róga pegua reheve, ha omoĩ ityvýra Sedequíaspe Jerusalen ha Juda retã ruvicha ramo.

Sedequías oiko tetã ruvicha ramo

11Sedequías oguereko 21 áño oñepyrũvo oisãmbyhy, ha 11 áño oisãmbyhy Jerusalénpe.

12Ha ojapo ivaíva Ñanderuete resa renondépe ha noñemomirĩri proféta Jeremías renondépe, oñe’ẽva jepi ichupe Ñanderuete rérape.

13Ha’e opu’ã ñemi avei Nabucodonosor rehe, ome’ẽmava’ekue jepe iñe’ẽ Ñanderuete rérape; ha oñembohovahatã ha oñembopy’a’atã anive hag̃ua ojevy Ñanderuete, Israel Jára renondépe.

14Umi pa’i ruvicha ha tetãyguakuéra ombohetave avei iñaña reko, oikóvo umi tetã jepokuaa vai rapykuéri, ha omongy’a Ñanderuete rogaguasu, Ha’e ojapoukava’ekue Jerusalénpe oñemomba’eguasu hag̃ua héra.

15Ha Ñanderuete, ituvakuéra Jára, py’ỹinte ombou hendápe hembijokuáipe oavisa hag̃ua ichupekuéra, Ha’e oiporiahuverekógui hetãme.

16Ha’ekuéra katu oguereko umi Ñanderuete rembijokuái toryja ramo ha oñembohory hikuái iñe’ẽ ha iproféta rehe, ha péicha okakuaave ohóvo Ñanderuete pochy naipohãvéi peve.

Judaygua ojegueraha jepokuapýpe

17Upévare Ñanderuete ombou hi’arikuéra Caldéa retã ruvicha, ha ha’e ojuka kyse pukúpe umi karia’ykuérape, mitãrusu ha kuñataĩkuérape, itujáva ha ikangypámavape, Ñanderuete rogaguasúpe.

18Ha’e oguerahauka Babilóniape umi Ñanderuete róga rembiporukuéra, tuicháva ha michĩva, umi mba’erepyeta hogaguasu peguáva, ha avei umi mba’erepyeta tetã ruvicha róga pegua, ha umi mburuvicha róga pegua.

19Ha Babiloniayguakuéra ohapy Ñanderuete rogaguasu, upéicha ohundipa oĩva guive ipype, ha ojokapa Jerusalen táva tápia yvate, ha ohundipa tata rupi umi ogaguasukuéra.

20Umi kyse pukúgui okañymava’ekue ojeguerahapa jepokuahápe Babilóniape, oiko hag̃ua Nabucodonosor rembiguái ramo ha iñemoñarenguéra rembiguái ramo, umi Persiaygua ojupi peve tetã ruvichaguasu ramo Babilóniape.

21Upéicha ojehu Ñanderuete ñe’ẽ Ha’e he’imava’ekue Jeremías juru rupi, pe yvy ohupity jevy peve pe pytu’u arakuéra noñeme’ẽiva’ekue, oñemboty peve 70 áño (Jeremías 25,11).

Círo ñe’ẽ

22Ha Círo, pe Pérsia retã ruvicha oisãmbyhy ramo peteĩ áño rupi, oiko Ñanderuete ñe’ẽ Ha’e he’iva’ekue Jeremías juru rupi, Ha’e omombáy Círo, Pérsia retã ruvicha pytu, ha’e omoherakuãuka hag̃ua opaite tetãnguéra opytáva ipoguýpe he’ívo,

23péicha he’i Círo: Pérsia retã ruvicha, Jahve (Ñanderuete), yvagakuéra Jára, ome’ẽkuri chéve umi tetã yvy arigua; ha Ha’e he’i chéve amopu’ã hag̃ua ichupe hogarã Jerusalénpe, oĩva Juda retãme. Upévare Israelguáva guive tojupi jevy Jerusalénpe, ha Ñanderuete, Israel Jára, tomoirũ ichupekuéra.