1Che ánga omomba’eguasu Ñanderuetépe, che py’aite guive amboete héra porãite.
2Emomba’eguasu nde, che ánga, che Ruetépe, ha ani nderesarái imba’e porãitégui.
3Ha’e omopotĩ ne rembiapo vai, Ha’e omonguerapa ne mba’asykuéra.
4Ha’e oguenoh… nde rekove ñemanógui, Ha’e neñu’ã imborayhu ha iporiahuverekópe.
5Ha’e omyenyhẽ nde rekove mba’eporãgui ha Ha’e nemomitã jevy ku ñapykanícha.
6Ñanderuete oiporu justícia, ha hekoitépe oipytyvõ avei umi ojejopy vaívape.
7Ñanderuete omombe’u Moiséspe hapekuéra ha Israel ra’ykuérape ohechauka hembiapo techapyrãva (milágro).
8Ñanderuete oiporiahuvereko ha ipy’aporã, hasy ipochy hag̃ua, ituicha ningo iporiahuvereko.
9Ndoporohaviramo’ãi opaite árape ha ndaipochymo’ãi tapia g̃uarã.
10Nomyengoviái ñandéve ñane rembiapo vai ojerure háicha, ha ndohepyme’ẽi ñandéve ñane ñañangue ojerure háicha.
11Umi yvága ijyvate háicha ko yvy árigui, peichaite iporiahuvereko ituicha umi ichugui okyhyjévape g̃uarã.
12Kuarahyresẽ imombyry háicha kuarahyreikégui, péicha Ha’e omomombyry ñandehegui ñande reko ñaña rembiapo vai.
13Pe túva oiporiahuvereko háicha ita’yrakuérape, péicha Ñanderuete oiporiahuvereko umi ichugui okyhyjévape.
14Ha’e oikuaa voi mba’eichaguaitépa hína ñande, ha oikuaa porã voi ñande yvy timbonteha.
15Kuimba’e ha kuñakuéra arakuéra ha’ete ku ñanáicha, ha ipoty ku yvoty ñu rupiguáicha.
16Oipeju hatã ramo pe yvytu opa reíta pe yvoty, ha hendague jepe ndojekuaavéima.
17Ñanderuete mborayhu katu oĩ peteĩ ára atyguasu guive ambue ára atyguasu peve umi okyhyjéva ichugui ndive, ha ijustícia opyta iñemoñarenguéra peve,
18umi ojapóva guivénte iñe’ẽme’ẽ, ha umi imandu’áva hembiapoukapy rehe ojapo hag̃ua hekoitépe.
19Ñanderuete omohenda hatã iguapyhaguasu yvágape ha imburuvicha pu’aka oisãmbyhy opaite mba’e ojapóva guive.
20Pemomba’eguasu Ñanderuetépe, peẽ angelkuéra imba’éva guive, peẽ pendepy’aguasu mbaretéva ha pejapóva guive iñe’ẽ, peẽ peneñe’ẽrendu porã hembiapoukapy he’ívape.
21Pemboete Ñanderuetépe, mayma peẽ ángel atykuéra, peẽ mburuvichakuéra ha peẽ pejapóva guive hekoitépe hembipota.
22Pemomba’eguasu Ñanderuetépe, hembiapokue guive, opaite tenda rupi Ha’e oisãmbyhýva. Emboete, che ánga, Ñanderuetépe.
Who We AreWhat We EelieveWhat We Do
2025 by iamachristian.org,Inc All rights reserved.
