Ezequiel 7 - Biblia en Guaraní - ?anderuete ?e’? Por? 2015

Pe ára paha katuete oúta

1Ou chéve Ñanderuete ñe’ẽ, ha he’i:

2Nde, kuimba’e ra’y, péicha he’i pende Ruete Israel retãyguakuérape: Pe ára paha oúta umi irundy yvy ykeguioguáva.

3Ág̃a og̃uahẽtama pende ára paha, ha añohẽta pendeári che pochy, ha ambojovakéta pende reko vai; ha pendeári amoĩmbaitéta opaite pene rembiapo vaikue.

4Ha che resa napoperdonamo’ãi, ha ndapoiporiahuverekomo’ãi; upéicha rãngue amyengoviáta pene rembiapo vaikue ha pene ñaña reko ho’áta pendeári, ha peikuaáta Cheha pende Ruete.

5Péicha he’i pende Ruete: Peteĩ jehasa asy ohasa rire, katuete ojoapykuéri oúta ambue jehasa asy.

6Og̃uahẽmbotáma upe ára paha, upe ára paha outamahína; penembohasa asy hag̃ua peẽme, upe ára paha opáyma.

7Upe ko’ẽ outamahína peẽme g̃uarã, peẽ peikóva ko yvy apére, oútama upe ára, hi’ag̃uietéma upe ko’ẽ; sarambi guasu oĩta upe ára upévape ha pe vy’a guasu ojeíta umi cérrogui.

8Pya’e añohẽta pendeári che pochy aguenohẽmba peve, Che ambojovake hag̃ua pene rembiapo vaikuéra, aitýta pendeári che jehavira.

9Che amboykéta che resa ha ndapoiporiahuverekomo’ãi; katuete amyengoviáta pene rembiapo vaikue ha pene ñaña reko ho’áta pendeári, peikuaa hag̃ua Che ha’eha pende Ruete pohaviráva.

10Ema’ẽ porãke, péva ningo upe ára, péina ápe ouhína; og̃uahẽma upe ko’ẽ; yvyarigua reko vai ipotýma ha iñembotuicha og̃uahẽma.

11Pe ñorãirõ okakuaahína ñana ra’ýicha heko ñañáva rekovépe, nahembymo’ãi katu mba’eve umi mba’erepy ombyatývagui ha ijapytépe ndaiporimo’ãi ojahe’óva.

12Oúma upe ára, hi’ag̃uíma upe ko’ẽ, aníke ovy’átei upe ojoguátava térã upe ovendétava, ani hasẽtei, Ñanderuete pochy oĩ mokõivéva aty ári.

13Upe ovendéva ndohupitymo’ãvéi imba’ekue, oikove puku ramojepe; che pochy ndoguemo’ãi, ha’ekuéra oñembotuicha ha avave ndojokói haguére heko vai, (Levítico 25,14-28).

14Oñembopuva’erã pe turu ha oñembosako’ipáta, avave ndohomo’ãi katu ñorãirõme che pochy oĩgui ijatykuéra ári.

15Okáguio ou kyse puku, ha hyepýguio oĩ mba’asy iñasãiva ha ñembyahýi; umi ñúme oĩva omanóta kyse pukúpe, ha ñembyahýi ha mba’asy oñemosarambíva ojukáta umi oĩvape táva ryepýpe.

16Ha umi okañykuaáva umi mba’evaígui oikóta umi cérro rupi, pykasu ñu rupiguáicha, ipyahẽ asy joaitéta oiko hikuái iñaña rekógui.

17Ikangypágui ho’apáta, ijyva ha henypy’ãnguéra oryryipáta okyhyjégui.

18Ojeku’akuáta hikuái ao vosakuépe, hovakuéra oñemondyietéta, otĩ joáta ha mayma iñakãnguéra iperõmba joáta.

19Tapére omombopáta ipláta ha hi’óro oitýta yty ramoguáicha; ipláta ha hi’óro rupi Ñanderuete nomboykemo’ãi ipochy árape. Ipláta pota nomohyg̃uatãmo’ãi ichupekuéra ha nomyenyhẽmo’ãi hyépe; ipláta potaiterei voi ningo heko ñañáva rapo, (1 Timotéope 6,10).

20 Ipláta ha hi’órogui ojapo ijeguaka mimbi ha umía rupi oñembotuicha ohóvo ha ipahápe ojapo hikuái ijeguaka mimbígui ijára gua’u ra’ãnga, upévare ijeguaka mimbívagui Che ajapóta yty atýra.

21Tetã ambueygua omondapáta ijára gua’u ra’ãnga ha umi tekove vai oguerahapa reíta omongy’apa hag̃ua.

22Ha Che amboykéta che rova ichuguikuéra, ha ahejáta oñemongy’a hag̃ua che rogaguasu mba’erepy ha mondahakuéra oguerahapáta mbaretépe.

23Ejapo heta cadéna, pe yvy henyhẽgui oporojukávagui, ha pe táva henyhẽgui oñorãirõvagui.

24Upévare Che aguerúta umi tetã iñañavévape, oñemomba’e hag̃ua hogakuéra rehe; ha ambopaháta ipoguasukuéra ñembotuicha ha Che amongy’aukapáta henda marangatukuéra.

25Outahína ñehundi; ha’ekuéra ohekáta py’aguapy, ndojohumo’ãi katu hikuái.

26Oúta jepy’apy vai, ha jehasa asy ojoapykuéri; upéramo reiete ohekáta proféta ñe’ẽ, ipa’ikuéra ndive ndojohumo’ãi ñemoangapyhy, hi’ancianokuéra nohekombo’emo’ãvéi ipy’andýigui.

27Hetã ruvicha oñembyasyete, mburuvichakuéra oñemondyipáta ha tetãyguakuéra po oryryipa joáta; amyengoviáta hembiapo vaikue; ha’ekuéra ombojovake haguéicha, Che ambojovake jevýta ichupekuéra; ha oikuaáta Che aikoveha tapia g̃uarã.