Provérbios 6 - Biblia en Guaraní - ?anderuete ?e’? Por? 2015

Ani rejerovia oimeraẽ nde rapicháre

1Che ra’y, reme’ẽ ramo ne ñe’ẽ nde rapicha rehe nde repagátaha icuénta ha’e ndikatúi ramo opaga, térã rejerovia ramo oimeraẽva rehe,

2ne ñe’ẽme rejejura, ha repytáta ñapytĩmbyre ne rembe he’iva’ekue rupi.

3Eñeha’ãmba, che ra’y, rejepoi peve, re’águi nde rapicha pópe; upévagui tereho, eñemomirĩete, ha ejerure asy nde rapichápe, rejohu peve sãso (libertad).

4Ani reheja nde resakuéra oke, ha ani reheja nde ropépi oñemboty;

5ekañy ichugui ku guasu okañy háicha pe mymba apihágui, ha guyra okañy háicha ñuhã omoĩva pógui.

6Ema’ẽna pe tahýi rehe, nde neate’ỹva, ema’ẽ hapekuéra rehe, ha eñemoarandu,

7oguereko’ỹre mburuvicha térã isãmbyhyhára, térã peteĩ omyakãva ichupekuéra.

8Ára haku aja ombosako’i hembi’urã, ha kóga ra’ỹingue ñemono’õha árape omono’õmahína hembi’urã.

9Nde neate’ỹva, araka’e peve piko reñenose. Araka’épa repu’ãta nde rupágui.

10Michĩmive reñeme’ẽse topehýipe, michĩmi rekeseve ha sapy’aitemi rembojuasase nde po repytu’umive hag̃ua,

11péicha og̃uahẽva’erã ne remikotevẽ ára, ha ku mondaháicha og̃uahẽta avei ne mboriahu ararã.

12Pe tekove ñaña ha pe heko vaíva oiko ijuru tie’ỹ ñañáme.

13Oñe’ẽ hikuái hesa, ipy térã ikuã rupi.

14Tie’ỹ ñaña reko oĩ ipy’apýpe, oiko ojepy’amongeta ohóvo mba’evai rehe ha omyasãi ñorãirõ hapichakuéra apytépe.

15Upévare oha’ãrõ’ỹre ouva’erã ichupe iñehundi ha iñemanorã, ha noĩveimava’erã pohã ichupe g̃uarã.

16Ñanderuete ipy’aro 6 mba’e rehe ha pe 7-ha ombojeguaruete hi’ángape:

17Umi tesa oñembotuicháva, pe juru ijapúva, umi po oñohẽva heko potĩva ruguy,

18upe ipy’apýpe omoheñóiva ñaña reko, umi py pya’ete oñaníva ojapo hag̃ua mba’evai,

19pe techahare ijapúva, ha upe omyasãiva juavy ojoyke’ykuéra apytépe.

Myakãratĩ reheguáva

20Ejapókena, che ra’y, pe nde ru he’íva ha ani repoítei nde sy remimbo’égui.

21Umía eñapytĩ tapiaite nde py’apy (korasõ) rehe, ha eiporu nde ajurigua ramo.

22Umía nesãmbyhyva’erã nde reikoha rupi ha oñangarekova’erã nderehe reke aja, ha oñe’ẽva’erã nendive repáy jave.

23Tataindy ningo hembiapoukapy ha mba’e ohesapéva ningo hekombo’e, ha ijeja’o nerekombo’e reguata porã hag̃ua pe tekove rapére,

24reñemomombyry hag̃ua pe kuña ñañágui, ha pe kuña reikuaa’ỹva ñe’ẽ he’ẽ asývagui.

25Ani rehecharamo nde py’apýpe iporãngue, ha aníke ha’e neapytĩ ima’ẽme.

26Peteĩ kuña heko vaíva oñeme’ẽ peteĩ pan repy rehe, pe tapicha rembireko oikóva ambue kuimba’e ndive oity ñuhãme upe kuimba’e ánga.

27Mávapa oguerahakuaa tata ikasõme okai’ỹre ijao.

28Oguatánepa peteĩ kuimba’e tatapỹi ári, ipykuéra okai’ỹre.

29Peichaite hína pe og̃uahẽva hapicha rembireko rehe, ndopyta reíriva’erã pe opokóva hese, katuete ojehavirava’erã.

30 Noñepenaguasúi ningo pe mondaha rehe omonda ramo ombogue hag̃uánte iñembyahýi.

31Ha ojejohu ramo ichupe omonda jave, ome’ẽva’erã hepykue ári 7 jevyve; upéicha ome’ẽmbaiteva’erã hogapýpe oguerekomíva guive.

32Ha upe oikóva kuña omendáva ndive itavyetereirasa; upe omanosévante ojapo ko mba’e kóva.

33Ñenupã ha ñemotĩ oikova’erã, ha ñemotĩ ohasa’ỹva araka’eve ndogueiva’erã.

34Upe kuimba’e hakate’ỹva hembireko rehe ipochyetereíta oikuaa vove ha’e ombotavy hague ichupe.

35Ndoipotamo’ãi mba’eveichagua mba’e heta ramojepe, ha noperdonamo’ãi remboheta hetave ramojepe nde jopói.