1Abías omano rire, oñeñotỹ ichupe itúva David távape; ha ita’ýra Asa oisãmbyhy hendaguépe ha Asa oisãmbyhy aja, hetã opytu’u porã 10 áño pukukue.
2Ha Asa ojapo mba’e porã ha hekojojáva Ñanderuete, Ijára resa renondépe.
3Oipe’águi umi kuave’ẽmby renda oñemomba’eguasuhápe ambue járape, umi yvy yvatépe; ojokapa ha ombyaipa Asera ra’ãngakuéra.
4Ha he’i Judayguakuérape oheka hag̃ua Ñanderuetépe, ituvakuéra Járape, ha ojapo hag̃ua hekoitépe iñe’ẽ ha hembiapoukapy.
5Oipe’apa avei opaite Juda tavakuéragui umi ñemomba’eguasu yvy yvatépe ha ta’ãngakuéra; ha hetã oiko pytu’upópe, ha’e oiko aja pukukue tetã ruvicha ramo.
6Ha’e omombarete umi táva Juda retãme, oĩgui pytu’u ha ndaipórigui oñemoĩva hese ha’e oisãmbyhy aja, Ñanderuete voi ome’ẽgui ichupe pytu’u porã.
7Upévagui Asa he’i Judayguakuérape: Ñamombarete ha ñamongora ñande tavakuéra tápia yvate óga yvate, reheve ha ñamoĩ okẽnguéra ha iñembotyhakuéra, ko yvy ningo ñane mba’ete voi jahekágui Ñanderuetépe; jahekágui ichupe, Ha’e ome’ẽ ñandéve pytu’u opa rupiete. Upéicha omombarete hikuái itavakuéra ha osẽ porãmba ichupekuéra.
8Asa oguereko avei soldádo aty oguerúva hetemo’ãha ha yvyra puku akua (lánza): Judayguáva oĩ 300.000 ha Benjamingua 280.000 kuimba’e oguerúva hetemo’ãha ha oipysóva guyrapa, opavavete kuimba’e ikatupyrýva memete.
9Ha osẽ ichupekuéra Zera, Etiopía ruvicha, peteĩ soldádo aty oguerekóva 1.000.000 soldádo ha 300 cárro reheve, ha ou Maresa peve.
10Upémaramo Asa oho oñemoĩ ñorãirõrãicha Sefata yvyty pa’ũme, Maresa ypýpe.
11Ha Asa ojerure asy Ñanderuete, Ijárape, ha he’i: Che Ruete, ndéve g̃uarã ndaipóri ikatu’ỹva, reme’ẽkuaa ñepytyvõ ipu’akapáva térã ipu’aka’ỹvape g̃uarã. Orepytyvõmína, ore Ruete, ore Jaratee, nderehe ningo rojerovia ha nde rérape roju ko soldádo atýpe. Nde ningo ore Ruete, ore Jára, aníke yvyariguakuéra ipu’aka nderehe.
12Ha Ñanderuete omosarambi Etiopiayguakuérape, Asa ha Judayguakuéra renondégui; ha okañymba hikuái.
13Asa ha hetãygua oĩva hendive omuña ichupekuéra Gerar peve; ha Ñanderuete voi omosarambi isoldádo atyguasúpe. Ha ichuguikuéra ojapyhy hikuái hetaiterei tembiporu.
14Ondyry avei hikuái opaite tavakuéra rehe oĩva Gerar jerekuévo, Ñanderuete ñemongyhyje ho’águi hi’arikuéra; ha ogueraha hikuái heta mba’e repy ojohúva itavakuérape.
15Ondyry avei umi oikóva óga rymba pirekueguigua rehe ha ogueraha hikuái heta ijovecha ha icaméllo, ha upéi oho jevy Jerusalénpe.
Who We AreWhat We EelieveWhat We Do
2025 by iamachristian.org,Inc All rights reserved.
