Números 5 - Biblia en Guaraní - ?anderuete ?e’? Por? 2015

Umi oñemongy’áva guive ojepe’ava’erã Israel rekohágui

1Ñanderuete oñe’ẽ Moiséspe ha he’i:

2Ere Israel ñemoñarenguérape oipe’a hekohágui umi ijai pochývape (ilépravape), ha mayma imba’e tykývape ikérape ha mayma opokova’ekuépe te’õngue rehe.

3Taha’e kuimba’e térã kuña, ojepe’ava’erã, ijatyha rendágui oka gotýo, ani hag̃ua omongy’a hikuái pe tenda Che aikohápe.

4Upémaramo Israel ñemoñarenguéra oipe’ava’erã hekohágui umívape; Ñanderuete he’i haguéicha Moiséspe, upéicha Israel ñemoñarenguéra ojapopa avei.

Tembiapoukapy ñemyengovia rehegua

5Ñanderuete oñe’ẽ Moiséspe ha he’i:

6Ere Israel ñemoñarenguérape: Oimeraẽ angaipa, kuimba’e térã kuña ojapóva, nomomba’éigui pende Ruetépe,

7upe tapicha omombe’uva’erã hi’angaipa ojapova’ekue, omyengoviapava’erã umi mba’e ijára ohundiva’ekue hembiapo vaikue rupi, ha omoĩveva’erã hi’ári 20 por ciénto ha ome’ẽmba jevyva’erã ijárape.

8Ha pe tapicha péva omanóma ramo ha ndahogayguái ramo omyengovia hag̃ua, upéicharamo oñeme’ẽmbava’erã pa’ípe, pende Ruete rendaguépe, ha hi’ári oikuave’ẽveva’erã peteĩ ovecha mácho oñemoĩ porã jevy hag̃ua pende Ruete ndive.

9Upéicha avei opaite me’ẽmby Israelguakuéra ome’ẽséva pende Ruetépe g̃uarã, togueru pa’ípe, ha opytáta imba’e ramo.

10Ha oimeraẽ me’ẽmby oñeme’ẽva pende Ruetépe g̃uarã, opyta pa’i mba’erã; upéicha oimeraẽ mba’e ojereraháva pa’ípe, imba’erã voi. Mba’épa ojejapova’erã peteĩ ména oguerovia’ỹva hembirekópe.

11Ñanderuete oñe’ẽ Moiséspe ha he’i:

12Eñe’ẽ Israel ñemoñarenguérape ha ere ichupekuéra: Oimeraẽ tembireko oñemboheko vai ramo ha ombotavy ramo iménape,

13ha oĩ ramo oñenóva hendive ha iména ndohechái, oñemongy’águi ichugui ñemiháme, ha ndaipóri ramo avave ohecháva ichupekuéra, ha avave ndojohúi ichupe hembiapo vaihápe;

14ha iména oñandu ramo hi’angapýpe hembireko ombotavy hague ichupe, ha añetehápe hembireko ombotavýra’e ichupe; térã oñandu reínte ramo ombotavyha ichupe, ha hembireko añetehápe noñemongy’áira’e;

15upéicharamo iména ogueruva’erã hembireko pa’i rendápe, ha ogueruva’erã avei ikuave’ẽmby 2,2 lítro cebáda ku’i (ojoguáva trígope), nomoĩva’erãi hi’ári acéite ha nomoĩva’erãi hi’ári mba’e ryakuã porã, upéva kuave’ẽmby ñembotavy reheguáva, kuave’ẽmby ohechauka hag̃ua kuña hembiapo vaípa térã nahániri.

16Ha ojegueru ramo pa’i rendápe, ha’e omohendava’erã ichupe pende Ruete renondépe.

17Ha upéi pe pa’i ojapyhýta pe y oñemboykéva pende Ruetépe g̃uarã peteĩ járro ñay’ũguiguávagui; ha pe pa’i ojapyhýta avei pe yvytimbo oĩva pe óga jojohuhápe, ha oityva’erã ýpe.

18Ha pe pa’i omoñembo’yva’erã pe kuñáme pende Ruete renondépe, upéi ojorava’erã pe kuña akãrague, ha omoĩva’erã pe kuña pópe pe kuave’ẽmby ohechauka hag̃ua kuña rembiapo vai, upéva hína kuave’ẽmby ñembotavy reheguáva; ha pe pa’i oguerekova’erã ipópe pe y iróva oguerúva maldición (hembiapo ivai ramo).

19Upéi pe pa’i toñe’ẽ pohýi pe kuñáme, ha he’iva’erã ichupe: Avave ndokéi ramo nendive, ha nereñemboykéi ramo ne ménagui reñemoangaipa hag̃ua, ko y iróva ndoguerumo’ãi ndéve g̃uarã maldicion;

20ha oime ramo reñemboheko vaíra’e ha reñemongy’a, ha nde reiko ne mena’ỹva ndive,

21ko maldicion ñe’ẽ ojáta nderehe, ha he’iva’erã pe kuñáme: Ñanderuete tanemaldeci ha tanembohekomeg̃ua ne retãygua apytépe, Ñanderuete tomokangy ne rumby ha tomboruru nde rye;

22ha ko y oguerúva maldicion toike nde retepýpe, ha tomaldeci ne rumby ha nde rye. Ha pe kuña he’iva’erã: Taupéicha, taupéicha.

23Upéramo pe pa’i ohaiva’erã ko maldicion kóva peteĩ kuatiañe’ẽme, ha ombogueva’erã iletrakuéra pe y iróvare;

24ha omboy’ukava’erã pe kuñáme pe y iróva ogueru hag̃ua maldicion, ha upe y oporomomaldecíva oikéta ipype oipy’apy asy hag̃ua ichupe.

25Upéi pe pa’i ojapyhyva’erã pe kuave’ẽmby ñembotavy reheguáva pe kuña pógui, ha omyatymoiva’erã pende Ruete renondépe, ha oikuave’ẽva’erã kuave’ẽmby renda ári.

26Ha pe pa’i ojapyhyva’erã pe kuña kuave’ẽmbýgui peteĩ po renyhẽngue, ha ohapyva’erã pe kuave’ẽmby renda ári, ha upéi omboy’ukava’erã pe kuñáme pe y.

27Ha omboy’ukava’erã ichupe pe y; ha ha’e oñemoangaipa ramo ha ombotavy ramo iménape, pe y ogueruva’erã ichupe maldicion, ha oike rire ipype oipy’apy asýta ichupe, ha humby ikangyva’erã ha hye iruruva’erã; ha pe kuña oikova’erã maldicion ramo hetãyguakuéra apytépe.

28Ha pe kuña oime ramo noñemoangaipáira’e, ha ipotĩhína, upéicharamo ndojehumo’ãi ichupe mba’eve, ha imemby jevyva’erã.

29Kóva ha’ehína tembiapoukapy ñembotavy reheguáva, pe kuña ombotavy ramo iménape, ha oñemongy’a ramo.

30Ha pe ména icelósova ha oimo’ãva hembireko ombotavyha ichupe, ha’e oguerahava’erã hembireko pende Ruete renondépe ha pe pa’i ojapova’erã hese ko’ã tembiapoukapy he’i háicha.

31Añete ramo, ndojái mba’eve iména rehe, hembireko rehe katu oja hi’angaipa (hembiapo vaikuéra rupi).