Oséas 2 - Biblia en Guaraní - ?anderuete ?e’? Por? 2015

Israel oñemoĩ Ñanderuete rehe

1Pejéta pende ryvykuérape: Peẽ ningo pende Ruete retã; ha peje pene reindykuérape: Ñanderuete penderayhuha.

2Ñanderuete he’i: Peñemoĩ pende sy rehe, ha’e ndaha’evéigui che rembireko, ha che ndaha’evéigui iména; tojei ikuña reko vaígui ha tomombo umi mba’e oĩva hova ha hetére, ohechaukáva ikuña reko vaiha.

3Ýrõ Che amboíta ichupe opyta hag̃ua opívo, onace haguéicha ha ajapóta ichugui yvy perõ ha oiko rire yvy perõme Che ajukáta ichupe y’uhéigui.

4Che ndaiporiahuverekomo’ãvéima imembykuérape, umía kuña reko vai membyrégui,

5isy peteĩ kuña reko vaíva ha ha’e oñemongy’a haguére ha otĩ’ỹre he’i: Che aháta che rembiayhuharakuéra rendápe ome’ẽ hag̃ua chéve pan ha y, ovecha rague ha inimbo, acéite ha víno.

6Upévare ambotýta haperã ñuatĩ ha ita reheve, anive hag̃ua ojohu hape po’i.

7Ha oñani ramojepe hembiayhuharakuéra rapykuéri ndohupitymo’ãi ichupekuéra, oheka ramojepe ichupekuéra ndojohumo’ãvéima ichupe upéramo he’íta che ajevýta che ména ypykue rendápe, upépe che aiko porãveva’ekue ko’ag̃aguágui,

8ha’e ohechakuaa rãngue Che voi ame’ẽ hague ichupe trígo, víno, acéite, pláta ha óro, umía ningo che jopói, ha’e katu oiporu vaipa umía ha oikuave’ẽ ambue jára gua’úpe, hérava Baal.

9Upévare Che aju jevýta araha jevy hag̃ua che trígo ha che víno, peteĩ ára Che aiporavótava, aipe’apa jevýta pe ovecha rague ha che inimbo ame’ẽva’ekue ichupe omo’ã hag̃ua hete opívova.

10Ko’ag̃a katu Che ahejáta hete opívo hembiayhuharakuéra renondépe, ha avave noguenohẽmo’ãi ichupe che pógui.

11Ambopaháta ivy’a, ijasy ra’ykuéra, isabadokuéra ha opaite hi’aretekuéra.

12Ha Ñanderuete he’ive: Ambyaíta iparralty ha hi’igokuéra, ha’e he’ígui umía rehe: Ãva ningo che rembiapo repy, che rembiayhuharakuéra ome’ẽva’ekue chéve. Ajapóta ichuguikuéra ñuatĩndy ha mymbakuéra ñu megua ho’upáta.

13Che ahaviráta ichupe ohapy haguére mba’e ryakuã porã Baalkuérape g̃uarã ha omoĩ heta ijeguaka hetére ha ohómi haguére hembiayhuharakuéra rapykuéri, ha hesarái chehegui he’i pende Ruete.

14Péina ápe Che añemongeta jevýta hendive ha araháta ichupe desiértope ha añe’ẽta ipy’apýpe.

15Upéramo ame’ẽ jevýta ichupe iparraltykuéra ha Acor ñúgui ajapóta peteĩ jeporiahuvereko rokẽ ichupe g̃uarã ha upépe iñe’ẽrendu jevýta imitãrusukuéra, osẽ ramoguaréicha Egípto retãgui.

16Ha upe ára upévape Ñanderuete he’i: Ha’e chembohérata: Che ména; ha nachemboheravéima, Che Baal.

17Che aipe’átagui ijurúgui Baal réra, ha araka’eve ndoje’emo’ãvéima héra.

18Upe ára upévape Israel rehehápe añembopy’apeteĩta mymba ñu megua ndive, guyra ovevéva ha mboikuéra ndive, otyryrýva yvýre, ha amopẽta ha aipe’áta ijyvýgui guyrapa, kyse pukuete ha ambue ñorãirõ rembiporukuéra, ha’ekuéra oiko hag̃ua py’aguapýpe hetãteépe.

19Ha Che amendáta Israel rehe opaite ára peve g̃uarã, roiko hag̃ua oñondive justícia ha ñembojovake hekoitépe, poriahuvereko ha mborayhu añetévape.

20Ha nde che rembirekóta tapia g̃uarã ha reikuaáta añetehápe Che ningo nde Rueteha.

21Ha upe ára upévape pende Ruete he’i: Che ajapysakáta pe yvága ojeruréva rehe ha pe yvága ome’ẽta pe yvy ojeruréva guive.

22Ha pe yvy omongakuaáta trígo, víno ha acéite ha umía ombovy’áta Jezreélpe.

23Ha añotỹta che mba’erã ko yvýpe ha ahayhúta Loruhámape ha ha’éta Loamípe: Nde che retãtee ha ha’e he’íta chéve: Nde che Jaratee, che Ruete.