1 Timotéope 3 - Biblia en Guaraní - ?anderuete ?e’? Por? 2015

Mba’éichapa oikova’erã umi omoakãva peteĩ Hesu Crísto iglésia (anciáno

)

1Ko ñe’ẽ kóva añete: Upe omyakãséva peteĩ iglésia, oipota tembiapo (cárgo) porãva.

2Ha’e oikova’erã oñeñe’ẽvai’ỹ hag̃uáicha hese, hembireko peteĩnteva’erã, ojejokokuaava’erã, oñemomirĩkuaava’erã, heko porãva’erã, imbohupakuaava’erã, oporombo’ekuaava’erã,

3ndoka’uiva’erã, noporonupãiva’erã, ipy’a porãva’erã uvei, noñorãirõseiva’erã, ipirapire rayhu’ỹva’erã,

4oguerekokuaa porãva’erã hogayguáva hekópe, oguerekova’erã ita’ýra ha itajyrakuéra ipoguýpe hekopete katu.

5Upe oguerekokuaa’ỹva hogatee, mba’éichapa oñangarekokuaáta peteĩ Hesu Crísto iglésia rehe.

6Anítei peiporavo peteĩ hermáno ojeroviaramóvape omyakã hag̃ua peteĩ Hesu Crísto iglésiape, ani hag̃ua ha’e oñembotuicha ha ho’a Satana ñembojovaképe (poguýpe).

7Oñe’ẽporãva’erã hese avei umi ojerovia’ỹva apytépe, anítei umía oñe’ẽvai hese ha ha’e ho’a Satana ñuhãme.

Mba’éichapa oikova’erã umi oipytyvõva (diácono

) iglésia

rembiapópe

8Umi pytyvõhára (diácono) heko potĩva’erã, anítei iñe’ẽmokõi, anítei ho’u heta víno térã ambue mba’e omonga’ukuaáva ichupe, anítei ohayhu ha oheka hekope’ỹ pirapire.

9Ha’e oñangareko porãva’erã pe mbo’epy ñemiha jerovia reheguáva, ipy’apyñe’ẽ (conciéncia) potĩ reheve.

10Ambuekuéra oha’ã (oaprova) porã raẽva’erã ko’ã mba’e hekovépe, ha ndojohúi ramo mba’eve ivaíva oikokuaa iglésia pytyvõhára ramo.

11Upéicha avei umi kuñakarai omba’apóva iglésia pytyvõhára ramo heko potĩva’erã, ani oporomoĩ vaise avavépe iñe’ẽguata rupi, ani ikuña remiandu vai oisãmbyhy hekove, ipy’a porã ha heko potĩva’erã uvei opavave ndive.

12Pe iglésia pytyvõhára (diácono) hembireko peteĩeteva’erã, ha’e oisãmbyhykuaava’erã ita’ýra, itajýra ha hogayguakuérape.

13Umi pytyvõhára omba’apo porãva okakuaa porã ijeroviápe, ha Hesu Crísto ohechakuaahína tembiapo porã ojapóva hikuái.

14Ko’ã mba’e che ha’euka ndéve ko kuatiañe’ẽ rupi sapy’árõ g̃uarã ndaikatúi ramo aju pya’e, nde voi reikuaa porã hag̃ua avei.

15Hesu Crísto iglésia añeteguáva ojehechauka ijiglesiaygua heko porã rupi. Hesu Crísto iglésia ningo Ñanderuete oikovéva róga voi, ha Hesu Crísto iglésiape ojejohuva’erã pe añetegua, ha péva ári ningo oñemopu’ãva’erã pe iglésia ha pe añetegua péva rehe ojejokova’erã.

16Añetehápe mba’e tuichaitereíva ko’ã mba’e ñemi (ojehechaukamava’ekue umi ojeroviávape Hesu Crísto rehe): Hesu Crísto ojehechaukava’ekue yvyarigua retépe, Ha’e oiko katu heko potĩva ramo ipytu porãme. Ha’e ojehechaukava’ekue yvága rembiguaikuérape (angelkuérape), oñemyasãiva’ekue tetãnguéra apytépe, tetãyguakuéra ojerovia hese, ha upéi Ñanderuete ohupi Hesu Crístope heko jajaipa oĩháme.