Colosayguakuérape 4 - Biblia en Guaraní - ?anderuete ?e’? Por? 2015

Patron

ha tembiguái

1Peẽ jára yvy arigua (patron) peiko hekópe pene rembiguaikuéra ndive, peikuaa porãke pende Jaraite oikoha avei yvágape.

2Peñembo’e penekangy’ỹre, peñangareko pendejehe ha peagradece Ñanderuetépe.

3Peñembo’e avei orerehe, Ñanderuete oipe’a hag̃ua peteĩ okẽ ikatu hag̃ua romombe’u iñe’ẽ ha romyasãi Hesu Crísto mba’e ñemimby (secréto), upévare che aĩ avei cárcelpe.

4Che amyasãi porã hag̃ua Ñanderuete ñe’ẽ Ha’e ohechauka haguéicha chéve, ha Ha’e omombe’u haguéicha chéve.

5Arandupópe peiko umi ojerovia’ỹva apytépe ha peiporu porã pe oportunidad Ha’e ombosako’íva peẽme.

6Peñe’ẽ py’aporã reheve pende rapicha ndive pemopu’ã hag̃uáicha ichupe, peikuaa porã hag̃ua mba’eichaitépa pembohovaiva’erã peteĩteĩme.

Ñemomaitei paha

7Tíquico oikuaaukáta peẽme mba’éichapa aiko’aína, ha’e ningo che hermáno ahayhúva, che pytyvõhára ha chemoirũva amyasãi hag̃ua Hesu Crísto ñe’ẽ porãite.

8Che voi ningo amondo ichupe pene rendápe peikuaa hag̃ua mba’éichapa roikoroína ha ha’e omoangapyhy hag̃ua pene ñe’ã.

9Tíquico ndive amondo avei Onésimope, ha’e voi pende reheguáva ha ñane hermáno heko peguáva ha jahayhúva, mokõivéva omombe’upáta peẽme opaite mba’e ojehuva’ekue ko’árupi.

10Aristárco, che irũ cárcelpe, ha Márco, Bernabe prímo, penemomaiteiuka. Márco rehe ha’epáma peẽme, mba’épa pejapo’arã, og̃uahẽ vove pene rendápe, pemog̃uahẽ porã ichupe.

11Ha Hesu, hérava avei pe hekojojáva, penemomaiteiuka avei. Ko’ã mbohapy Judaygua omba’apóva chendive ko’ápe, ha’ekuéra chepytyvõ porã Ñanderuete kokueguasúpe omyasãivo iñe’ẽ porãite, ha’ekuéra chembopy’arory.

12Epáfras penemomaitei avei, ha’e ningo pendereheguáva, ha Hesu Crísto rembiguái, ipy’a ojejopy oikóvo penderehe ha iñembo’épe ha’e ojerure peẽ peñemombareteve hag̃ua pehóvo pende jeroviápe pejapopa hag̃ua Ñanderuete rembipota.

13Péicha aikuaauka peẽme ha’e ojepy’apyeteha penderehe, Laodiceaygua ha Hierápolis pegua rehe.

14Démas ha Lúcas, pe pohãnohára, che ahayhúva penemomaiteiuka avei.

15Pemomaitei ñane hermanokuéra Laodicéa peguápe ha ñane hermána Nínfaspe, ha umi iglesiayguakuérape oñembyatýva hógape.

16Pemoñe’ẽmba rire ko kuatia kóva (pende iglésiape), pemondo avei Laodicéa iglésiape, ha’ekuéra omoñe’ẽ hag̃ua avei, ha pe kuatiañe’ẽ amondova’ekue Laodicéape pemoñe’ẽ avei pende iglésiape.

17Ha che ha’ese Arquípope: Ejapo hekoitépe Ñanderuete rembiapo oñeme’ẽmava’ekue ndéve.

18Che, Páblo, ahai ko kuatiañe’ẽ kóva che potee rupi, che pomomaitei hag̃ua ha peẽ peñemomandu’a hag̃ua che aikoha gueteri cárcelpe (Hesu Crísto rehehápe). Ñanderuete poriahuvereko toĩ penendive.