Amos 8 - Biblia en Guaraní - ?anderuete ?e’? Por? 2015

Ajaka’i henyhẽva yva hi’ajúvagui

1Koichagua mba’e Ñanderuete, pe Jaraitéva, ohechauka chéve: Ahecha peteĩ ajaka’i henyhẽva yva ajúgui.

2Ha he’i: Amos, mba’épa rehecha. Ha che ha’e ichupe: Peteĩ ajaka’i henyhẽva yvágui. Ha Ñanderuete he’i chéve: Israel hi’ajúma, opáta, naperdonamo’ãvéima hembiapo vaikuekuéra.

3Ha che rogaguasúpe umi opurahéiva, ipyahẽ asýta upe ára upévape, he’i pende Ruete, he’õnguekuéra oñemombótagui oparupiete.

Oñemo’ag̃ui pe ñembojovake

4Pehendúke ko’ã mba’e, peẽ pejopýva mboriahukuérape ha pehundiséva ichupekuéra ko tetãme,

5pejévo: Araka’épa ohasáta pe jasy pyahu, rovende hag̃ua ore trígo, ha araka’épa ohasa jevýta pe pytu’uha ára roipe’a hag̃ua pe ogaguasu rokẽ roñongatuhápe ore mba’e ra’ỹingue, romomichĩ hag̃ua pe kambuchi ra’ãha (medída), rohupi hag̃ua pe trígo repykue ha roiporu hag̃ua pe balánza pésa japu.

6Rojogua hag̃ua pirapire rehe umi imboriahúvape ha rojogua hag̃ua mokõi sapatu repýre umi ohasa asývape ha rovendepa hag̃ua trígo oñembyaíva jepe.

7Ñanderuete ome’ẽ iñe’ẽ Jacóbo rerakuã porã rehe: Ndacheresaráiri araka’eve mayma hembiapo vaikuégui.

8Ko’ã mba’e ko’ãva rupi pe yvy ndoryryichénepa, noñemondyichénepa mayma ipype oikóva guive, ojejupipa hag̃ua ku Nilo ysyrýicha, ha upéi oguejypa jevy hag̃ua.

9Ojehuva’erã upe ára upévape, he’i pende Ruete, Che amoingéta pe kuarahy asaje pytépe ha amog̃uahẽta pe pyhare ára sakãme.

10Pende aretekuéra rendaguépe oikóta tesay, ha pende purahéigui oikóta jahe’o, pomondeukáta ao vosakuépe ha peñemyakã perõta, peñembyasýta ha pejahe’óta, pende ra’y peteĩmíva omano ramoguáicha, ha ipahápe pemanóta py’angekõita reheve.

11Cháke, outamahína pe ára pende Ruete he’imava’ekue, amboúta ñembyahýi yvy apére, ndaha’emo’ãi pene rembi’úgui peneñembyahýita ha pendey’uhéita, pende Ruete ñe’ẽgui uvei peẽ peneñembyahýita ha pendey’uhéita.

12Ha pehasáta peteĩ yguasúgui ambue yguasúpe, yvate guive kuarahyresẽ meve pehekáta pende Ruete ñe’ẽ, ha ndapejohumo’ãvéima.

13Umi ára umívape kuñataĩ iporãitéva ha avei umi karia’y ipy’a manóta ijy’uhéigui.

14Umi ome’ẽva iñe’ẽ (juraménto) Samária jára gua’úpe he’ívo: Nde, Dan jára gua’u, ha nde, Beerséba jára gua’u; umía ho’apáta ha nopu’ãmo’ãvéima araka’eve.