Matéo 10 - Biblia en Guaraní - ?anderuete ?e’? Por? 2015

Hesu oiporavo 12 hemimbo’ekuéra ijapostolkuéra ramo

1Hesu ohenói umi 12 hemimbo’ekuérape ha ome’ẽ ichupekuéra pu’aka omosẽ hag̃ua mba’epochykuérape ha oporomonguera hag̃ua opaichagua mba’asýgui.

2Péicha ningo umi 12 hemimbo’e réra: Tenondete Simon, hérava avei Pédro; ha Andres, ityvýra; Jacóbo, Zebedéo ra’y, ha Juan ityvýra.

3Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo;

4Simon, pe Zelóte (icelósova hetãre); ha Júdas Iscarióte, pe otraicionátava Hesúpe.

5Hesu omondo ko’ãvape, ha ohekombo’évo he’i ichupekuéra: Tetã ambueygua rape rehe ani peho, ha Samariaygua távape ani peike.

6Tapeho peheka raẽ umi ovecha kañymbyre Israel retãyguakuéra apytépe.

7Tapeho, peikuaauka: Hi’ag̃uimaha Ñanderuete retãguasu ñesãmbyhy,

8pemonguera hasývape, pemoingove omanova’ekuépe, pemopotĩ ijai vaipávape (ilépravape), pemosẽ mba’epochykuérape kuimba’e ha kuñakuéragui; rei pehupityva’ekue, rei peme’ẽ jeyva’erã.

9Ani pegueraha óro térã pláta, térã pirapire pende ku’akua bolsíllope.

10Ani peraha vosa tape rehe g̃uarã, térã mokõi kamisa térã ambue sapatu, térã yvyra po’i jepe; pe omba’apóvape oñeme’ẽta hembi’urã.

11Ha oimeraẽ táva térã tava’i mamo peikehápe, peporandu mávapa oiko hekópe; ha pepyta hendive hógape pesẽ jevy peve upégui.

12Ha peg̃uahẽvo upe óga upévape pemomaitei.

13Ha umi ogaygua oiko ramo hekópe, pe py’aguapy peẽ peguerekóva oguejýta hi’arikuéra; ha oiko ramo hekope’ỹ, pe py’aguapy oupa jeýta peẽme.

14Oime ramo napenemog̃uahẽséiva ni nohenduséiva pene ñe’ẽ pesẽ upe ógagui térã upe távagui, ha peityvyro pe yvy timbo jepe pende pýgui.

15Añetehápe Che ha’e peẽme upe ñembojovakeha árape ivevuivéta pe jehavira Sodóma ha Gomórra retãme g̃uarã, umi táva umívape g̃uarãgui.

16Peikuaa porãke, Che pomondoha ku ovecháicha aguaraguasu apytépe; upévare penearanduva’erã mbóicha ha pendereko potĩva’erã pykasúicha.

17Ha peñangarekóke pendejehe yvyariguakuéragui, penemoĩta mburuvichakuéra aty poguýpe, ha penenupãta Ñanderuete rogakuérape Israel retãme.

18Ha pendegueraháta tetã sãmbyhyharakuéra ha tetã ruvichakuéra renondépe, tembiechauka ramo ichupekuéra ha tetã ambueyguakuérape g̃uarã avei.

19Ha penemoĩ ramo hikuái ipoguypekuéra, ani pejepy’apy mba’éichapa térã mba’épa pejeva’erã rehe; upe hóra upéva og̃uahẽvo, oñeme’ẽta peẽme upe pejeva’erãva.

20Ndaha’emo’ãi ningo peẽ peñe’ẽtava, pende Ruete Pytu Porãitéva oñe’ẽta pendepype.

21Ha peteĩ tyke’ýra ojukaukava’erã ityvýrape, ha peteĩ túva, ita’ýrape; ha ta’yrakuéra opu’ãva’erã itúva rehe ha ojukava’erã ichupe.

22Ha opavave ndaija’eiva’erã penderehe che réra rayhupápe, ha upe ogueropu’akáva ipahaite peve, upéva ojesalvava’erã.

23Peñemuña ramo peteĩ távagui pekañy ambue távape; añetehápe Che ha’e peẽme, ndapejapopamo’ãi pene rembiapo Israel tavakueraha rupi, ou mboyve yvyarigua Ra’y.

24Pe temimbo’e ningo naimba’eguasuvéi imbo’eháragui; ha pe tembiguái ijáragui.

25Iporãma pe temimbo’e oiko imbo’eháraicha ha pe tembiguái ijáraicha; ha oñehenói ramo pe óga járape Beelzebu, (pytu vai) ko’yteve hogayguakuérape.

Ñanderuete omokyre’ỹ ita’ýra ha itajyrakuérape

26Upévare ani pekyhyje ichuguikuéra, ndaipóri mba’eve oñemíva ojehechauka’ỹva’erãva, ha opaite mba’e okañýva ojekuaava’erã.

27Umi mba’e Che ha’éva peẽme pytũnguýpe, pejéta ára sakãhaitépe; ha pe Che ha’éva pende apysápe peguerosapukáita óga ape ári guive.

28Aníke pekyhyje umi ojukávagui pende rete, ndaikatúigui ojuka pene ánga; pekyhyjeva’erã uvei pe ikatúvagui ohundi aña retãme pende rete ha pene ánga.

29Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre.

30Pene akã rague jepeve ojepapáma.

31Upévarupi ani pekyhyje. Peẽ, mba’eguasueteve heta guyra’ígui.

32Upévare oimeraẽ ohechaukáva chekuaaha yvyariguakuéra apytépe, Che avei aikuaaukáta ichupe che Ru yvága pegua renondépe.

33Ha upe chenegáva yvyariguakuéra apytépe, Che avei anegava’erã ichupe che Ru yvága pegua renondépe.

34Aníkena peimo’ã Che aju hague aguerúvo py’aguapy yvy ape ári, ndajúi aguerúvo py’aguapy, kyse puku juavy uvei.

35Che aju amoingo vaívo oñondive pe kuimba’e itúva ndive, pe membykuña isy ndive, ha pe tembireko iména sy ndive.

36Ha upéicharupi opavave ojohúta hese ija’e’ỹva hogayguakuéra apytépe voi.

37Upe ohayhuvéva itúva térã isýpe chehegui; ndaikatúi oiko che reheguáva ramo ha upe ohayhuvéva ita’ýra térã itajýra chehegui ndaikatúi oiko che reheguáva ramo.

38Ha upe ojapyhy’ỹva ikurusu ha ou’ỹva che rapykuéri, ndaikatúi oiko che reheguáva ramo.

39Upe ohayhúva hekove oñehundíta; ha upe ohundíva hekove che rayhupápe katuete ojohuva’erã pe tekovete.

40Oimeraẽ penemog̃uahẽva hógape, chéve chemog̃uahẽ; ha oimeraẽ chemog̃uahẽva, omog̃uahẽ chembouharépe (Ñanderuetépe).

41Oimeraẽ omog̃uahẽva peteĩ proféta, ha’e iproféta háre ohupitýta proféta rembiapo repyrã; ha oimeraẽ omog̃uahẽva heko potĩvape, ha’e heko potĩháre, ohupitýta avei pe heko potĩva rembiapo repyrã.

42Ha upe omboy’úva ko’ã michĩmívape peteĩ váso y ro’ysã jepe, che remimbo’e háre, añetehápe Che ha’e peẽme, ndopytaichéne ojehepyme’ẽ’ỹre ichupe.