Números 4 - Biblia en Guaraní - ?anderuete ?e’? Por? 2015

Leviguakuéra rembiapo

1Ñanderuete oñe’ẽ Moises ha Aarónpe ha he’i:

2Eipapa Levi ra’ykuéra apytégui Coat ñemoñarenguérape, hogaguasukuéra ha hogakuéra rupi,

3umi ombotýmava 30 áño guive 50 áño peve, mayma oikéva guive ijaty aty rupi (itúrnope) omba’apo hag̃ua hi’arakuérape pe óga jojohuhápe.

4Ko’ãva Coat ñemoñare rembiaporã pe óga jojohuhápe, pe koty oñemboykéva pende Ruetépe ha pa’iguasúpe:

5Pe ojevataha árape, Aaron ha ita’yrakuéra ouva’erã ha oipe’áta hendágui aosãingo, pe óga jojohuha pegua ha ipype oñu’ãva’erã pe karameg̃ua,

6ha omoĩva’erã hi’ári pe mo’ãha vaka y pegua pirekueguiguáva, ha hi’ári omoĩva’erã peteĩ aorã (páño) hovýva, ha omoĩmbava’erã hi’yvakuéra ijargólla kuápe.

7Pe mesa ári omyasãiva’erã peteĩ aorã (páño) hovy ha hi’ári jevy umi ña’ẽ (fuénte), ña’ẽmbe (pláto), váso ha umi jarroguasu ojeporúva oñekuave’ẽ hag̃ua; pe pan tapiaite oĩva’erã hi’ári.

8Ha omyasãiva’erã hi’arikuéra peteĩ aorã pytãva, ha omo’ã jevyva’erã umi vaka y pegua pirekueguiguápe, ha upéi omoĩva’erã hi’yvakuéra ijargólla kuápe.

9Ojapyhyva’erã hikuái peteĩ aorã hovýva ha ipype oñu’ãva’erã pe tataindyenda, hataindynguéra, ijetapa, umi ña’ẽmbe ha opaichagua tembiporu ojeporúva acéitepe g̃uarã;

10ha omoĩmbava’erã mayma hembiporukuéra peteĩ mo’ãha vaka y pegua pirekue ryepýpe, ha omohendava’erã mba’yru guerovaha ári.

11Pe kuave’ẽmby renda oroguiguáva ári omyasãiva’erã peteĩ aorã hovýva, ha oñu’ãva’erã peteĩ mo’ãha vaka y pegua pirekueguiguápe ha omoĩmbava’erã hi’yvakuéra ijargólla kuápe.

12Ha’ekuéra ojapyhyva’erã umi tembiporu ojeporúva guive pe óga jojohuhápe, ha omoĩmbava’erã peteĩ aorã hovýpe, ha omo’ãva’erã peteĩ mo’ãha vaka y pegua pirekueguiguápe ha omohendava’erã pe mba’yru guerovaha ári.

13Oipe’ava’erã hikuái pe kuave’ẽmby rendágui tanimbu, ha omyasãiva’erã hi’ári peteĩ aorã pytãitéva.

14Ha omoĩmbava’erã hi’ári hembiporukuéra ojeporúva guive: Umi tatapỹi renda (braséro), umi ty’ãi (gáncho), umi pála, umi ña’ẽmbe ha opaichagua tembiporukuéra, ojeporúva guive kuave’ẽmby rendápe; ha omyasãiva’erã hi’ári pe mo’ãha vaka y pegua pirekueguiguáva ha omoĩmbava’erã avei hi’yvakuéra ijargólla kuápe.

15Ha Aaron ha ita’yrakuéra oñu’ãmba rire pe óga jojohuha ha hembiporukuéra ojeguerova hag̃ua, ouva’erã Coat ra’ykuéra ogueraha hag̃ua, ndopokoiva’erã mba’evete rehe, oñemboykémava guive pende Ruetépe g̃uarã, ani hag̃ua omano hikuái. Ko’ãva hína Coat ñemoñarenguéra rembiaporãnguéra, pe óga jojohuhápe.

16Ha Eleazar, pa’i Aaron ra’y, poguýpe opytapáta pe acéite tataindy pegua, mba’e ryakuã asy, umi kuave’ẽmby tembi’u rehegua, pe acéite omona hag̃ua; ha’e oñangarekóta avei pe óga jojohuha rehe ha opaite mba’e rehe ipype oĩva guive, ha hembiporukuéra reheve.

17Ñanderuete oñe’ẽ Moises ha Aarónpe ha he’i:

18Aníke pehejátei oñehundi Coat ñemoñarenguéra Levi tríbu apytégui.

19Oikove hag̃ua ha ani omano hikuái oñemboja vove umi mba’e oñemboykémava rehe pende Ruetépe g̃uarã, péicha rejapova’erã hesekuéra: Aaron ha ita’yrakuéra ome’ẽva’erã peteĩteĩme hembiaporã ha hendag̃ua.

20Ha’ekuéra ndoikeiva’erã pe óga jojohuha ryepýpe ohecha hag̃ua oñeñu’ã jave umi mba’e oñemboykéva pende Ruetépe, ohecháva guive omanova’erã katuete.

21Ñanderuete oñe’ẽ Moiséspe ha he’i:

22Eipapa avei Gerson ñemoñarenguérape hogaguasukuéra ha hogakuéra rupi.

23Reipapava’erã umi ombotýmava 30 áño guive 50 áño peve; mayma oikéva guive aty aty rupi omba’apo (oservi) hag̃ua hi’arakuérape pe óga jojohuhápe.

24Kóva hína Gerson ñemoñarenguéra rembiaporã:

25Oguerahava’erã hikuái umi aosãingo óga jojohuha pegua, imo’ãhanguéra, pe mo’ãha vaka y pegua pirekueguigua oĩva hi’ári, pe aosãingo oĩva pe óga jojohuha rokẽ rehe,

26umi aosãingo korapy rehegua, pe aosãingo korapy rokẽ reheguáva, oĩva pe óga jojohuhápe ha kuave’ẽmby renda jerekuévo, isãnguéra ha opaite tembiporukuéra ipype ojeporúva guive.

27Aaron ha ita’yrakuéra he’i háicha, upeichaite Gerson ñemoñarenguéra ojapopava’erã, ha’ekuéra ohechauka háicha upéicha ojejapopava’erã.

28Ko’ãva ningo Gerson ñemoñare rembiaporã pe óga jojohuhápe pende Ruetépe g̃uarã, ha ko tembiapo kóva opytapa Itamar, pa’i Aaron ra’y poguýpe.

29Eipapa Merari ñemoñarenguérape hogaguasukuéra ha hogakuéra rupi.

30Reipapáta ombotýmava 30 áño guive 50 peve, mayma umi oikéva guive omba’apo hag̃ua pe óga jojohuhápe.

31Kóa hembiaporã pe óga jojohuhápe: Oguerojava’erã umi tablon óga pegua, hi’yvakuéra, horconguéra ha ipyendakuéra,

32umi póste korapy jere rehegua ha ipyendakuéra, iposte’ikuéra, isãnguéra ha opaichagua hembiporukuéra.

33Kóa ningo Merari ñemoñarenguéra rembiaporã pe óga jojohuhápe, ha ha’ekuéra opytapa Itamar, pa’i Aaron ra’y poguýpe.

34Moises, Aaron ha umi tríbu ruvicha, oipapa Coat ñemoñarenguérape hogaguasu atykuéra ha hogakuéra rupi.

35Umi ombotýmava 30 año guive 50 peve; mayma oikéva guive aty aty rupi omba’apo hag̃ua pe óga jojohuhápe,

36ha ojohu 2.750 kuimba’e.

37Ko’ã Coat ñemoñarenguéra, Moises ha Aaron oipapava’ekue, Ñanderuete he’i haguéicha Moiséspe, omba’apo hag̃ua pe óga jojohuhápe.

38Ha Gerson ñemoñarenguérape ojepapava’ekue hogaguasukuéra ha hogakuéra rupi,

39umi ombotýmava 30 áño guive 50 peve, mayma oikéva guive aty aty rupi omba’apo hag̃ua pe óga jojohuhápe hi’arakuérape.

40Ha heseguakuéra oĩ 2.630 kuimba’e.

41Ko’ãva hína Gerson ñemoñare Moises ha Aaron oipapava’ekue, Ñanderuete he’i haguéicha, omba’apo hag̃ua pe óga jojohuhápe.

42Ha Merari ñemoñarenguéra ojepapava’ekue hogaguasu atykuéra ha hogakuéra rupi,

43umi ombotýmava 30 áño guive 50 peve, mayma oikéva guive aty aty rupi omba’apo hag̃ua pe óga jojohuhápe hi’arakuérape.

44Heseguakuérava ojepapava’ekue oĩ 3.200 kuimba’e.

45Ko’ãva Merari ñemoñare Moises ha Aaron oipapava’ekue, Ñanderuete he’i haguéicha Moiséspe ha’e ojapopa avei.

46Moises, Aaron ha Israel ruvichakuéra oipapava’ekue opaite Leviguakuérape hogaguasukuéra ha hogakuéra rupi.

47Umi ombotýmava 30 áño guive 50 peve, mayma oikéva guive omba’apo hag̃ua pe óga jojohuhápe.

48Heseguakuérava ojepapava’ekue, oĩ 8.580 kuimba’e.

49Ñanderuete he’i haguéicha Moiséspe, upéicha ha’ekuéra oipapa ichupekuéra ha ome’ẽ peteĩteĩme hembiaporã ha hendag̃uakuéra.