Romayguakuérape 7 - Biblia en Guaraní - ?anderuete ?e’? Por? 2015

Pe menda reko

1Peẽ, che hermanokuéra, peikuaáva Moises rembiapoukapykuéra, napenemandu’ái piko, ñande japytaha Moises rembiapoukapy poguýpe jaikove pukukue ajánte.

2Pe kuñakarai omendáva oĩ iména poguýpe, Moises rembiapoukapy rupi oñeñapytĩgui iména rehe ha’e oikove aja pukukue.

3Upéicha rupi ha’e oiko ramo ambue kuimba’e ndive iména oikove aja, oñehenói ichupe imendare mbyaiha. Iména omano ramo katu, ojeráma Moises rembiapoukapýgui. Upéramo noñehenóiri ichupe mendare mbyaiha ramo.

4Péicha avei, che hermanokuéra, peẽ ningo pemanóma Moises rembiapoukapýpe g̃uarã pejoaju hag̃ua Hesu Crísto rete rehe, ko’ág̃a ningo peẽ Hesu Crísto mba’e, oikove jevyva’ekue omanova’ekue apytégui, ñande’a (frúto) hag̃ua Ñanderuetépe g̃uarã.

5Jaiko aja ñande rete rembipota vaípe Moises rembiapoukapykuéra omombáy ñande rete rembipota vai jajapo hag̃ua heta mba’evai, hi’a hag̃ua ñemanóme g̃uarã.

6Ko’ág̃a katu jajeráma Moises rembiapoukapykuéragui, ñandeguerekova’ekue ipoguýpe, jaiko hag̃ua kyre’ỹme Pytu Porãmbáva rembiguái ramo ha ndaha’evéima tembiapoukapy tujakuéra poguýpe.

Pe angaipa chepype oĩva

7Mba’e piko ja’éta aipórõ. Moises rembiapoukapy piko mba’evai. Mba’evéicharamo. Ndaipóri rire Moises rembiapoukapykuéra che ndaikuaaiva’erãmo’ã pe angaipa ni che rete rembipota vai, Moises rembiapoukapy rupínte aikuaa pe angaipa pu’aka ha che rete rembipota vai, he’ígui: Anítei reipota potave nde rete (py’apy) rembipota vai (Éxodo 20,17).

8Pe angaipa ojohu Moises rembiapoukapy rupi pe tape omongakuaa hag̃ua opaichagua tembiapo vai che py’apýpe; Moises rembiapoukapy’ỹre pe angaipa ndojekuaái voi kuri.

9Ymave che aiko Moises rembiapoukapy’ỹre, oúvo Moises rembiapoukapy katu oikove pe angaipa,

10ha che rendápe ou pe ñemano ha Moises rembiapoukapy chegueraha rãngue tekove rapépe, chereraha ñemano rapépe.

11Pe angaipa oiporu Moises rembiapoukapykuéra chembotavy ha chejuka hag̃ua.

12Moises rembiapoukapykuéra añetehápe iporã, omboheko potĩse ha omboheko porãse voi.

13Upémaramo pe mba’eporãva, Moises rembiapoukapykuéra, chegueraháne piko ñemanóme. Mba’evéicharamo. Pe angaipa uvei chegueraha ñemanóme, ha pe angaipa ojehechakuaa mba’e ivaietereiha Moises rembiapoukapykuéra rupivénte.

14Jaikuaa voi ningo Moises rembiapoukapykuéra ouha Ñanderuete Pytu Porãitévagui, che rete katu ikangy, ha oñevendéma angaipa pu’aka poguýpe.

15Che ningo ndaikuaái pe ojehúva chéve, pe ajaposéva katu ndajapói, ha pe ajapose’ỹva katu ajapo.

16Ha che ajapo ramo pe che ajapose’ỹva, ahechakuaa Moises rembiapoukapykuéra iporãha.

17Upéicharamo ndachéi ajapóva péva, pe angaipa chepype oikóvante uvei.

18Che ningo aikuaa porã voi chepype, kóva he’ise che retépe (py’apýpe), ndaipóri mba’eve iporãva; ajapose ramojepe pe iporãva ndaikatúi ajapo.

19Ndajapói ningo pe iporãva che ajaposéva, pe mba’evai che ajapose’ỹva uvei ajapo.

20Ha ajapo ramo pe ajapose’ỹva, ndachéi pe ajapóva, pe angaipa chepype oikóvante uvei.

21Che ajohu chepype ko mba’e kóva, ajapose jave pe iporãva, pe mba’evai katu chemyaña myaña mba’evai gotýo.

22Che pytu porãme arohory umi tembiapoukapykuérape Ñanderuete ome’ẽva’ekue Moiséspe.

23Ahecha katu oĩha ambue tembiapoukapy (léy) che rete reheguápe oñemoĩva Moises rembiapoukapy rehe ha che akãme oĩvape, ha ko tembiapoukapy kóva cheguereko ipoguýpe ajapo hag̃ua mba’evai che rete reheguakuéra rupi.

24Angái che! Mávapa chepe’áta ko tete te’õngueguiguávagui (mano pu’akágui).

25Ame’ẽ che agradecimiénto Ñanderuetépe, Ñandejára Hesu Crísto chepe’a hague pévagui. Upémaramo che akã pu’aka rupi (pensamiénto rupi) aservi umi tembiapoukapykuéra Ñanderuete ome’ẽva’ekue Moiséspe, che rete rehegua katu oservi pe tembiapoukapy angaipa reheguápe.