1Elifaz, pe Teman pegua, ombohovái Jóbpe ha he’i:
2Pe iñarandúva he’ínepa ñe’ẽ arandu gua’u rei, ha omyenyhẽnepa ipy’apy yvytu akúgui.
3Pe ñe’ẽ rei noipytyvõi avavépe ha ndohupitýi mba’eve.
4Nde rembogue pe kyhyje jareko’arã Ñanderuetépe g̃uarã ha nereñembo’éi hekopete ichupe.
5Nde juru ohechauka ne rembiapo ivaiha ha tova mokõi reheve reikoreína.
6Nde juru voi oñemoĩ nderehe ha ne ñe’ẽnguéra nembojovakéma, ndachéi.
7Adan mboyve piko nde reiko, térãpa nde raẽ reje’apovéra’e umi cérrogui.
8Reikuaa piko umi mba’e Ñanderuete oñongatúva ñemiháme térãpa reimo’ã ndénte nearanduha.
9Mba’épa nde reikuaa ore roikuaa’ỹva, mba’eichagua arandu piko nde reguereko orepype oĩ’ỹva.
10Kuimba’e itujaitereíva ha iñakã morotĩva oĩ avei ore apytépe, hi’ára hetave nde rúgui.
11Imichĩeterei piko ndéve Ñanderuete ñemoangapyhy, ha iñe’ẽ he’íva ndéve kunu’ũpópe.
12Mba’érehepa reñemomombyry Ñanderuetégui nde py’apýpe, ha mba’érehe piko nde resa oñembyesavi,
13reñemoĩ hag̃ua Ñanderuete rehe, ha renohẽ hag̃ua peichagua ñe’ẽ nde jurúgui.
14Mba’eichagua yvyarigua piko oñemboheko potĩkuaa ha mba’eichagua kuña membyre piko oñemboheko porãkuaa.
15Ema’ẽ porãke, hi’angelkuéra rehe jepe Ha’e ndojeroviapái, ha umi yvága jepeve naipotĩmbái hesa renondépe,
16ha ko’ýteve pe kuimba’e iñañáva ha heko vaíva, ýicha omboy’úva ñaña reko.
17Cherendúna che rohekombo’e hag̃ua, amombe’use ndéve che ahechava’ekue.
18Umi iñarandúva omombe’u oréve ohenduva’ekue ituvakuéragui ha noñomíri mba’eve.
19Ichupekuéra añoiténte oñeme’ẽva’ekue pe yvy, ha ipa’ũme ndoikoiva’ekue tetã ambueygua.
20Pe iñañáva iñangekõi hekove pukukue ha pe heko vaíva ndoikuaái hi’añokuéra.
21Tyapuguasu oporomondýiva og̃uahẽ ijapysapekuérape, ha oiko jave py’aguapýpe og̃uahẽ pe oporombotaperepáva.
22Ha’e noha’ãrõi osẽ jevy hag̃ua iñypytũhágui, ha ojeporavóma ojejuka hag̃ua kyse pukúpe.
23Ha’e oiko hembi’u rekávo ha he’i: Moõ piko oime. Ha oikuaa porã oñembosako’imaha ichupe g̃uarã iñemanorã.
24Angekõi ha jejopy vai ombopy’atarova ichupe, ku tetã ruvicha oñembosako’ívaicha oike hag̃ua ñorãirõguasurãme.
25Ha’e oñemoĩ Ñanderuete rehe, ha oñembotuicha Ipu’akapáva renondépe.
26Oñani oñemoĩ hag̃ua hese akãrapu’ãháme, hetemo’ãha iñanambusuetéva kupépe.
27Ikyrakue oñu’ã hova, ha ombotuicha hye.
28Ha oiko umi táva oñembotapereva’ekuépe, umi óga ojeiko’ỹháme, oñembyaipapyrévape.
29Noñembotuichavemo’ãi ha imba’erepyeta ndahi’aremo’ãi, ha nomyasãimo’ãvéima imba’eita yvy apére.
30Nokañymo’ãi pe ára iñypytũhágui, pe tata rendy ombopiruva’erã hemitỹnguéra, ha omanova’erã Ñanderuete Pytu Porãite rupi.
31Anítei ha’e ojerovia mba’e výro rei rehe, upéicharõ ha’e voi oñembotavy.
32Ha’e omanova’erã hi’ára og̃uahẽ mboyve, ha ndahoky pyahumo’ãvéi.
33Okuipava’erã ku parral akýicha ha olívo potyku’ícha.
34Umi iñañáva itaperepáta, ha tata ombokusuguéta mondaha rogakuéra.
35Mba’evaípe hyeguasu hikuái ha ipy’apýpe imemby nembotavy ha tembiapo vai.
Who We AreWhat We EelieveWhat We Do
2025 by iamachristian.org,Inc All rights reserved.
