Márcos 16 - Biblia en Guaraní - ?anderuete ?e’? Por? 2015

Ñanderuete omoingove jevy Hesúpe

1Ha ohasa rire pe sábado, María Magdalaygua, María, Jacóbo sy, ha Salome ojogua mba’e ryakuã porãite ha oho omona hag̃ua Hesu retekue rehe.

2Ha pe domíngo ko’ẽtĩme, kuarahy osẽmbotávo, oho hikuái Hesu tyvýpe.

3Ha he’i hikuái ojupe: Mávapa oipe’áne ñandéve pe tyvy juru pegua itaguasu pohýiva.

4Ha oma’ẽvo hikuái ohecha pe itaguasu oñembyapajeréima hague.

5Oike hikuái pe tyvy ryepýpe, ha ohecha peteĩ karia’y oguapyvahína akatúa gotýo, ijao morotĩmbáva, ha tuichaiterei oñemondýi ha okyhyje hikuái.

6Ha pe karia’y he’i ichupekuéra: Ani pekyhyje, pehekapeína Hesu Nazaretguápe oñemosãingova’ekue kurusúre; Ha’e oikove jevýma, ndaipóri ko’ápe, pehecha oñemoĩ haguépe ichupe.

7Tapeho katu ha peje hemimbo’ekuérape ha Pédrope, Ha’e ohomaha pene renonderãme Galiléape; upépe pehecháta ichupe; Ha’e he’i hagueichaite peẽme.

8Ha ha’ekuéra osẽ ha oñani ohóvo, kyhyje ha ryryipópe ha mba’eve nde’íri avavépe.

Hesu ha María Magdalaygua

9Hesu Crísto oikove jevy riréma ha’e ojehechauka raẽ María Magdalayguápe, ichugui ningo Hesu omosẽva’ekue 7 mba’epochýpe.

10Ha María oho, oikuaauka hag̃ua umi omoirũva’ekue Hesúpe ha ha’ekuéra oñembyasy ha ojahe’ohína.

11Ha’ekuéra ohendúvo Hesu oikove jevyha ha María ohecha hague ichupe ndogueroviái ichupe.

12Ha uperire Hesu ojehechauka mokõi heseguakuérape oho jave hikuái ñúme.

13Ha ha’ekuéra oho omombe’u ambuekuérape, ha avave ndogueroviái ichupekuéra.

Hesu ome’ẽ hemimbo’ekuérape hembiaporã

14Ipahápe Hesu ojechauka umi 11-pe, oĩ jave hikuái mesápe, ha oja’o ha omongavaju ichupekuéra ndogueroviái haguére umi ohechamava’ekuépe ichupe.

15Ha Hesu he’i ichupekuéra: Tapeho opárupi, ko yvy jerekuévo, ha pemyasãi opavavépe ko evangélio.

16Ha upe ojeroviáva ha ojebautizaukáva ojesalváta ha upe ojerovia’ỹva cherehe oñehundiva’erã.

17Ko’ã techaukapy ko’ãva omoĩrũ umi ojeroviávape: Che rérape pemosẽta mba’epochykuérape ha peñe’ẽta ñe’ẽ pyahúpe.

18Pejapyhýrõ mbói ha pey’úrõ pohã vai oporojukáva, mba’eve ndojapomo’ãi penderehe, ha pemoĩrõ hasýva ári pende po, okueráta.

Hesu ojupi Ñanderuete rekohápe (yvágape)

19Ha Hesu Crísto oñe’ẽmba rire ichupekuéra, ojehupi yvate ichupe, Ñanderuete rekohápe, ha oguapy Ñanderuete akatúa gotýo.

20Hemimbo’ekuéra, oho ha omyasãi Ñanderuete ñe’ẽ oporombovy’áva opárupi ha Ñanderuete Ra’y oipytyvõ ichupekuéra ha omoañete iñe’ẽ techaukahakuéra (señalkuéra) rupi.