Márcos 5 - Biblia en Guaraní - ?anderuete ?e’? Por? 2015

Hesu omosẽ mba’epochýpe

1Ha Hesu og̃uahẽ yguasu mboypýri, Gadaraygua yvýpe.

2Oguejývo hikuái, osẽ tyvy atýgui (cementériogui) peteĩ kuimba’e oikóva mba’epochy poguýpe ohug̃uaitĩ ichupekuéra.

3Upéva ningo oiko tyvykua ryepýpe, ha cadéna reheve jepe avave ndaikatúi ojoko ichupe.

4Heta jevy oñeñapytĩma cadéna hierroguiguápe ha’e katu omondohopa jevy. Ha avave ndaikatúi ojoko térã ipu’aka hese.

5Pyhare ha ára pukukue osapukái umi tyvy apytépe ha oñenupã ita reheve.

6Ha mombyry guive ha’e ohechávo Hesúpe oñani ha ou oñesũ henondépe,

7ha osapukái hatãvo he’i ichupe: Mba’épa che areko nendive, nde Hesu, pe Jára Ijyvatevéva Ra’y, ajerure asy ndéve, ani hag̃ua nde chemyangekõi.

8Upérõ Hesu Crísto he’i ichupe: Nde, mba’epochy, esẽ ko kuimba’e kóvagui.

9Ha Hesu oporandu ichupe: Mba’éicha piko nde réra. Ha ha’e he’i: Legion (6.000) che réra, ore retaitereígui.

10Ha umi mba’epochy ojerure asy Hesúpe ani hag̃ua omosẽ ichupekuéra uperupígui.

11Upe cérro rupi ningo okaruhína peteĩ kure aty ndetuicháva,

12ha umi mba’epochy ojerure asy ichupe he’ívo: Oremondóntena pe kure atýpe toroike ipypekuéra.

13Ha Hesu oheja. Upérõ umi mba’epochy osẽ pe kuimba’égui ha oike umi kure ryepýpe, ha pe aty oĩ háicha ojeitypa pe cérro ykégui yguasúpe ha omanomba.

14Ha herekuakuéra okañymba omombe’u hag̃ua ijarakuérape umi mba’e oikóva umi táva ha tava’i rupi. Ha osẽ hikuái ohecha hag̃ua pe ojehumava’ekue.

15Ha og̃uahẽvo hikuái Hesu rendápe ohecha pe mba’epochy poguýpe oikomava’ekuépe ha hérava Legion, oñemondepa, iñakã porã ha oguapyhína, okyhyje joa ichugui hikuái.

16Ha umi ohechava’ekue pe ojehumava’ekue, omombe’u hapichakuérape mba’épa oiko pe mba’epochy poguýpe oikova’ekue rehe ha mba’épa ojehu kure atyguasúre.

17Ha oñepyrũ ojerure asy Hesúpe ojei hag̃ua hendágui.

18Ha Hesu oikévo pe bárcope, pe oikomava’ekue mba’epochy poguýpe ojerure asy omoirũ hag̃ua ichupe.

19Hesu ndohejái, he’i uvei ichupe: Tereho nde rógape, nde rogaygua rendápe, emombe’u ichupekuéra opaite mba’e Ñanderuete ojapomava’ekue nderehe, ha mba’éichapa Ha’e ndeporiahuvereko.

20Ha oho ha oñepyrũ omombe’u Decápolispe opaite mba’e Hesu ojapova’ekue hese ha opavave ohecharamoite hikuái.

Hesu omoingove jevy Jáiro rajýpe

21Upérõ Hesu ohasa jevy rire y mboypýri bárcope, ou hendápe hetaite Israelgua, ha’e oĩ aja yguasu rembe’ýpe.

22Ha og̃uahẽ Hesu rendápe peteĩ Ñanderuete róga myakãhára, hérava Jáiro, ha ojeity Hesu py renondépe.

23Ha ojerure asy ichupe he’ívo: Che rajy ningo omanombotahína, ejúna, emoĩ nde po hi’ári okuera ha oikove jevy hag̃ua.

24Ha Hesu oho hendive, hetaite kuimba’e ha kuñakuéra katu omoirũ ichupe, ha ohokuévo ojopypa ichupe opáguio rei.

25Ha ijapytépe oĩ peteĩ kuñakarai, 12 áñoma hasýva tuguyguasúgui.

26Hetáma ohasa asyva’ekue heta pohãnoharakuéra pópe, ha ipirapire (ipláta) ome’ẽmbáma, ha ndokuerái, oho vaive uvei ichupe.

27Ohendúra’e Hesu rehe oje’éva, ha og̃uahẽ hapykuéguio, umi oñembyatýva pa’ũ rupi, ha opoko ijao rehe.

28He’ígui ipy’apýpe: Apoko ramo ijaórente jepe akueráta.

29Upete guive opyta huguy syry, ha oñandu hete rehe okueramaha imba’asýgui.

30Ha Hesu oñandu voi osẽ hague ichugui pu’aka, ha ojerévo hetãyguakuéra apytépe oporandu: Mávapa opokóra’e che ao rehe.

31Ha hemimbo’ekuéra he’i ichupe: Opavave ningo ndejopypa ha nde ere: Mávapa opokóra’e cherehe.

32Ha Hesu oma’ẽ ijerekuévo ohecha hag̃ua mávapa opokora’e hese.

33Upévo pe kuñakarai, kyhyjepópe ha ryryihápe, oikuaa porãvo pe mba’e hese oikomava’ekue, ojeity henondépe ha omombe’u pe añetegua.

34Ha Hesu he’i ichupe: Che rajy, nde jerovia ndesalva, tereho py’aguapýpe ha ekuera repytávo ne mba’asýgui.

35Ha’e oñe’ẽ jave gueteri hína, og̃uahẽ umi Ñanderuete róga myakãhára remimbou ha he’i Jáirope: Nde rajy omanóma, mba’érepa remyangekõi reivéta mbo’ehárape.

36Hesu katu ohendúvo pe oje’éva, he’i ichupe: Ani rekyhyje, ejeroviánte.

37Ha ndohejái omoirũ ichupe avave, Pédro, Jacóbo ha ityvýra Juánmante.

38Ha og̃uahẽvo hógape, Hesu ohecha pe sarambi oikóva, ojahe’o ha ipyahẽmba joa hikuái.

39Ha Hesu oikévo he’i ichupekuéra: Mba’érehe piko pene’apañuãi ha pejahe’opa. Pe mitã ningo nomanói, okentehína.

40Ha opuka hikuái hese, upévare Hesu omosẽmba, ha ogueraha hendive pe mitã ru, isy ha hendive oĩva, ha oike pe mitãkuña’i kotýpe.

41Ha oipopyhy pe mitãme ha he’i: Talíta kumi, (upéva he’ise, ñamoĩrõ ñane ñe’ẽme: Mitãkuña, Che ha’e ndéve, epu’ã).

42Ha upevovete pe mitãkuña opu’ã ha oñemoĩ oguata, oguerekóma voi ningo 12 áño. Upérõ ohecharamoite hikuái.

43Hesu katu he’i ichupekuéra ani hag̃ua avavépe oikuaaukátei, ha omongaruka pe mitãme.