Provérbios 13 - Biblia en Guaraní - ?anderuete ?e’? Por? 2015

1Pe ta’ýra iñarandúva oñemomba’e itúva rekombo’e rehe; ha pe heko ñembohorýva nohendúi hekombo’e.

2Pe heko potĩva ho’uva’erã hi’a porã; ha upe opyrũva teko porã rehe katu ojohuva’erã mba’evai.

3Pe ojokokuaáva ijuru oñangareko porã hi’ánga rehe; ha umi oñe’ẽ rei reívape katu ojehuva’erã mba’evaiete.

4Pe iñate’ỹva ánga imba’epota, ha mba’eve ndohupitýi; ha umi ikyre’ỹetéva ánga rembipota oñemohyg̃uatãta.

5Pe heko potĩva ojahéi japúre; ha pe iñañáva katu oporombotavy ha oporomoherakuã vai.

6Pe teko potĩva oñangareko heko potĩva rehe ha pe ñaña reko katu oñehundiva’erã hembiapo vaíva ndive.

7Oime ningo umi oikóva imba’eita gua’u ramoguáicha, ha mba’eve ndoguerekói; ha oĩ umi oikóva imboriahúvaicha imba’eita ramojepe.

8Peteĩ tapicha sapy’a ojoguakuaa hekove mondaha pógui, ipirapire heta rupi; pe imboriahúvape avave ndojukaséi (ndoguerekóigui mba’eve).

9Umi heko potĩva rataindy hendyva’erã; ha umi iñañáva rataindy katu ogueva’erã.

10Ñembotuicha omoheñói ñorãirõ, upe ohenduséva tekombo’e katu iñarandu.

11Upe pya’e pya’e ombohetáva imba’e repyeta ohundipa jevýta, upe sa’i sa’ípe omono’õva ombohetave ohóvo.

12Pe tapicha py’apy oha’ãrõ rei rire heta ára hasýta, pe tapicha ohupity rire hembipota ovy’aitereirasa ha ojogua peteĩ yvyra oporomoingovévape.

13Upe iñe’ẽrenduse’ỹva katuete oñembyasýta; pe iñe’ẽrendúvape katu oñemyengovia porãva’erã hembiapokue.

14Pe iñarandúva rekombo’e ningo yvu oporomoingovéva ha upévarupi oñemboyke pe ñemano rapégui.

15Pe akãporã ogueru mba’eporã; ha umi oguatáva teko vai rape rehe oñehundíta.

16Kuimba’e iñakãguapýva guive oiko arandupópe; ha upe ivýrova katu ohechaukava’erã ivýro reko.

17Peteĩ temimondo ñaña ogueru desgrácia; peteĩ temimondo hekoite peguáva oporomohesãi.

18Mboriahu ha ñemotĩ ohupity upe ohendu’ỹva tekombo’e, ha pe ohendúva tekombo’e porã katu oñemoherakuã porãva’erã.

19Pe tapicha ánga ovy’aite ojohu rire ipy’apy rembipota, ha umi ivýrova ndovy’aiete opoi ramojepe ipy’apy vai rekógui.

20Upe oikóva iñarandúva ndive iñaranduva’erã; ha upe oikóva ivýrova ndive oñemboheko vaive ohóvo.

21Pe desgrácia omuña muñava’erã umi hembiapo vaívape, ha umi heko potĩvape katu oñeme’ẽva’erã mba’eporã jopói ramo.

22Pe kuimba’e heko porãva ohejava’erã imba’erepy ita’ýra ra’yrekuérape g̃uarã; ha pe hembiapo vaíva mba’erepyeta oñeñongatúta heko potĩvape g̃uarã.

23Pe heko potĩva imboriahu ramojepe omono’õ ikokue pyahúpe heta tembi’u; pe iñañáva (ipirapire hetáva) katu nomono’õmo’ãi heta mba’e ikokuégui.

24Pe túva oinupã’ỹva ita’ýrape ndohayhúi ichupe; ha pe ohayhúva añetehápe ita’ýrape katuete ombuepoti ichupe, (ojavy ramo).

25Pe heko potĩva okaru hyvatã meve; ha umi iñañáva katu ohasa asyva’erã.