Salmokuéra 63 - Biblia en Guaraní - ?anderuete ?e’? Por? 2015

Ñanderueténte omohyg̃uatãkuaa yvyariguakuéra ánga - David purahéi, oĩ ramoguare Juda desiértope

1Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe).

2Upeichaite chey’uhéi avei che Jára rogaguasu rehe, ahecha hag̃ua nde pu’aka ha nde reko jajaipa.

3Ne mborayhu iporãve jeikovégui, che juru nemomba’eguasu manteva’erã.

4Che jurúpe che romboetéta, nde rérape añembo’éta ahupívo che pokuéra (yvága gotýo).

5Upéicha che ánga hyg̃uatãta ku ha’u ramoguáicha karaku ha so’o kyra, ha torypápe che juru nemomba’eguasúta.

6Che rupápe chemandu’a nderehe ha pyharekuépe ake’ỹ jave añamindu’u ne ñe’ẽre,

7reikógui chéve che pytyvõhára ramo, ha péicha nde pepo guýpe chepy’arory asýta.

8Che ánga oñemboja nderehe, nde po akatúa chejoko porã.

9Ha umi chejukaséva ha chembyaiséva katu ho’apava’erã yvykua pypukúpe.

10Oñeme’ẽta kyse puku rãimbekuépe ha oikóta hikuái aguaraguasu rembi’urã ramo.

11Ha pe tetã ruvicha ipy’a rorýta Ñanderuete ndive, oñemomba’eguasuva’erã katuete oimeraẽ he’íva guive pe añetegua Ñanderuete renondépe, ha oñembotýta katuete umi ijapúva juru.