Números 11 - Biblia en Guaraní - ?anderuete ?e’? Por? 2015

Ñanderuete ombou ynambu

1Israelguakuéra oñe’ẽngururu vai Ñanderuete rehe, ha Ñanderuete ohendúvo péva ipochy, ha hendy ijapytepekuéra hata, ha oñepyrũ ombokusugue peteĩ hekoha apýra guive.

2Upémaramo Israelguakuéra ojerure asy Moiséspe, ha ha’e oñembo’e Ñanderuetépe ombogue hag̃ua pe tata, ha pe tata ogue.

3Ha’ekuéra ombohéra pe yvy pehẽngue Tabera (tata renda), Ñanderuete rata hendýgui ijapytepekuéra.

4Ha umi tetã ambueygua ojehe’ava’ekue hesekuéra ou ipy’a tarovaite ho’useitereígui so’o, upéramo Israel ñemoñarenguéra hasẽ joaite avei hendivekuéra ha he’i hikuái: Máva ikatu ome’ẽ oréve so’o ro’umi hag̃ua,

5oremandu’a umi pira rehe ro’u reiva’ekue Egíptope, ha pepíno, merõ, puérro, sevói ha ájo rehe;

6ha ko’ág̃a ore ánga ipiru; ore resa ndohechái mba’eve, ndaha’éi ramo ko mana kóvante.

7Ha pe mana ojoguákuri kuratũ ra’ỹi sa’yjúvape.

8Israelguakuéra oñemosarambi ñúre omono’õ hag̃ua ha upéi omongu’i molínope térã ojoso angu’ápe, upéi ombojy japepópe (óllape) térã ojapo ichugui pan he’ẽva; ha hekue ojogua pan pyahúpe, acéite reheve.

9Pyharekuépe ho’a ramo ysapy, ho’a avei ko mana.

10Ha Moises ohendúvo hetãyguakuéra hasẽmba joaha, peteĩteĩ hóga aoguigua rokẽme; Ñanderuete pochy hendy hi’arikuéra, ha Moises oñepyrũma ipochy avei,

11ha he’i Ñanderuetépe: Mba’érepa rejapo mba’evaiete ne rembiguái rehe. Ha mba’éicha rupípa nda’a porãi nde resa renondépe, Nde remoĩ ko tetã kóva, peteĩ cárga ipohyietéva ramo cheári.

12Che piko agueruraka’e ichupekuéra yvy apére ere hag̃ua chéve: Egueraha nde jyva ári ku okambumíva ojereraha háicha, rog̃uahẽ meve pe yvy reme’ẽsévape oréve.

13Mamóguipa che aguenohẽta so’o ame’ẽ hag̃ua opavavépe. Cherehe oñe’ẽ vai hikuái, ha he’i: Eme’ẽ oréve so’o ore rembi’urã.

14Ndaikatúi che año chepu’aka opaite ko’ã tetãygua rehe, ipohyietereígui chéve.

15Nde chereja ramo che añoite, che ajerure ndéve chejuka hag̃ua, oime ramo ha’a porã nde resa renondépe. Ani hag̃ua ahecha mba’evai ojehúva chéve.

16Upéramo Ñanderuete he’i Moiséspe: Eiporavo 70 karai anciáno Israel ruvichakuéra apytégui, oisãmbyhy porãva, ha egueru pe óga jojohuha rokẽme ha toha’ãrõ hikuái upépe nendive.

17Che aguejýta añe’ẽ hag̃ua nendive upépe, ha amboja’óta pe pytu porã oĩva ndepype amoĩ hag̃ua ipypekuéra; ha ha’ekuéra ogueraháta nendive ko tetã cárga pohýiva, ha ndererahamo’ãvéi neañónte.

18Ha tetãyguakuérape ere: Peñemopotĩke ko’ẽ ramog̃uarã, ha pe’úta so’o; peẽ penerasẽgui pende Ruete apysápe ha peje: Máva ikatu ho’uka oréve so’omi; añetehápe oho porãveva’ekue oréve Egípto retãme; pende Ruete katuete ome’ẽta peẽme so’o ha pe’u joáta.

19Ha ndape’umo’ãi peteĩ árante, térã mokõi, térã 5, térã 10, térã 20 árante,

20peteĩ jasy pukukue katu pe’úta, osẽmba peve pene tĩ rupi, ha penembojeguaru peve, ndapejapóigui mba’e ramo pende Ruetépe oĩva pende apytépe, ha penerasẽgui henondépe, ha peje: Mba’upéiko ñasẽra’e Egípto retãgui.

21Upémaramo Moises he’i Ñanderuetépe: 600.000 kuimba’e oĩ ko tetã kóvape che jerekuévo; Nde katu ere: Ame’ẽta ichupekuéra so’o, ha ho’úta hikuái so’o peteĩ jasy pukukue.

22Rojukapáta ichupekuéra g̃uarã opaite ore rymbakuéra ohupitypa hag̃ua. Térãpa oñembyatypáta ichupekuéra g̃uarã opaite pirakuéra yguasu pegua hyg̃uatãmba hag̃ua hikuái.

23Upéramo Ñanderuete he’i jevy Moiséspe: Imbykýmapa ohóvo pende Ruete pu’aka; ág̃a rehecháta oikópa che ñe’ẽ térãpa nahániri.

24Ha Moises oho omombe’u hag̃ua hetãyguakuérape Ñanderuete ñe’ẽ; ha ombyaty rire umi Israel ruvicha ha omohenda ichupekuéra pe óga jojohuha jerekuévo,

25Ñanderuete oguejy arai rupi, ha oñe’ẽ ichupe; ha Ha’e oipe’amimi Moises pytu porãgui ome’ẽ hag̃ua umi 70 mburuvichápe; ha oguejy vove hi’arikuéra pe pytu porã oprofetiza hikuái, kurimive katu ndoprofetizavéi.

26Mokõi kuimba’e, umi 70 apytépe, hérava Eldad ha Medad, umía ári oguejy avei pe pytu porã nog̃uahẽséi ramo jepe pe óga jojohuhápe, ha’ekuéra oprofetiza avei pe tekohápe, pe pytu porã oguejýgui avei hi’arikuéra.

27Ha peteĩ mitãrusu oñani omombe’u hag̃ua Moiséspe, he’ívo: Eldad ha Medad oprofetiza hogakuéra rupi.

28Upéramo Josue, Nun ra’y, Moises pytyvõhára imitãrusu arakuéra guive, he’i: Nde che jára, ejokóna ichupekuéra.

29Ha Moises he’i jevy ichupe: Ndépa nerakate’ỹ cherehe. Mba’éicha tamora’e mayma Ñanderuete retãygua toiko proféta ramo ha Ñanderuete tome’ẽ ichupekuéra Ipytu Porãitéva.

30Ha Moises oho jevy pe tekohápe, Israel ruvichakuéra ndive.

31Ha Ñanderuete ombou peteĩ yvytu ogueru hag̃ua ynambutĩtĩ yguasúguio, ha umía ho’a hekoha jerekuévo, ojeguata pukukue peteĩ ára kuarahyresẽ gotýo, ha peteĩ ára yvate gotýo, haimete mokõi jyva (90 centímetro) ijatypa ojo’ári.

32Upéramo tetãyguakuéra opu’ã ombyaty pe ára, pe pyhare pukukue, ha ambue ára pukukue, ombyaty hag̃ua hikuái ynambutĩtĩ; upe sa’ive ombyatýva, ombyaty 10 homer (100 balde) ha omyasãi hikuái pe atyha renda jerekue pukukue rehe (omokã hag̃ua kuarahy akúpe).

33Pe so’o oĩ gueteri hína hãi pa’ũme ha oisu’u mboyve hikuái, Ñanderuete pochy hendy hetãyguakuéra apytépe, ha Ha’e ohavira hetãyguakuérape peteĩ plága vaiete rupi, ha heta omano.

34Ha ombohéra pe tenda Kibrot-hataava, upépe oñotỹgui umi tetãygua ojepy’apy vaieteva’ekue tembi’u porã rehe.

35Pe Kibrot-hataavágui Israelguakuéra oipykúi Hazerot peve, ha opyta hikuái Hazerótpe.