1Kóva hína pe jehovasa Moises, Ñanderuete rembiguái, ombohasáva Israel ñemoñarenguérape, omano mboyve.
2Ha he’i: Ñanderuete ou Sinaígui ha ojehechauka Israélpe Seírgui, hesape ojajái Paran cérro guive ha ou 10.000 ijyvága rembiguái ndive, ipo akatúvape oĩ tata rendy.
3Nde rehayhu tetãnguérape, opaite heko potĩva oĩ nde pópe, ha’ekuéra oñemomirĩta ne renondépe ha oha’ãrõ nde remboguata hag̃ua ichupekuéra.
4Moises ome’ẽ oréve umi tembiapoukapy, kóva Jacóbo mba’e ohejáma iñemoñarenguérape.
5Ha’e oikókuri tetã ruvichaguasu ramo Jesurúnpe (Israélpe) oñembyaty ramoguare karai ancianokuéra, omyakãva avei Israel retãme, umi tríbu ruvicha ndive.
6Toikove Ruben ha anítei omano, ikuimba’ekuéra toñembohetave ohóvo.
7Ko jehovasa Judápe g̃uarã. Péicha Moises he’i: Ore Ruete, ehendumína Juda ñe’ẽ, ha eraha ichupe idepartaméntope; eipytyvõ ichupe nde po rupi ombopoguy hag̃ua hese ija’e’ỹvakuérape.
8Levípe he’i: Ne Tumim ha ne Urim Ñanderuete mba’e; Masápe nde reipy’ara’ã ichupe ha Meriba ýpe reñemoĩ hese (Éxodo 28,29; 17,7; Números 20,13).
9Pe he’iva’ekue itúva ha isy rehe: Ndahechái ichupekuéra, ha ndoikuaaiva’ekue ipehẽnguekuérape, ndohechakuaaiva’ekue ita’yrakuérape, ha’ekuéra ojapókuri uvei Ñanderuete rembipota ha oñembopy’apeteĩ Ñanderuete ndive (Éxodo 32,26-29).
10Ha’ekuéra ombo’eva’erã Jacóbope Ñanderuete justícia rehe ha Israélpe hembiapoukapy rehe. Omoĩva’erã ne renondépe mba’e ryakuã porã ha oikuave’ẽva’erã ne kuave’ẽmby renda ári.
11Ore Ruete ehovasa ichupekuéra ojapótava guive nderehehápe, ha emoañete torypópe hembiapokue; embohasy hese ija’e’ỹvakuérape ha ehundi umi oñemoĩva hesekuéra, opu’ãve’ỹ hag̃uáicha araka’eve.
12Benjamínpe he’i: Ñanderuete nderayhu, Ha’e oñangareko nderehe ha oiko nde apytépe.
13Josépe he’i: Ñanderuete tohovasa nde yvy, umi ára pegua ysapy iporãvévape ha pe y reheve oĩva yvy guýpe.
14Pe kuarahy tome’ẽ koga’a iporãvéva ha pe jasy tomoheñói temitỹnguéra imbaretéva.
15Umi kóga’a iporãvéva tokakuaa umi cérro ymaveguare ru’ãme ha umi cérro’i yke tome’ẽ hi’a porãitéva.
16Ha umi koga’a tokakuaa henyhẽte peve; ha Ñanderuete py’aporã oĩva’ekue pe jukerípe, tou Jose akã ári, ichupe ojeporavo voi ityvyrakuéra apytégui.
17Ha’e overa ku tóro ra’y ypykuéicha ha hatĩnguéra ku tóro hesaietéva ratĩcha; ha ipype oikutupava’erã umi tetãme yvy apýra paha peve; upéicha ningo oiko umi 10.000 Efrain pegua ha umi 10.000 Manases pegua.
18Zabulónpe he’i: Eñembopy’a rorýke, Zabulon, ne resẽ yguasu rupi ha nde Isacar eñembopy’a rorýke, nde róga tymba pireguiguápe.
19Ha’ekuéra ohenói tetãnguérape oikuave’ẽ hag̃ua icérrope kuave’ẽmby justícia reheguáva, Zabulon oguenohẽ yguasúgui mba’eporãita ha mba’erepyeta okañýva yvyku’i guýpe.
20Gádpe he’i: Toñemomba’eguasu Ñanderuetépe ombotuicháva Gad yvyrã; leõicha oha’ãrõ omondyryry hag̃ua hese ija’e’ỹva jyva ha iñakã.
21Oiporavo pe yvy iporãvéva imba’erã ramo, upépe oñeñongatu imburuvicha reko. Ha’e oho Israel renonderãme ombopoguy hag̃ua Canaan peguápe, hekoitépe ojapopa Ñanderuete rembipota ha iñe’ẽrendu ha ojapopa oje’éva guive ichupe ambue Israel tríbu ndive.
22Dánpe he’i: Dan peteĩ leõ ra’yrusu ojeitýva Basan guive.
23Neftalípe he’i: Neftali tahenyhẽ Ñanderuete py’aporã ha iñepytyvõgui, eñemomba’e pe yvýre opytáva sur gotýo ha kuarahyresẽ gotýo rehe.
24Asérpe he’i: Toñembotuicha Asérpe Jacóbo ra’ykuéra apytépe; ipehẽnguekuéra tohayhu ichupe ha tombohykue ipy acéitepe.
25 Hiérro ha bróncegui ojejapo hokẽ ñembotyha, tanembarete reikove aja pukukue.
26Ndaipóri Jesurun (Israel) Járaicha, pya’ete ou yvágagui nepytyvõ hag̃ua ha imburuvicha rekoguasu pya’e ou arai mbytépe.
27Ñanderuete ne mo’ãha ymaite guive, Ha’e oipyso ijyva mbarete nde guýpe; Ha’e omosẽ ne renonderãgui umi nderehe ija’e’ỹvape, ha he’i: Pembopoguy.
28Upéicha Israel oiko py’aguapýpe, Jacóbo ñemoñare oikóta ha’eño ijyvýpe, hetãme oĩ heta trígo ha víno; ha ára yvatégui Ñanderuete omondyky pe ysapy.
29Evy’a nde Israel, mávapa ndeichagua, nde ningo peteĩ tetã Ñanderuete osalvava’ekue, Ha’e ne mo’ãha, Ha’e nde kyse puku ombopu’akapáva. Upéicha nderehe ija’e’ỹva oñemomirĩmbáta, nde katu repyrũta icérro rehe.
Who We AreWhat We EelieveWhat We Do
2025 by iamachristian.org,Inc All rights reserved.
