Ezequiel 42 - Biblia en Guaraní - ?anderuete ?e’? Por? 2015

1Upéi pe ángel chegueru pe korapy oka gotyoveguápe, yvate gotýo oĩva, ha chegueru pe koty opytáva pe pa’ũ inandiha rovái ha pe ogaguasu rovái, yvate gotýo.

2Pe ogaguasu ipukukue 51 métro ha ipy 25,50 métro.

3Pe korapy hyepy gotyovegua renondépe ipy 10,20 métro ha pe tape ojejapóva itapégui pe korapy oka peguáva renondépe, oñemopu’ãháme umi koty ojovái ha mbohapy ojo’ári.

4Umi koty’i renondépe oĩ peteĩ tape ojeguataha ipýva 5,10 métro; ha hokẽnguéra oma’ẽ yvate gotýo. Umi okẽgui oho peteĩ tape po’i ipéva 51 centímetro (oñembojoapýva pe tape ipéva 5,10 métro rehe).

5Umi koty yvatevegua ipo’ive umi mbyte ha iguy peguágui, ojepe’avégui ichuguikuéra ipa’ũha.

6Mbohapy koty oĩ ojo’ári, ha nahorcónigui pe korapy pegua horcónicha; péicharupi pe iguy pegua imbykyve pe mbyte peguávagui.

7Ha oĩ peteĩ kora yvate opytáva, umi koty’i rovái, pe korapy oka peguávape umi koty’i renondépe ha ipukukue 25,50 métro.

8Umi koty’i opytáva pe korapy oka pegua gotýo ipuku 25,50 métro ha umi koty’i opytáva Ñanderuete rogaguasu gotýo ipuku 51 métro.

9Ha umi koty’i guýpe oĩ ojeikeha kuarahyresẽguio, ojeikese ramo pe korapy oka peguávape.

10Pe korapy pegua kora opytáva kuarahyresẽ gotýo, pe pa’ũ inandiha rovái, ha upe ogaguasu renondépe, oĩ avei heta koty’i.

11Ha umi koty’i ojogua umi oĩva yvate gotyoguápe; ipukukue ha ipekue peteĩcha, ha opaite hokẽnguéra oĩva guive ipype peteĩcha memete.

12Péicha avei umi koty’i rokẽ ojogua umi yvy gotyoguávape; oĩ peteĩ okẽ pe tape ñepyrũháme ha peteĩ tape po’íva pe kora renondépe, kuarahyresẽ gotýo, umi koty’ípe oikesévape g̃uarã.

13Ha he’i chéve: Umi koty’i yvate gotyoguáva ha umi yvy gotyoguáva, opytáva pe pa’ũ nandiha rovái, umi koty’i oñemboykéva Ñanderuetépe g̃uarã ha ipype umi pa’i oñembojakuaáva Ñanderuete rendápe ho’uva’erã pe kuave’ẽmby ro’o oñemboykéva Ñanderuetépe g̃uarã; upépe umi pa’i omohendava’erã pe kuave’ẽmby tembi’u reheguáva pe kuave’ẽmby angaipa reheguáva ha pe kuave’ẽmby heko ky’a reheguáva, pe tenda péva oñemboykégui Ñanderuetépe g̃uarã.

14Umi pa’i oike guive pe tenda oñemboykéva Ñanderuetépe g̃uarã ndaikatuvéima osẽ ijaotee reheve Ñanderuete rogaguasúgui, ha osẽta ramo oipe’ava’erã ha oheja upépe, pe ao ojeporuva’erã omba’apo aja, umía oñemboykégui Ñanderuete rembiapópe g̃uarãnte; ha omonde jevyva’erã ijaoteéva, ha uperirémante oñembojakuaa jevy ambue tetãyguakuéra rehe.

15Ha pe ángel oha’ãmbáva Ñanderuete rogaguasu tuichakue, cherenohẽ pe okẽ oma’ẽva kuarahyresẽ gotýo rupi, ha oñepyrũ oha’ãmba Ñanderuete róga korapy jerekue.

16Oha’ã ijyke kuarahyresẽ gotyogua imétrope, ha ipukukue ohupity 1535 métro.

17Oha’ã avei ijyke yvate gotyogua, ha ojohu avei 1535 métro.

18Upéi oha’ã ijyke yvy gotyogua, ha ojohu 1535 métro.

19Ha ombojere ijyke kuarahyreike gotýo, ha oha’ãvo ohupity avei 1535 métro.

20Upéicha oha’ã irundyve yke; ha pe korapy jere yvate ipukukue 1535 métro ha ipykue 1535 métro; omboja’o hag̃ua pe tenda oñemboykéva Ñanderuetépe g̃uarã ha umi tetãygua renda ojuehegui.