Zacarías 9 - Biblia en Guaraní - ?anderuete ?e’? Por? 2015

Ñanderuete ombopoguy tetã ambueyguakuérape

1Ko ñe’ẽ Ñanderuete he’i Hadrac retã ha Damásco rehe: Síria tavakuéra Ñanderuete mba’e voi ha péicha Israel tribukuéra avei.

2Hamat imba’e avei, opytáva ijykére, péicha avei Tíro ha Sidon, iñaranduete avei.

3Tíro omopu’ã itáva tápia imbaretetéva, ombyaty hag̃ua pláta yvy timbóicha ha óro tymba repotícha, oĩva umi cálle tavaguasu ryepy rupi.

4Ñanderuete katu omomboriahúta ichupekuéra ha oitypáta yguasúpe imba’erepyeta ha ohapypáta itavakuéra.

5Ascalon ohechávo péva okyhyjéta, Gáza oryryipáta, péicha avei Ecron ojerovia rei haguére Tíro rehe, ha Gáza retã ruvicha omanóta ha Ascalónpe avave ndoikomo’ãvéima.

6Asdódpe oikóta tetãyguakuéra ojehe’apáva ha Che amboguéta umi Filisteaygua ñembotuicha reko.

7Aipe’áta pe so’o tuguy rehegua oĩva ijurúpe, ha umi mba’e ipotĩ’ỹva hãi pa’ũgui, ha’ekuéra opyta peve avei peteĩ hembyremi Ñanderuetépe g̃uarã, imburuvicha oikóta Juda poguýpe hembiguái ramo, Jebus peguáicha.

8Upéramo apytáta che róga jere rehe peteĩ ñangarekoháraicha (guárdiaicha), ani hag̃ua avave oho térã ou ojopy hag̃ua che retã, Che voi añangarekóta hesekuéra, ko’ág̃a che resa rupi ama’ẽta hesekuéra.

Pe Sion retã ruvicharã

9Evy’aitékena, Sion rajy, epurahéi vy’apópe, Jerusalen rajy, péina ápe ne retã ruvicha (Hesu Crísto) oúta ne rendápe nde Salvador ramo ijustícia reheve, Ha’e oñemomirĩta ha oúta peteĩ búrro ra’yrusu ári.

10Ahundipáta umi Efrain cárro ñorãirõ megua, ha umi Jerusalen pegua kavaju, ha umi guyrapa ojeporúva ñorãirõme Che amopẽmbáta, ha oñe’ẽta ñe’ẽ py’apy peguáva rehe tetãnguérape, ha Ha’e oisãmbyhýta peteĩ yguasu guive ambue yguasu peve, ha pe ysyry guive pe yvy apýra paha peve.

11Ha pe ñe’ẽ rehe Che ame’ẽva’ekue tuguy reheve, Che aguenohẽmba jevýta nde jepokuapyhakuérape ykua hypývagui.

12Pejevypa pende táva oñemombaretévape, peẽ peikóva jepokuapyhápe napeha’ãrõ reíri ko ára kóvape g̃uarã, pende jehasa asykue amyengovia jo’áta hetave jehovasápe (ñepytyvõme).

13Che aiporúta Judápe che guyrapa ramo ha Efraínpe che hu’y ryru renyhẽ ramo, ha nde, Sion ra’ýgui ajapóta che kyse puku amopu’ãtava Greciayguakuéra rehe.

14Upéramo Jahve ojehechaukáta, hu’y osẽta aratirícha. Ñandejára, Jahve, ombopúta ituru, ha oipeju hatãta ijyvytu yvy gotyoyguápe.

15 Ángel atykuéra Jára oñangareko porãta hesekuéra, Israelguakuéra omokõmba hag̃ua hese ija’e’ỹvape ha opyrũmba hag̃ua umi ita oñemombova’ekue rehe, ha omboy’úta hikuái huguy oje’u háicha pe víno, ha henyhẽta hikuái tuguýgui ku kuave’ẽmby ña’ẽmbéicha térã pe kuave’ẽmby renda ratĩcha.

16Ha Ñanderuete oipytyvõta ichupekuéra, upe ára upévape Ha’e oñangarekóta hetãre peteĩ ovecha rerekuáicha oñangarekóva ijovecháre, ha hetãtee omimbíta itaveráicha akã jeguaka peguáicha.

17Ituichaiterei ningo Ñanderuete poriahuvereko ha heko jajaipa. Pe trígo omombaretéta karia’ykuérape ha pe parral rykue omoporãta kuñataĩkuérape.