Márcos 4 - Biblia en Guaraní - ?anderuete ?e’? Por? 2015

Pe ñemitĩhára ha ikokue, ha ambue Hesu rekombo’e

1Ha Hesu oporombo’e jevývo yguasu rembe’ýpe, ijaty hetaitereígui ohenduséva ichupe, Hesu ojupi peteĩ bárcope ha oguapy ipype, ha omomombyryukami y rembe’ýgui. Ha umi ijatýva opytapa y rembe’ýpe ohendu hag̃ua iñe’ẽ.

2Ha ombo’e ichupekuéra ñe’ẽ mbojoja rupi he’ívo:

3Pehendu: Osẽ ningo peteĩ ñemitỹhára oñotỹ hag̃ua ikóga ra’ỹinguéra.

4Ha oñemitỹvo, oime ho’áva tapére, ha guyrakuéra ou ha ho’upa.

5Ha oime ho’áva itatýpe, yvy pokãháme, voi heñói, pe yvy ipererĩgui.

6Ha osẽvo kuarahy ohapy, ha ndahapóigui, ipirupa.

7Ha oime ho’áva ñuatĩndýpe, umi ñuatĩ okakuaa ha ombopytupa, ha ndahi’ái.

8Ha oime ho’áva yvy porãháme, heñói, okakuaa ha hi’a, oime hi’áva 30 peve, ambue 60 peve, ambueve 100 peve, peteĩ mba’e ra’ỹigui.

9Upe ijapysáva ohendu hag̃ua, tohendu.

10Ha Hesu opytávo ha’eño 12 hemimbo’ekuéra ndive, oporandu hikuái Hesúpe mba’épa he’ise pe ñe’ẽ mbojoja.

11Ha Hesu he’i ichupekuéra: Peẽ ningo ikatu peikuaa Ñanderuete retãguasu ñemimby, oka peguakuérape katu opaite mba’e oñehenduka ñe’ẽ mbojoja rupimante.

12Oma’ẽ ramojepe ani ohecha ni ohechakuaa, ha ojapysakárõ jepe ani ohendu ni oñemoambue, ani hag̃ua ojevy ha oñeperdona ichupekuéra.

13Ha he’i ichupekuéra: Ndapeikuaái piko mba’épa he’ise pe ñe’ẽ mbojoja. Mba’éichapa peikuaapáta aipórõ ambue ñe’ẽ mbojoja.

14Pe ñemitỹhára oñotỹ Ñanderuete ñe’ẽ porãite.

15Umi kóga ra’ỹi ho’ava’ekue tapére ningo umi ñe’ẽ hekovépe oñeñotỹmbyre: Ohendu rire, ou Satana ha ohekýi pe ñe’ẽ hekovépe oñeñotỹmava’ekue.

16Ha upéicha avei umi oñeñotỹmava’ekue itatýpe: Umi ohendúva pe ñe’ẽ, torypápe ojapyhy,

17ndahapóigui, ndahi’aréi avei, og̃uahẽgui jejopy vai (persecucion) Ñanderuete ñe’ẽ rehe, voi oñepysãnga ha (opoi Hesúgui).

18Ha ñuatĩndýpe oñeñotỹva’ekue; umía ohendu pe ñe’ẽ,

19ha upe yvy ári jepy’apy, mba’eta mborayhu ha ambue mba’e pota katu, ombyesarái pe ñe’ẽgui ha ndahi’ái.

20Ha umi kóga ra’ỹi oñeñotỹva’ekue yvy porãme katu ningo umi ohendúva pe ñe’ẽ, oñemomba’e hese, ha hi’a 30, térã 60, térã 100 peve peteĩ mba’e ra’ỹigui.

21Ha he’i avei ichupekuéra: Ojegueru piko tataindy oñemoĩ hag̃ua mba’yru térã tupa guýpe. Ndojeguerúipa oñemoĩ hag̃ua tataindyenda ári.

22Ndaipóri voi ningo mba’eve ñemimby ojehechauka’ỹva’erãva, ha mba’eve ñemiha megua ojekuaauka’ỹva’erãva.

23Oimérõ ijapysáva ohendu hag̃ua, tohendu ko’ã mba’e.

24Ha he’i ichupekuéra, pejapysaka porãke pehendúvare: Pe medída peẽ peiporúva pende rapicha rehe ojeporu jevyva’erã penderehe ha hi’ári oñembojo’aveva’erã peẽme.

25Upe oguerekóvape oñeme’ẽveva’erã, ha upe oguereko’ỹvagui katu, oguerekómimíva jepe ojepe’ava’erã avei ichugui.

26Ha he’i ichupekuéra: Ñanderuete retãguasu ningo ojogua kuimba’e oitývape ikóga ra’ỹi ikokue potĩmbyrépe,

27ha oke ha opáy jave ohasa pyhare ha ára, ha pe kóga ra’ỹi heñói ha okakuaa ha’e oikuaa’ỹre mba’éichapa.

28Ijeheguínte pe yvy hi’a, ka’avo raẽ, upéi trígo, ipahápe trígo ra’ỹi henyhẽ.

29Ha hi’ajupámarõ, oñekytĩ, og̃uahẽ rehe ñekytĩha ára.

30Ha he’i: Mba’érepa ñambojojáne Ñanderuete retãguasu, térã mba’e mbojojápepa ojogua.

31Ojogua mostáza ra’ỹi peteĩme, oñeñotỹ ramo, imichĩve opaite kóga ra’ỹi yvy ariguágui.

32Ha heñói rire katu, opu’ã ha tuichave opaite umi ambue ka’avógui, ha hakãguasu, guyrakuéra jepe ikatu oñembohupa hakãnguérare.

33Ha peichagua ñe’ẽ mbojoja rupi Hesu oñe’ẽ ichupekuéra, ikatu háicha ohendu hikuái.

34Ha ñe’ẽ mbojoja’ỹ rehe Hesu noñe’ẽi ichupekuéra, hemimbo’ekuérape katu ha’eñoháme omyesakã porãmba ko’ã ñe’ẽ mbojoja.

Hesu ojoko pe yvytu vai

35Ha Hesu he’i ichupekuéra ka’arúmarõ upeha ára: Jahasa lágo mboypýri.

36Ha omondopa rire hikuái umi oñembyatývape, hemimbo’ekuéra ogueraha Hesu Crístope bárcope pe lágo mboypýri. Ha oĩ katu umi omoirũva ichupekuéra ibarcokuérape,

37ha oipeju sapy’a peteĩ yvytu neratãva, ha pe y pochy ojupi pe bárco ári ha omyenyhẽmo’ã ýgui.

38Ha Hesu okehína pe bárco ruguaitépe, peteĩ akãngyta ári, upémaramo hemimbo’ekuéra omombáy Hesúpe ha he’i: Mbo’ehára nerepenamo’ãi piko ja’yguýma jahávo.

39Ha Hesu opáyvo oja’o yvytúpe ha he’i pe yguasu pochýpe: Epyta, ekirirĩ. Ha opi pe yvytu, ha iporãmba jevy pe ára.

40Ha Hesu he’i ichupekuéra: Mba’érehe piko pekyhyjete, ndapejeroviái piko.

41Ha tuichaite kyhyjepópe he’i joa ojupe: Máva piko kóva, ko yvytu ha yguasu jepe ohendu iñe’ẽ.