Josue 14 - Biblia en Guaraní - ?anderuete ?e’? Por? 2015

Canaan yvy oñemboja’o po’a jeporavo rupi.

1Ko’ã Israel tríbu ojapyhyva’ekue ijyvyrã Canaan retãme, pa’i Eleazar, Josue, Nun ra’y ha umi Israel tríbu ruvichakuéra omboja’o ichupekuéra.

2Po’a jeporavo rupi oñeme’ẽ Canaan yvy 9 tríbupe ha peteĩ tríbu mbyterépe imba’etee ramo, Ñanderuete he’i haguéicha Moiséspe.

3Ha umi ambue mokõi ha peteĩ tríbu mbyterépe oñeme’ẽma imba’e tee ramo Jordan mboypýri; ha Leviguakuérape katu noñeme’ẽi ijyvy teerã ijapytepekuéra.

4Jose ra’ykuéragui oiko mokõi tríbu, Manases ha Efrain; ha Leviguakuérape noñeme’ẽi yvy imba’eteerãva, oñeme’ẽnte ichupekuéra tavakuéra oiko hag̃ua, ha umi táva jere rehegua ñu hymbakuérape g̃uarã.

5Ñanderuete he’i haguéicha Moiséspe, péicha Israel ñemoñarenguéra omboja’o pe yvy péva.

Calébpe oñeme’ẽ Hebron

6Juda ñemoñarenguéra ou Josue rendápe, Gilgálpe, ha Caleb, Jefone ra’y, peteĩ Cenezgua, he’i ichupe: Nde reikuaa voi Ñanderuete he’iva’ekue Moiséspe, Ñanderuete rembiguái, Cades-barnéape, cherehe ha nderehe.

7Che aguerekókuri 40 áño Moises, Ñanderuete rembiguái, chemondo ramoguare Cades-barnéagui amaña ñemi hag̃ua ko yvýre; ha che ambohasa ichupe pe marandu añandu háicha che py’apýpe.

8Ha che irũnguéra, chemoirũva’ekue, omokangy Israelguakuéra py’apy: Che katu cheñe’ẽrendu hekoitépe Ñanderuete, che Jára he’ívape.

9Upéramo Moises ome’ẽ iñe’ẽ he’ívo: Añetehápe pe yvy nde py opyrũva’ekue rehe opytáta nde ha nde ra’yrekuéra mba’etee ramo opaite ára peve, rejapógui hekoitépe Ñanderuete, che Jára rembipota.

10Ha péina, Ñanderuete chemoingove ko’ã 45 áño pukukue Ñanderuete he’iha ára guive ko’ã ñe’ẽ Moiséspe, Israel oiko ramoguare desiérto rehe; ha péina ág̃a aguerekóma 85 áño.

11Ha chembarete gueteri pe ára Moises chemondo ramoguaréicha; chembarete gueteri, aime aha hag̃uáicha ñorãirõme térã ajapo hag̃ua oimeraẽ ambue tembiapo.

12Eme’ẽna chéve ko’ág̃a ko cérro, Ñanderuete oñe’ẽva’ekuégui, nde voi rehendu avei pe ára pévape oiko hague gueteri Anacguakuéra, ha oĩha avei upépe umi táva tuicháva ha ikorapy jere ijyvatéva. Ikatu Ñanderuete oĩ chendive, ha amosẽta ichupekuéra, Ñanderuete he’i haguéicha.

13Upéramo Josue ohovasa ichupe, ha ome’ẽ Caleb, Jefon ra’ýpe, Hebron imba’etee ramo.

14Upéicha Hebron opyta Caleb, Jefone ra’ýpe g̃uarã ko ára kóva peve, oikógui hekoitépe Ñanderuete, Israel Jára rapykuéri.

15Ha Hebron hérava’ekue ymave Quiriatarba; Arba kuri peteĩ kuimba’e tuichaitereivéva Anacguakuéra apytépe, ha pe yvy opytu’u ñorãirõgui.