Provérbios 10 - Biblia en Guaraní - ?anderuete ?e’? Por? 2015

Teko potĩ ogueru jehovasa, tembiapo vai katu ogueru ñehundirã Salomon ñe’ẽ arandu aty mokõiha

1Salomon rekombo’ekuéra: Pe ta’ýra iñarandúva ombohory itúvape, ha pe iñañáva katu omoñembyasy isýpe;

2umi mba’erepyeta ñemondapyre ndoguerumo’ãi jehovasa; pe jeporiahuvereko katuete ojehovasava’erã;

3Ñanderuete ndohejaiva’erã pe heko potĩva ánga iñembyahýi, ha iñañáva mba’epota katu nomohyg̃uatãmo’ãi;

4upe iñate’ỹva oñemomboriahu; upe ikyre’ỹva katu oñembopirapire;

5iñakã porã pe ta’ýra omono’õva avei arahaku aja, pe ta’ýra ivýrova katu oke pe ñemono’õha arakuérape;

6jehovasa ningo ou pe heko potĩva akã ári, ha umi iñañáva juru oñorãirõsénte;

7pe heko potĩva rehe opavave imandu’a, pe iñañáva rehe oĩta tesarái;

8pe iñarandúva iñe’ẽrendu, pe iñañáva katu oñehundiva’erã;

9pe oikóva teko porãme ndokyhyjemo’ãi, ha pe oikóva tape ikarẽvare katu iñangekõiva’erã;

10upe oñembohorýva ogueru ijupe g̃uarã mba’embyasy, ha upe ivýrova oñe’ẽ reíva, katuete ho’ava’erã;

11pe heko potĩva juru ojogua yvu oporomoingovévape; ha pe iñañáva juru ogueru ñorãirõrã ha teko vai,

12pe py’aro hi’a ñorãirõ; ha pe mborayhu katu oñu’ãmbase hapicha rembiapo vai;

13pe iñakãguapýva jurúpe jajohu arandu, ha ivýrova oñenupãva’erã;

14umi iñarandúva imbegue ombohasa hag̃ua iñarandu; umi ivýrova katu ndojokói ijuru, pya’e ombohasa ivýro reko;

15pe imba’e hetávape g̃uarã ipirapire ojogua peteĩ táva oñemombaretévape; ha umi imboriahúvape, imboriahu reko omokangy ichupekuéra;

16pe heko potĩva rembiapo repy ojeporu oikove hag̃ua, pe iñañáva rembiapo repy katu ojeporu tembiapo vaípe g̃uarã;

17upe iñe’ẽrendúva oñemboheko porã oje’e háicha ichupe, oguatágui tekove rape rehe; ha upe iñe’ẽrenduse’ỹva katu oñehundiva’erã;

18upe omokañýva ipy’aro, ijapuva’erã; ha upe omosarambíva ñe’ẽ rei hapicháre ivýro;

19upe oñe’ẽitereíva katuete oñemohembiapo vai, ha upe ojokokuaáva ijuru katu iñarandu;

20 óro morotĩ potĩva ningo heko potĩva ñe’ẽ, ha pe iñañáva ñe’ẽ katu ndaha’éi mba’eve.

21Pe heko potĩva ñe’ẽ omoangapyhy hetápe, ivýrova ñe’ẽ katu opa rei, naiñakã porãigui;

22Ñanderuete jehovasa ombohetave pe pirapire, ha pe yvyarigua oñeha’ãmba ramojepe ndaikatúi ombohetave;

23pe ivýrova ovy’a ombotavy ramo hapichápe, ome’ẽ ramojepe iñe’ẽ; pe iñarandúva katu oñeha’ãmba ojapopa iñe’ẽ ome’ẽva’ekue,

24pe iñañáva okyhyje umi mba’evai ojehuva’erã henonderãme, ha umi heko potĩvape oñeme’ẽva’erã umi mba’e oipotáva;

25pe kusuviru’ũ (torbellíno) ohasa háicha, péicha avei pe iñañáva ndahi’areiva’erã, ha pe heko potĩva katu oiko tapiáta;

26ku víno hái ñane rãime g̃uarãicha, ha pe tatatĩ ñande resápe g̃uarãicha, péicha hína pe iñate’ỹva ijokuaihápe g̃uarã;

27upe okyhyjéva Ñanderuetégui ombohetavéta hekove ára, ha iñañáva añokuéra katu imbykyveva’erã.

28Pe heko potĩva esperánza ogueru vy’a, ha umi iñañáva oha’ãrõva katu ogue reiva’erã;

29Ñanderuete rape ningo omombarete heko potĩvape, ha pe hembiapo vaíva katu oñehundi;

30pe heko potĩva araka’eve ndojepe’amo’ãi ko yvy ape árigui, ha umi iñañáva katu ndopytamo’ãi yvy apére.

31Pe heko potĩva juru omoheñói arandu, ha pe iñañáva kũ oñekytĩva’erã;

32umi heko potĩva juru he’ikuaa ñe’ẽ oporombohorýva, ha umi iñañáva juru katu he’i mba’e itie’ỹva.