Márcos 10 - Biblia en Guaraní - ?anderuete ?e’? Por? 2015

Mendare rekove

1Upéi Hesu opu’ã ha oho hikuái Judéa departaméntope, Jordan mboypýri. Ha hetãyguakuéra ijaty jevy hendápe, ha Hesu ombo’e jevy ichupekuéra.

2Ha fariseokuéra oñemboja hendápe, oha’ã hag̃ua ichupe iporandu ñuhã rupi: Ikatúpa pe ména opoi hembirekógui.

3Ha Ha’e he’i ichupekuéra: Mba’épa he’iukaraka’e peẽme Moises.

4He’i hikuái: Moises opermiti ojehai ramo peteĩ kuatiañe’ẽ omendáva ojopoi hag̃ua.

5Hesu katu he’i ichupekuéra: Pendepy’a hatãitereígui ha’e ohaiva’ekue ko tembiapoukapy kóva.

6Ñepyrũme, Ñanderuete ojapórõ guare opaite mba’e, Ha’e ojapo peteĩ kuimba’e ha peteĩ kuña (opyta hag̃ua oñondive).

7Upévarehe pe kuimba’e ohejava’erã itúva ha isýpe,

8oiko hag̃ua hembireko ndive, ha mokõivéva peteĩ to’ontemava’erã.

9Upévare umi tekove Ñanderuete ombojoajuva’ekue aníke yvyariguakuéra ombojei ojuehegui.

10Ha oĩmavo hikuái hógape hemimbo’ekuéra oporandu jevy Hesúpe pévare.

11Ha Ha’e he’i ichupekuéra: Upe opoíva hembirekógui omenda hag̃ua ambue kuña rehe, ombyai imendare hembireko ndivegua.

12Ha pe tembireko opoírõ iménagui ha omenda ambue kuimba’e rehe, ha’e ombyai imendare iména ndivegua avei.

Hesu ohovasa mitãkuérape

13Ojegueru Hesu rendápe heta mitã Ha’e opoko hag̃ua hesekuéra, ha hemimbo’ekuéra omongavaju umi oguerúvape.

14Hesu katu ohechávo péva ipochy ha he’i ichupekuéra. Peheja mitãkuéra tou che rendápe, ani pejoko ichupekuéra, peichagua oikeva’erã Ñanderuete retãguasúpe.

15Añetéko ha’e peẽme: Upe oiko’ỹva mitãicha, araka’eve ndoikeiva’erã Ñanderuete retãguasúpe (yvágape).

16Ha Hesu ohupívo ijyva, omoĩ ipo umi mitãkuéra ári ha ohovasa ichupekuéra.

17Ha Hesu osẽvo oipykúi hag̃ua hape, og̃uahẽ hendápe peteĩ kuimba’e ñaniháme oñesũ henondépe ha oporandu ichupe: Mbo’ehára heko porãva, mba’épa ajapova’erã ahupity hag̃ua pe tekove tapia g̃uarãva.

18Hesu he’i ichupe: Mba’érehe piko ere chéve chereko iporãha. Avave ningo ndaheko porãi, peteĩ añónte, Ñanderuetémante.

19Reikuaa umi tembiapoukapy: Aníke reporojuka, aníke remongy’a mendare, aníke remopu’ã japu, aníke reipe’a rei mba’eve avavégui, emboete nde ru ha nde sýpe.

20Ha ha’e ombohovái: Mbo’ehára, opaite ko’ã mba’e ajapo che mitãrusu guive.

21Ha Hesu oma’ẽvo hese ohayhu ichupe, ha he’i ichupe: Peteĩ mba’e ne’ĩra rejapo. Tereho eme’ẽmba rerekóva guive mboriahukuérape, ha rerekóta mba’eita Ñanderuete rekohápe, ha eju che rapykuéri.

22Ha’e katu ipy’a ñembyasyete pe ñe’ẽre, ha oho upégui py’a rasýpe, oguerekógui heta mba’erepy.

23Upérõ Hesu oma’ẽ ijerekuévo ha he’i hemimbo’ekuérape: Hasyeterei oike hag̃ua Ñanderuete rekohápe umi ipirapire hetáva.

24Hemimbo’ekuéra oñemondýi ko ñe’ẽ kóvare, Hesu katu he’i jevy ichupekuéra: Che ra’ykuéra, hasyeterei oike hag̃ua Ñanderuete jeikohápe, (umi ojeroviáva ipirapire heta rehe).

25Ikatuve ñambohasa peteĩ guéi ju resa rupi, imba’e hetáva oike hag̃ua Ñanderuete rekohápe.

26Ha’ekuéra ijurujaipa opytávo, ha he’i ojupe. Aipórõ, máva piko ikatu ojesalva.

27Hesu katu oma’ẽ hesekuéra ha he’i: Kuimba’ekuérape g̃uarã ndaikatúi, ndaupéichai katu Ñanderuetépe g̃uarã, opaite mba’e Ha’e ikatu ojapo.

28Upérõ Pédro he’i ichupe: Péina ningo ore roheja opaite mba’e ha roiko nde rapykuéri.

29Hesu he’i: Añete ha’e peẽme, ndaipóri avave ohejava’ekue: Hóga, ityvyrakuéra, iteindyrakuéra, isy térã itúva, térã ita’yrakuéra, térã ikokue, che rayhupápe ha Ñanderuete ñe’ẽ porãite (evangélio) rayhupápe,

30ohupity’ỹva’erã 100 jevyve ko’ã mba’e ko’ã árape: Óga, tyvýra, teindýra, sy, ta’ýra, kokue, ha hi’ári pe tekove tapia g̃uarãva henonderãme.

31Opáichavo heta ko’ág̃a oĩva tenondegua ramo opytáta tapykuépe, ha heta tapykue peguáva opytáta tenonderãme.

Hesu he’i jevy omanotaha

32Ha oho hikuái Jerusalen rapére ha Hesu oñemotenonde hemimbo’ekuéragui. Ko’ãva oñemondyipa, ha umi hapykuéri ohóva okyhyjepa. Ha ogueraha jevy umi 12 ha’eñoháme, ha oñepyrũ omombe’u umi mba’e oikótava hese ichupe g̃uarã, ha he’i:

33Péina ningo jajupi Jerusalénpe, ha Ñanderuete Ra’y ho’áta pa’i ruvicha ha kuatia haihára pópe, ko’ãva oñemoĩta hese ha oñeha’ãmbáta ojukauka hag̃ua ichupe Romayguakuéra po rupi.

34Ha oñembohorýta hikuái hese, ha oinupãta ichupe yvyrápe, ondyvúta hese ha ojukáta ichupe, ág̃a katu mbohapy ára rire oikove jevýta.

Jacóbo ha Juan rembijerure

35Upérõ Jacóbo ha Juan, Zebedéo ra’ykuéra, oñemboja Hesu rendápe ha he’i ichupe: Mbo’ehára roipota ningo rejapo oréve ko rojerurétava ndéve.

36Ha Hesu oporandu ichupekuéra: Mba’épa peipota ajapo peẽme g̃uarã.

37Ha’ekuéra he’i: Ehejána toroguapy nde reko jajaipápe, peteĩ nde akatúa gotýo ha ambue nde asu gotýo.

38Hesu he’i ichupekuéra: Ndapeikuaái upe pejeruréva; ikatúpa pey’u pe váso che hay’úvape, térã pejebautizaukáta che bautísmope.

39Ha ha’ekuéra he’i: Ikatu. Ha Hesu he’i ichupekuéra: Katuete pey’úta pe váso che hay’úvape, ha pejebautizaukáta che bautísmope.

40Peẽ peguapy hag̃ua che akatúa ha che asu gotýo, ndaijái chéve ame’ẽ, péva ningo opytáma umi oñembosako’ívape g̃uarãnte.

41Ohendúvo péva ambue 10 hemimbo’ekuéra ipochy Jacóbo ha Juan ndive.

42Hesu ohenoimba ijypýpe ha he’i ichupekuéra: Peikuaa niko umi tetã ruvichakuéra oguerekoha hetãyguakuérape ipoguýpe, ha umi mburuvichakuéra oiporu vai hesekuéra ipu’aka.

43Pende apytépe katu ndaupeichaiva’erã; upe ituichaséva pende apytépe, upéva pene rembiguaiva’erã.

44Upe itenondeséva pende apytépe, upéva opavave rembiguaiva’erã.

45Ñanderuete Ra’y ningo ndoúi ojeserviuka hag̃ua, oservi hag̃ua uvei ha ome’ẽ hag̃ua hekove osalva hag̃ua heta kuimba’e ha kuñakuérape.

Hesu omonguera Bartiméope

46Ha oho hikuái Jericópe. Ha Hesu osẽvo Jericógui hemimbo’ekuéra ndive ha hetaite hetãyguakuéra ndive, ojohu Bartiméope, peteĩ hesatũva, Timéo ra’y, oguapyvahína tape ykére ha ojerure pirapiremi rehe.

47Ha ha’e ohendúvo Hesu Nazaretgua oumaha, oñemoĩ osapukái: Hesu, David ra’y, cheporiahuverekomína.

48Ha heta oĩ oja’óva ichupe okirirĩ hag̃ua, ha’e katu osapukái hatãve: David ra’y, cheporiahuverekomína,

49ha Hesu opyta ha he’i: Pehenói ichupe. Ohenói hikuái pe hesatũvape ha he’i ichupe: Ndepy’a rorýke, epu’ã eju, Ha’e ningo nerenói.

50Upérõ pe hesatũva oity hi’árigui ijahoja, opu’ã ha oho Hesu rendápe.

51Ha Hesu oporandu ichupe: Mba’épa reipota ajapo nderehe. Ha pe hesatũva he’i: Mbo’ehára, tahecha jevýna.

52Ha Hesu he’i ichupe: Tereho, nde jerovia nepytyvõma. Ha upevove ohecha jevy, ha oho Hesu rapykuéri tape rehe.