2 Crónicas 26 - Biblia en Guaraní - ?anderuete ?e’? Por? 2015

Uzías omoakã Juda retãme

1Upéramo mayma Judaygua oiporavo Uzíaspe, péva oguereko upéramo 16 áño, ha omoĩ ichupe hikuái tetã ruvicha ramo itúva Amasías rendaguépe.

2Uzías omopu’ã jevy Elat, omoĩ jevy rire Juda poguýpe, tetã ruvicha Amasías omano rire.

3Uzías oguereko 16 áño oñepyrũvo oisãmbyhy, 52 áño oisãmbyhy Jerusalénpe; isy réra Jecolías, peteĩ Jerusalengua.

4Ha ojapo iporãva Ñanderuete resa renondépe, itúva Amasías ojapo haguéicha (heta añokuéra rupi).

5Ha’e oñeha’ã ojapo hag̃ua Ñanderuete rembipota Zacarías ohekombo’e aja ichupe hekove pukukue rupi, Ha’e oipytyvõ porã ichupe opaite mba’épe.

6Upérõ Uzías osẽ ojeity hag̃ua Filisteayguakuéra ári, ha ojokapa Gat, Jabne ha Asdod korapyjere yvate, ha omopu’ã ambue tavakuéra Asdodpy rehe, Filisteayguakuéra retãme.

7Ñanderuete oipytyvõ ichupe ombopoguy hag̃ua Filisteayguakuérape, Arabiayguakuérape, oikóva Gur-baálpe peguápe ha Amonguakuérape.

8Upéi Amonguakuéra ome’ẽva’erã Uzíaspe impuésto (pirapire), ha Uzías rerakuã oñemosarambi Egípto retã rembe’y peve; ha’e oñemombarete porãitereígui.

9Uzías avei omopu’ã óga yvatekuéra Jerusalen táva tápiape hugua rokẽ meve, pe ñu gotyogua rokẽ ypýpe, ha umi hakuaha (esquína) ypýpe; ha omombarete porã umía.

10Omopu’ã avei óga yvate ñuguasúpe, ha ojo’o heta yrendarã, hymba hetaitereígui. Oguereko avei parralty ha heta ñemitỹmbyre ikokuépe, ohayhúgui ñemitỹ.

11Uzías oguereko avei peteĩ soldádo atyguasu oñorãirõkuaáva, ha kóva omboja’o aty’i aty’ípe, pe kuatia haihára Jeiel omoĩ háicha héra ikuatiañe’ẽ, sãmbyhyhára Maasías ha soldádo aty ruvicha Hananías renondépe.

12Oĩ 2.600 Juda rogaguasu ruvicha ipy’aguasúva.

13Ha ko’ãva poguýpe oĩ 307.500 kuimba’e oñorãirõkuaáva ha imbaretéva, oipytyvõ hag̃ua tetã ruvichápe ombopoguy hag̃ua hese ija’e’ỹvape.

14Ha Uzías ombosako’i opaite soldadokuérape g̃uarã hetemo’ãha, yvyra puku akua, akãmo’ãha, pyti’amo’ãha, guyrapa ha ita momboha.

15Ha Jerusalénpe ojapouka maquinakuéra, ikuimba’ekuéra iñarandúva rupi, omombo hag̃ua hu’y ha ita tuicháva hóga yvatégui, oĩva táva tápia rehe. Ha herakuã oñemyasãi mombyry peve, oĩgui heta oipytyvõ porãva ichupe oñemombaretete peve.

16Ha oñemombaretete rire ou oñembotuicha ipy’apýpe iñehundirã gotýo; opu’ãgui Ñanderuete, Ijára rehe, oikévo Ñanderuete rógape omotimbo hag̃ua mba’e ryakuã porã pe mohyakuãha kuave’ẽmby renda ári.

17Ha hapykuéri oike pa’iguasu Azarías, 80 pa’i ipy’aguasúva ndive.

18Ha oñembyaty hikuái tetã ruvicha Uzías renondépe, ha he’i ichupe: Nandeiva’erã ningo Uzías upe ohapýva mba’e ryakuã porã Ñanderuetépe g̃uarã; pa’ikuéra, Aaron ra’yremanteva’erã, ha’ekuérante oñemboykeva’ekue ohapy hag̃ua. Esẽ ko kotýgui oñemboykévagui pa’ikuérape g̃uarãnte, repyrũ ningo yvy rehe oñemboykéva Ñanderuetépe g̃uarã, ndéve g̃uarã ningo ndaha’emo’ãi terakuã porã, Ñanderuete pe Jaraitéva renondépe.

19Upéramo Uzías oguerekohína peteĩ myatatĩha ipópe ha ipochyeterei; ha ipochyetereívo umi pa’i rehe, pe ai vai (lépra) osẽ isyva rehe, umi pa’i rovake Ñanderuete rógape, pe mohyakuãha kuave’ẽmby renda ypýpe.

20Ha pa’iguasu Azarías ha mayma pa’ikuéra oma’ẽ hese ha péina pe ai vai oĩ isyva rehe; ha pya’e oguenohẽ hikuái ichupe upégui; ha ha’e voi pya’e pya’e osẽse, Ñanderuete ombohasýgui ichupe.

21Péicha tetã ruvicha Uzías hasy ai vaígui omanoha ára peve, ha oiko ha’eñomi hógape ha hasýgui ndojehejái ichupe oikeve Ñanderuete rógape; ha ita’ýra Jotam poguýpe opyta tetã ruvicha rembiapo, ha ha’e oisãmbyhy hetãyguakuérape.

22Ambue Uzías rembiapokue, iñepyrũmby ha ipaha pegua, pe proféta Isaías, Amos ra’y, ohaipa.

23Ha Uzías omano rire oñeñotỹ ichupe ituvakuéra ndive peteĩ ñúme, opytáva tetã ruvicha tyvykuéra ypýpe; he’ígui hikuái: Ai vai jára ningo. Ha ita’ýra Jotam oisãmbyhy hendaguépe.