Ezequiel 10 - Biblia en Guaraní - ?anderuete ?e’? Por? 2015

Ñanderuete reko jajaipa oñemomombyry hogaguasúgui

1Ama’ẽ, ha péina umi querubin (ángel ruvicha) akã ári ahecha peteĩ mba’e iñasãiva ita vera hovýicha ha ojoguáva peteĩ mburuvichaguasu guapyhápe.

2Ha Ñanderuete oñe’ẽ pe kuimba’épe oñemondéva ao linoguiguápe, ha he’i ichupe: Eike umi ruéda mbytépe, umi querubin guýpe; ha emyenyhẽ nde po tatapỹi hendývagui umi querubin apytégui, ha emyasãi Jerusalen ári. Ha ha’e oike che resa renondépe.

3Ha umi querubin oĩ joa pe óga yke akatúa gotýo, ko kuimba’e kóva oike jave; ha pe arai omyenyhẽ Ñanderuete rogaguasu korapy hyepýpe.

4Ha Ñanderuete reko jajaipa opu’ã pe querubin árigui ha oñemoĩ pe okẽ pyrũha ári; ha pe óga henyhẽ araígui, ha Ñanderuete reko ombojajaipa pe korapy.

5Upévo oñehendu umi querubin pepo ryapu pe korapy oka peve, Ñanderuete ipu’akapavéva oñe’ẽ ramoguáicha.

6Ha oje’e pe kuimba’épe, oñemondéva ao linoguiguápe: Ejapyhy tata umi ruéda apytégui, querubinkuéra pa’ũgui. Ha’e oho oike ha oñembo’y umi ruéda apytépe.

7Ha peteĩ querubin, umi querubin apytégui, oipyso ipo pe tata oĩháme, ha ojapyhy tata ha omoĩ pe ao línogui oñemondéva pópe, ha ha’e ojapyhy ha osẽ.

8Ha upévo osẽ umi querubin pepo guýpe peteĩ kuimba’e po ra’ãnga.

9Ha ama’ẽvo ahecha irundy ruéda umi querubin ypýpe, peteĩteĩva querubin ypýpe oĩ peteĩ ruéda; ha umi ruéda ojogua ita vera sa’yjúpe.

10Umi irundy ruéda peteĩcha meme, ha ha’ete ku oikepáva ojopype.

11Ha oguata jave henonde gotýo irundyvéva peteĩcha oñemongu’e avei; ha natekotevẽi ojere oguata aja, pe tenondegua ohohápe, hapykuéri ohopa joa; ha natekotevẽi ojere oguata aja hikuái.

12Ha opaite hete, ijatukupe, ipokuéra, ipepokuéra ha umi ruéda irundyvéva henyhẽte teságui, ijerekuévo.

13Ha ahendu umi ruéda oñehenói yvytu jepokápe (torbellino).

14Ha umi querubin peteĩteĩva hova irundy. Pe peteĩha oguereko tóro rováicha; pe mokõiha, kuimba’e rováicha; pe mbohapyha, leõ rováicha; pe irundyha, ñapykani rováicha.

15Ha ã querubin opu’ãva ha’ehína umi mba’e oikovéva ahechava’ekue pe ysyry Quebar ypýpe.

16Ha umi querubin oguata aja, umi ruéda oho avei hendivekuéra; ha umi querubin omopu’ã ramo ipepokuéra opu’ã hag̃ua yvy ape árigui, umi ruéda ndojeíri ijykekuéragui.

17Opyta vove hikuái, ha’ekuéra opyta avei, ha opu’ã vove hikuái yvate, ha’ekuéra opu’ã avei; umi querubin pytu porã oĩgui ipypekuéra.

18Ha upévo Ñanderuete reko jajaipáva opu’ã pe óga rokẽ pyrũhágui, ha oñemoĩ umi querubin ári.

19Ha umi querubin omopu’ã ipepokuéra ha opu’ã hikuái yvýgui che resa renondetépe; ha osẽ vove, umi ruéda oho avei ijykére, ha opyta hikuái Ñanderuete róga rokẽ kuarahyresẽ gotyogua ypýpe, ha Israel Jára reko jajaipa opyta hi’arikuéra.

20Ko’ãva ha’ehína umi tekove ahechava’ekue Israel Jára guýpe, pe ysyry Quebar ypýpe; ha aikuaa umía querubinha.

21Peteĩteĩva hova irundy ha ipepo irundy ha ipepokuéra guýpe oĩ peteĩ mba’e ojoguáva yvyarigua pópe.

22Ha hovakuéra ojoguaite umi tova ahechava’ekuépe ysyry Quebar ypýpe, ha peteĩteĩ oguata hikuái henonderã gotýo ojere’ỹre, (Ezequiel 1,12).