Ésdras 7 - Biblia en Guaraní - ?anderuete ?e’? Por? 2015

Ésdras ha iñirũnguéra og̃uahẽ Jerusalénpe

1Ohasapa rire ko’ã mba’e, Pérsia retã ruvicha, Artajérjes, oisãmbyhy aja, Ésdras osẽ Babilóniagui, ha’e ningo Seraías ra’y, Azarías ra’yre, kóva Hilcías ra’yre,

2kóva Salum ra’yre, kóva Sadoc ra’yre, kóva Ahitub ra’yre,

3kóva Amarías ra’yre, kóva Azarías ra’yre, kóva Meraiot ra’yre,

4kóva Zeraías ra’yre, kóva Uzi ra’yre, kóva Buqui ra’yre,

5kóva Abisua ra’yre, kóva Finees ra’yre, kóva Eleazar ra’yre, kóva Aaron ra’yre, ha Aaron voi pe pa’i tenondeguare.

6Ko Ésdras ou Babilóniagui. Ha’e ningo peteĩ kuatia haihára ikatupyrýva Moises rembiapoukapýpe, Ñanderuete, Israel Jára, ome’ẽva’ekue Israelguakuérape. Opaite mba’e Ésdras ojerureva’ekue Pérsia retã ruvichápe, ha’e ome’ẽ ichupe, Ñanderuete, Ijára po oĩgui Ésdras ndive.

7Ha hendive oumimi Israel ñemoñarenguéra Jerusalénpe, ha ijapytépe oĩ pa’ikuéra, Leviguakuéra, opurahéiva, okẽ ñangarekoharakuéra ha Ñanderuete róga pegua rembiguaikuéra, opaite ko’ã mba’e ojehu tetã ruvicha Artajérjes oisãmbyhy aja peáño 7-hápe.

8Ha og̃uahẽ hikuái Jerusalénpe, pe tetã ruvicha oisãmbyhy rire 6 áño ha 5 jasy.

9Pe jasy peteĩháme, pe ára peteĩháme osẽkuri hikuái Babilóniagui, ha pe jasy 5-hápe, pe ára peteĩháme og̃uahẽ hikuái Jerusalénpe, Ñanderuete po porãite oĩgui hendivekuéra.

10Ésdras ombosako’i ipy’apy ojeitypeka hag̃ua Ñanderuete rembiapoukapy rehe ha ojapopa hag̃ua hekoitépe, ha ohekombo’e porã hag̃ua Israelguakuérape Ñanderuete ñe’ẽ ha hembiapoukapy ojehai hagueichaite.

11Kóa ha’ehína pe kuatiañe’ẽ, tetã ruvicha Artajérjes ome’ẽva’ekue pa’i Ésdraspe, ha’e ningo peteĩ kuatia haihára iñarandu ha ikatupyrýva Ñanderuete rembiapoukapykuérape, Moises ohaiva’ekue Israelguakuérape g̃uarã:

12Artajérjes, tetã ruvichakuéra ruvicha, ohai Ésdraspe, pa’i ha kuatia haihára iñarandúva Ñanderuete yvága pegua rembiapoukapýpe: Tandepy’aguapy.

13Chete ha’e opaite Israel retãyguakuéra, pa’ikuéra ha Leviguakuérape oikóva che poguýpe ha ohoséva guive nendive Jerusalénpe, toho.

14Che, pe tetã ruvichaguasu, ha umi 7 kuimba’e che rekombo’ehára romondouka rema’ẽ hag̃ua Judéa ha Jerusalen rehe, ojejapópa hekoitépe Ñanderuete rembiapoukapy nde pópe oĩva ha Ha’e oipota háicha.

15Regueraha hag̃ua pe pláta ha pe óro, tetã ruvicha ha hekombo’eharakuérape ome’ẽmava’ekue ipy’aite guive Israel Járape, oikóva Jerusalénpe,

16ha ambue pláta ha óro oñeme’ẽtava guive Babilónia retãme, ha umi ambue me’ẽmby Israelguakuéra ha pa’ikuéra ipy’aite guive oikuave’ẽse ramo Ijára rogaguasúpe g̃uarã oĩva Jerusalénpe.

17Ejogua kyre’ỹpópe pe pirapire pévare tóro ra’yrusu, ovecha machokuéra ha ovecha ra’yrusukuéra, tembi’u ha víno reheve, reikuave’ẽmba hag̃ua pene kuave’ẽmby renda ári opytáva Jerusalénpe.

18Ha pe pláta ha pe óro hembýtava nde ha nde ryke’ykuérape peiporukuaa pende Járape g̃uarã Ha’e oipota háicha.

19Umi tembiporu nde Jára rogaguasu pegua, oñeme’ẽva ndéve reiporu hag̃ua pende Jára rogaguasu rembiapópe, emoĩmba jevy hogaguasúpe.

20Ha opaite mba’e oñekotevẽvéva nde Jára rogaguasúpe g̃uarã oñeme’ẽta ndéve tetã ruvicha mba’évagui.

21Ha che, tetã ruvicha Artajérjes, ha’eukáma che mba’erepy ñangarekohakuéra ysyry mboypyriguápe ome’ẽ hag̃ua opaite mba’e pa’i Ésdraspe, yvága Jára rembiapoukapy kuatia haihára, ojeruréva guive ha pya’ete toñeme’ẽ ichupe.

223.350 kílo pláta (óro morotĩ), 22.000 lítro trígo, 2.200 lítro víno, ha 2.200 lítro acéite ha juky oñeha’ã’ỹre.

23Opaite mba’e yvága Jára he’íva guive, pya’ete tojejapo yvága Jára rogaguasúpe g̃uarã; ani hag̃ua Ha’e ojahéi tetã ruvicha ha ita’yrakuéra rehe.

24Ha roikuaauka peẽme opaite: Pa’i ha Leviguakuéra, opurahéiva, okẽ ñangarekoharakuéra ha opaite umi ijára róga rembiguái térã omba’apóva Ijára rogaguasúpe, natekotevẽi opaga impuésto ambue tembiguái oikotevẽ háicha ha avave ndikatúi ojopy umívape térã ojerure peteĩ mba’e ipokuéragui.

25Ha nde, Ésdras, pe arandu oñeme’ẽ háicha ndéve nde Járagui, emoĩ mbojovakehára ha sãmbyhyharakuérape oisãmbyhy hag̃ua opaite tetãyguápe ysyry mboypyriguápe, umi oikuaáva guive nde Jára rembiapoukapy; ha umi oikuaa’ỹvape pembo’e.

26Ha oimeraẽva ojapo’ỹva nde Jára rembiapoukapy, toñembojovake pya’ete, tojejuka térã toñemosẽ tetãpýgui, térã tome’ẽ pirapire, térã toñemoinge cárcelpe (kairaĩme).

Ésdras oagradece

Ñanderuetépe

27Toñemomba’eguasu Ñanderuetépe, ñande rukuéra Járape, omoingeva’ekue umi mba’e tetã ruvicha py’apýpe, omboete hag̃ua Ñanderuete rogaguasúpe opytáva Jerusalénpe.

28Ha ohechaukáva chendive g̃uarã iporiahuvereko pe tetã ruvicha ha hekombo’eharakuéra (consejéro) renondépe, ha mayma tetã ruvicha mburuvichakuéra ipu’akapavéva renondépe. Ha nde chemokyre’ỹ ambyaty hag̃ua Israel ruvichakuérape rojevy hag̃ua Jerusalénpe.